Panangusar iti Mikropono

ADU a tiempo ti busbusbosen dagiti Kristiano a kakabsattayo ken adu a sakripisio ti ar-aramidenda tapno makatabunoda kadagiti Nakristianuan a gimong. Tapno magunggonaanda, masapul a mangngegda a naimbag ti maipalpalawag.

Idi tiempo ti nagkauna nga Israel, awan ti de-koriente nga alikamen a pangpapigsa iti timek. Idi nagpalawag ni Moises iti nasion ti Israel iti Tanap ti Moab sakbay a simrekda iti Naikari a Daga, kasano a nangngeg dagiti amin nga adda sadiay, nga agdagup iti minilion? Nalabit nagusar ni Moises kadagiti lallaki a para yallatiw iti sasaona, nga apagisu ti kaaddayo ti nagpuestuanda, ket inulitda nga imbaga iti intero a pakarso dagiti sinao ni Moises. (Deut. 1:1; 31:1) Di nagbayag kalpasan nga inrugi dagiti Israelita a sakupen ti daga a lauden ti Jordan, inummong ni Josue ti nasion iti sanguanan ti Bantay Gerizim ken Bantay Ebal, a nalabit nagpuesto dagiti Levita iti tanap iti nagbaetan dagita a bantay. Nangngeg ken sinungbatan ti amin nga umili dagiti naidatag kadakuada a bendision ken lunod nga aggapu iti Dios. (Jos. 8:33-35) Mabalin nga adda met idi dagiti tattao a nausar a para yallatiw iti sasao, ngem di pagduaduaan a nakatulong met ti ekselente nga akostika daydi a disso, kayatna a sawen, agallangogan ti timek sadiay.

Agarup 1,500 a tawen kalpasanna, idi a “maysa a dakkel unay a bunggoy ti naguurnong” iti Baybay ti Galilea tapno denggenda ni Jesus, limmugan ni Jesus iti barangay, immadayo manipud iti takdang, sa nagtugaw ket pinalawaganna dagiti tattao. (Mar. 4:1, 2) Apay a nagpuesto ni Jesus iti barangay idi nagpalawag? Agsipud ta nalawag a mangngeg ti timek no addaka iti nalinak a baybay.

Agingga idi rugrugi ti maika-20 a siglo, ti kapigsa ken kalawag ti boses ti agpalawag ti masansan a mangikeddeng no kasano kaadu kadagiti naitallaong ti makangngeg iti ibagbagana. Nupay kasta, idi dekada 1920, rinugian dagiti adipen ni Jehova nga usaren kadagiti kombensionda ti de-koriente nga alikamen a mangpapigsa iti timek.

Alikamen a Mangpapigsa iti Timek. Napigpigsa nga amang ti timek ti agpalawag ken mamantener latta ti kualidad ken tono ti bosesna no mausar ti kasta nga alikamen. Saan a masapul nga ipukkawna ti agsao. Saan met nga agpakarigat dagiti agim-imdeng a mangtiliw iti maipalpalawag. Imbes ketdi, maipamaysada ti dumngeg iti mensahe.

Adun ti naaramid tapno masigurado nga adda dagiti nasayaat nga alikamen a mangpapigsa iti timek a mausar kadagiti kombension ken asamblea dagiti Saksi ni Jehova. Kanayonanna, adu dagiti Kingdom Hall nga agus-usar kadagiti alikamen a mangpapigsa iti timek dagiti agdiskurso, mangidaulo kadagiti gimong, wenno agbasa iti plataporma. Addaan met dagiti dadduma a kongregasion kadagiti mikropono nga usaren dagiti agkomento kadagiti gimong. No adda kasta nga alikamen iti kongregasionyo, sursuruem ti umiso a panangusar iti dayta.

Sumagmamano a Napateg a Giya. Tapno umiso ti panangusarmo iti mikropono, laglagipem dagiti sumaganad a punto: (1) Kadawyanna, agarup uppat agingga iti innem a pulgada koma ti kaadayo ti mikropono manipud iti ngiwatmo. No asideg unay ti mikropono, mabalin nga agbanarbar dagiti saom. No adayo unay, saan a nalawag ti timekmo. (2) Masapul nga adda ti mikropono iti sangom, saan nga iti sikigan. No nakaturong ti ulom iti sikigan, saka la agsao no nakasangokan iti mikropono. (3) Ipigpigsam bassit ti timekmo ken napuerpuersa ngem no makisarsaritaka. Ngem saan a masapul nga ipukkawmo ti agsao. Kabaelan ti alikamen a pangpapigsa iti timek nga idanon ti bosesmo kadagiti kaadaywan nga agdengdengngeg. (4) No masapul nga agsig-amka, makauy-uyek wenno makababaenka, siguraduem nga iyadayo ti ulom iti mikropono.

No Agdiskursoka. No addakan iti podium, masansan nga adda kabsat a mangisimpa iti mikropono. Agtakderka a natural, a kitkitaem dagiti agdengdengngeg bayat nga isimsimpana ti mikropono. Iparabawmo iti podium dagiti notam, ket siguraduem a saan a lingdan ti mikropono no taldiapam dagita.

