Programa a Mangparang-ay iti Abilidad nga Agpalawag ken Mangisuro
AGTUTUBOKA man wenno nataengan, lalaki wenno babai, matulongannaka daytoy a kurso a mangyebkas iti kapanunotam a mas epektibo ken agbalin nga ad-adda a kualipikado a mannursuro iti Sao ti Dios.
Iyurnos ti manangaywan iti eskuelaan dagiti maituding a paset dagidiay nagpasalista iti Teokratiko nga Eskuelaan ti Panagministro. Iti sumaganad a tallo a panid, makitam ti bukodmo a porma a pangbalakadan. Dagiti numero sakbay dagiti nadumaduma a punto, katupagda dagiti adalen nga agparang kadagiti sumaruno a panid. Kadagita nga adalen, mailawlawag no ania ti nairaman iti panangsursuro kadagitoy nga aspeto ti panagpalawag ken panangisuro ken no apay a napateg ti tunggal maysa. Adda met dagiti makatulong a singasing no kasano a maibanagmo ti nairekomenda.
Dagiti nakoloran a benneg iti porma a pangbalakadan ipasimudaagna no aniada a punto ti agaplikar kadagiti paset a nainaig iti (1) panagbasa iti sanguanan dagiti agdengdengngeg, (2) demostrasion ti dua wenno ad-adu pay a tao, wenno (3) diskurso iti kongregasion. Ikeddeng ti manangaywan ti eskuelaan no ania a punto ti asikasuem. Nasaysayaat no maysa laeng a punto ti pangipamaysaam tunggal maikkanka iti paset. Magunggonaanka no aramidem dagiti ensayo a nairekomenda iti ngudo ti tunggal naituding nga adalen. No mapaneknekam a naballigi ti panangipakatmo iti balakad a nailanad iti naituding nga adalen, sabalinton a punto ti ituding kenka ti para balakad.
No demostrasion ti pasetmo, masapulmo ti eksena (setting). Adda listaan dagiti eksena iti panid 82, ngem saan laeng a dagiti nailista iti dayta ti mabalinmo nga usaren. Mabalin nga irekomenda ti para balakad a padasem ti sabali nga eksena tapno umadu ti kapadasam, wenno palubosannaka nga agpili iti kayatmo.
Makatulong unay iti panagprogresom no basaem daytoy a libro ken aramidem dagiti naisingasing nga ensayo uray no awan ti isagsaganam a pasetmo iti eskuelaan. Nalabit maysa nga adalen wenno ad-adu pay ti masaklawmo kada lawas.
Uray no kasano ti kabayagmon a makiramraman iti eskuelaan wenno makipaspaset iti tay-ak ti ministerio, adda latta mabalinmo a parang-ayen. Sapay koma ta magunggonaanka a naan-anay iti edukasion nga ipapaay ti Teokratiko nga Eskuelaan ti Panagministro.