BESOR, NAAPRES A GINGET TI

Naapres a ginget a nadakamat laeng mainaig iti panangkamat ni David kadagiti manangrubbuot nga Amalekita a nangkautibo ken nangpuor iti siudad ti Siclag. (1Sm 30:1, 10, 21) Nabatad a kalpasan dayta, nagpaabagatan dagiti manangrubbuot nga agturong iti pagtaenganda a teritoria iti Negeb, ngem saan a naibaga ti apag-isu a turong ti panagdaliasatda. Gapuna, ti naapres a ginget ti Besor, ti disso a nagsardengan ti 200 kadagiti buyot ni David gapu iti pannakapaksuyda, saan a matukoy buyogen ti kinasigurado. Nupay kasta, kaaduanna a maibilbilang a nalabit mainaig dayta iti Wadi Ghazzeh (Nahal Besor), maysa a nalawa a naapres a ginget iti abagatan a laud ti Siclag nga agayus iti Mediteraneo iti baba ti Gaza.

Kalpasan ti panagballigi ni David maibusor kadagiti Amalekita, inranudna dagiti samsam kadagidiay mannakigubatna a nagtalinaed iti ginget a nangbantay iti gargaret. Daytoy a tignayna nabatad a naibatay iti prinsipio a nasaksakbay nga imbaga ni Jehova iti Numeros 31:27, kalpasan ti panagballigi dagiti Israelita maibusor iti Midian. Kalpasan dayta, daytoy nga aramid pinagtalinaed ni David a “naipasdek kas alagaden ken hudisial a pangngeddeng maipaay iti Israel.”​—1Sm 30:21-25.