No irugimon ti agsao, imdengam ti timekmo nga aggapu iti loudspeaker. Napigsa unay aya, wenno agbigsot ti panagsaom? Mabalin a kasapulan nga agsanudka iti maysa wenno dua a pulgada. No taldiapam dagiti notam, laglagipem a saka la agsao ken agbasa no nakabatog ti ngiwatmo iti mikropono wenno nangatngato bassit, saan a nababbaba.

No Agbasaka iti Plataporma. Kasayaatan no iggamam ti Bibliam wenno aniaman a publikasion tapno nakaturong ti rupam kadagiti agdengdengngeg. Yantangay mabalin a direkta nga adda iti sanguanam ti mikropono, ilisim bassit ti material a basbasaem. Kayat a sawen daytoy a saan nga eksakto a nakabatog ti ulom iti mikropono. Iti kasta inton agbasaka, direkta a maiturong ti timekmo iti mikropono.

Agtakder ken agbasa iti sango ti mikropono ti kaaduan a kakabsat a para basa iti Panagadal iti Pagwanawanan. Nawaywayada nga aganges ken napuerpuersa ti panagbasada no nakatakderda. Laglagipem a ti pannakaibasa dagiti parapo ket napateg a paset ti gimong. Agpannuray unay ti magunggona dagiti agdengdengngeg iti pannakangngegda iti material a maibasbasa.

No Agkomentoka Kadagiti Gimong. No agus-usar ti kongregasionyo kadagiti mikropono para kadagiti agkomento, laglagipem a masapul latta a nalawag ti panagsaom ken umdas ti kapigsa ti timekmo. No agkomentoka, iggamam ti maadal a publikasion wenno ti Bibliam. Iti kasta, makitam a naimbag ti publikasion bayat nga agsasaoka iti mikropono.

Iti dadduma a kongregasion, adda dagiti kakabsat a lallaki a madutokan a mangyawat iti mikropono kadagidiay maawagan nga agkomento. No kasta ti kasasaad iti kongregasionyo, pagtalinaedem a nakangato ti imam no maawaganka, tapno nalaka a makita ti kabsat a para iyawat iti mikropono no sadino ti tugawmo ket maasitgannaka a dagus. No ti mikropono ket daydiay iggaman a mismo ti agkomento, sidadaanka koma a mangawat iti dayta. Saanmo a rugian ti agkomento no di pay nakasagana ti mikropono. No nalpaskan a nagkomento, isublim a dagus ti mikropono.

No Agpasetka iti Demostrasion. No agusarka iti mikropono bayat ti demostrasion, masapul a panunotem a nasaksakbay no ania ti aramidem. No adda nakaisaadan ti mikropono, nawaya ti dua nga imam a mangukrad iti Biblia ken mangiggem kadagiti notam. Nawaywayaka nga aggaraw no ti mikropono ket daydiay sika a mismo ti mangiggem, ngem mabalin nga ipaiggemmo dayta iti kaduam. Iti kasta, nawaya dagiti imam a mangukag iti Biblia. Masapul nga agensayokayo iti kaduam tapno ammona no kasano ti umiso a panangiggem iti mikropono. Laglagipem met a no addaka iti plataporma, dimo koma tallikudan dagiti agdengdengngeg, nangruna no agsasaoka.

Kadagiti demostrasion iti Gimong ti Serbisio, mabalin nga adu dagiti agpaset, ken agduduma ti posisionda no addada iti plataporma. No kasta, mabalin a kasapulan ti sumagmamano a mikropono. Nasaksakbay koma a maisimpa dagitoy wenno mayawat kadagiti agpaset no mapandan iti plataporma. Nasken ti nasakbay a panagplano tapno masigurado nga adda dagiti mikropono iti umiso a lugar ken iti umiso a tiempo. No maensayo dagiti demostrasion sakbay a maiparangda, masursuro dagiti agpaset no kasano ti umiso a panangusar iti mikropono. No saan a mabalin ti agensayo iti plataporma, nasayaat no adda banag nga iggaman dagiti agpaset a kas iti kadakkel ti mikropono tapno masanayda ti umiso a panangiggem iti mikropono. Kalpasan ti demostrasion, in-inayaden koma dagiti nagpaset nga isubli dagiti mikropono, nga aluadanda a dida masikkarud ti kable dagiti dadduma a mikropono no bumabadan iti plataporma.

Ti panangasikasotayo iti panangusar iti mikropono ket direkta a nainaig iti maysa kadagiti kangrunaan a panggep dagiti gimongtayo, nga isu ti pannakagunggona ti tunggal maysa babaen ti panangadaltayo iti Sao ti Dios. (Heb. 10:24, 25) No sursuruentayo ti umiso a panangusar iti mikropono, makatulongtayo a mismo a mangibanag iti dayta a napateg a panggep.