BEER-LAHAI-ROI

[Bubon Daydiay Sibibiag a Makakitkita Kaniak].

Sinurot ni Agar, ti Egipcio nga adipen a babai ni Sarai, ti “dalan nga agturong iti Sur” a lumasat iti Negeb a sumalog iti Egipto idi taltalawanna ti pungtot ti apona-a-babai. Nupay kasta, idi nakadanon iti maysa nga ubbog (Heb., ʽaʹyin), pinaregta ti maysa nga anghel, nabilin nga agsubli iti apona-a-babai, ken naibaga kenkuana ti pannakayanak ni Ismael ken ti masakbayanna (a ti naganna kaipapananna ti “Agdengdengngeg (Agim-imdeng) ti Dios”). Gapuna, ti bubon sadiay naawagan iti “Beer-lahai-roi,” ta kinuna ni Agar maipapan ken Jehova, “Maysaka a Dios ti panagkita.”​—Ge 16:7-14.

Kalpasan ti sumagmamano a tiempo, idi dimteng ni Isaac manipud iti “dalan nga agturong idiay Beer-lahai-roi” iti Negeb nakitana ti nakakamelio a sangkakuyogan a managbiahe a mangmangyeg iti agbalin a nobiana, ni Rebecca. (Ge 24:62, 63) Kalpasan ti ipapatay ni Abraham, nagnaed ni Isaac iti “asideg ti Beer-lahai-roi.”​—Ge 25:11.

Naikuna a ti Beer-lahai-roi ket adda iti “nagbaetan ti Cades ken Bered.” (Ge 16:14) Kunaen ti Bedouin a tradision nga adda dayta iti ʽAin Muweilih, agarup 19 km (12 mi) iti amianan a laud ti ʽAin Qedeis (ti posible a disso ti Cades-barnea). Ngem saan nga ammo ti ayan ti Bered agsipud ta awan ti nalawag a pannakadakamat ti nagsaadanna.