Biag ken Ministerio ni Jesus

Ti Mangisagana iti Dalan Naiyanaken

NGANGNGANI sisasaganan ni Elisabet a maaddaan iti anak. Kadagiti napalabas a tallo a bulan nakipagtaeng ni Maria kenkuana. Ngem itan panawenen nga agpakadan ni Maria ken tapno agdaliasat iti adayo nga agsubli idiay Nasaret. Iti agarup innem a bulan uray isu, met, maaddaanto metten ti anak.

Di nagbayag kalpasan ti ipapanaw ni Maria, nagpasngayen ni Elisabet. Anian a rag-o idi a ti panagpasngayna ti naballigi ket ni Elisabet ken ti maladaga naimbag met! Idi impakita ni Elisabet ti maladaga kadagiti kakaarrubana ken kakabagianna, nakipagrag-oda kenkuana.

Ti maikawalo nga aldaw kalpasan ti pannakaipasngayna, sigun iti linteg ti Dios, ti maladaga a lalaki iti Israel ti masapul a makugit. Gapu itoy nga okasion immay a simmarungkar dagiti gagayyem ken kakabagian. Kunada a ti ubing ti maipanagan koma ken amana, a Zacarias. Ngem nagsao ni Elisabet. ‘Saan!’ kunana. ‘Isut’ maawaganto ti Juan.’ Laglagipenyo, dayta ti nagan nga imbaga ni anghel Gabriel a maitedto iti ubing.

Nupay kasta, sinuppiat dagiti gagayyemda: ‘Awan asinoman kadagiti kakabagianyo ti agnagan iti dayta.’ Kalpasanna, babaen ti panangusarna iti senias, insaludsodda no ania ti kayat a painagan ni amana iti ubing. Idi dimmawat ti maysa a pagsuratan a tapi, ni Zacarias, nagsiddaawan dagiti isuamin, insuratna: ‘Ti naganna isu ti Juan.’

Iti dayta ti panagsao ni Zacarias simimilagro a naisubli kenkuana. Malagipyo pay a napukawna ti abilidadna nga agsao idi a dina pinati ti impakaammo ti anghel a ni Elisabet maaddaanto iti anak. Bueno, idi nagsao ni Zacarias amin dagiti agnanaed iti sangakaarrubaan nagsiddaawda ket kunkunada iti bagbagida: ‘Anianto a talaga ti pagbalinanto daytoy nga ubing?’

Itan napnuanen ti nasantuan nga espiritu ni Zacarias, ket impadtona ti maipapan iti anakna: ‘Isunto ti maawagan mammadto ti Kangatuan, ket isunto ti umun-una ngem ni Jehova ket isaganana ti dalan nga agpaay kenkuana. Ibagananto kadagiti tattao a maisalakanda babaen ti pannakapakawan ti basbasolda.’

Iti daytoy metten a panawen ni Maria, a kaawatan ken maysa pay laeng a balasang, nakagtengen idiay Nasaret. Ania ti mapasamakto met kenkuana inton nalawag nga isut’ masikogen? Lucas 1:56-80; Levitico 12:2, 3.

◆ Mano ti inaunaan ni Juan ken Jesus?

◆ Ania a bambanag ti napasamak idi a ni Juan ket walo nga aldawnan?

◆ Ania a trabaho ti naipadto nga aramiden ni Juan?