Ania ti Sekreto ti Naragsak a Pamilia?

TI KUNA TI BIBLIA

“Naragragsak ketdi dagidiay dumdumngeg iti sao ti Dios ken mangtungtungpal iti dayta!”​—Lucas 11:28, Baro a Lubong a Patarus.

TI MAIPAAYNA KENKA NO PATIEM DAYTA

Mabirokam ti pudpudno nga ayat.​—Efeso 5:28, 29.

Pudpudno a raemendaka.​—Efeso 5:33.

Natalged ti riknam.​—Marcos 10:6-9.

MAPAGTALKANTAYO KADI TI KUNA TI BIBLIA?

Wen, gapu iti dua a rason:

• Ti Dios ti Nangirugi iti pamilia. Kuna ti Biblia a ni Jehova a Dios ti “nakautangan ti amin a pamilia . . . iti naganda.” (Efeso 3:14, 15) Iti sabali a pannao, adda ti pamilia gapu ta ni Jehova ti nangirugi iti dayta. Apay a napateg dayta?

  Panunotem: No makaramanka iti naimas a putahe ket kayatmo a maammuan dagiti ramen ken rekadona, siasino ti pagdamagam? Siempre, daydiay nagluto.

  Kasta met, no kayattayo a maammuan dagiti ramen ti naragsak a pamilia, ammuentayo dagita ken Jehova ta isu ti Nangirugi iti urnos ti pamilia.​—Genesis 2:18-24.

• Maseknan ti Dios kadakayo. Pagsayaatan dagiti pamilia no agpabalakadda ken Jehova babaen ti Saona. Apay? Gapu “ta ipatpategnakayo.” (1 Pedro 5:6, 7) Sipapanunot ni Jehova iti pagimbaganyo—ket kanayon a pagsayaatantayo dagiti balakadna!​—Proverbio 3:5, 6; Isaias 48:17, 18.