ADRAMELEC

1. Anak ni Ari Senaquerib ti Asiria. Ni Adramelec ken ti kabsatna a ni Sarezer pinapatayda ti amada bayat nga agrukruknoy iti balay ti diosna a ni Nisroc idiay Nineve. Kalpasanna, nagtalawda a napan iti daga ti Ararat, nalabit iti ayan ti kadaanan nga Armenia iti kabambantayan a rehion iti laud ti pagaammo ita a Baybay Caspiano. (2Ar 19:35-37; Isa 37:36-38) Iti kitikit ni Esar-haddon, sabali pay nga anak ni Senaquerib, naisalaysay nga isu nakirupak kas suno ni amana ket naparmekna ti buybuyot dagiti nangpapatay ken amana idiay Hanigalbat iti dayta a rehion.

2. Maysa a dios a dinaydayaw dagiti Sefarvita a karaman kadagiti naparmek nga il-ili nga inyeg ti ari ti Asiria iti teritoria ti Samaria kalpasan ti panangidestierona kadagiti Israelita manipud sangapulo-tribu a pagarian. Da Adramelec ken Anammelec ti nangidatonan dagiti Sefarvita iti annakda idi insakripisioda dagita iti apuy.​—2Ar 17:22-24, 31, 33.