AMFIPOLIS

[Iti Likmut ti Siudad].

Maysa a siudad ti Macedonia, agarup 5 km (3 mi) manipud iti Baybay Aegeano ken iti kuala ti Eion. Limmasat ditoy ni Pablo iti maikadua a panagdaliasatna kas misionero. (Ara 17:1) Naibangon dayta iti maysa a turod a ti tallo a sikiganna (amianan, laud, ken abagatan) ket pinalikmutan ti nagsikko a karayan Strymon, nga awan duadua a dayta a kasasaadna ti nakaalaan ti nagan ti siudad. Adda ti Amfipolis iti agarup 50 km (30 mi) iti laud nga abagatan-a-laud ti Filipos. Nagpateg a lugar ti ayanna ken nagsayaat a lugar ti negosio agsipud ta adda iti agdindinamag a kangrunaan a kalsada ti Roma a Via Egnatia ken gapu ta saklawenna ti rangtay iti karayan Strymon. Idi damo, naibangon dayta kas maysa a kolonia ti Atenas idi maikalima a siglo K.K.P., ket idi agangay nagbalin a sakup dagiti taga Macedonia. Kalpasanna, inturayan ti Roma ket pinagbalinna a siwayawaya a siudad ken kabesera ti umuna a distrito ti Macedonia. Dagiti nakabakab a rebba dayta ket masarakan iti ruar laeng ti agdama a purok a napanaganan met iti Amfipolis (Amfipoli).