DIMON

Disso a nadakamat iti insawang ni Isaias a pammakdaar maipapan iti pannakadadael a maipagteng iti Moab; gapu iti pannakagudas dagiti Moabita, ti dandanum ti Dimon “napnoda iti dara.”​—Isa 15:9.

Ibilang ti sumagmamano a komentarista a ti Dimon ket sabali pay a porma ti Dibon (nadakamat iti Isa 15 bersikulo 2 ti padto), a ti Dimon nausar iti pamay-an a mangpataud iti umas-asping nga uni ti pannakaibalikas ti Hebreo a sao maipaay iti “dara” (dam), ngarud “Dimon . . . napno iti dam.” Maitunos iti kasta a panangmatmat, kadagiti Dead Sea Scroll mabasa ti “Dibon” imbes a “Dimon” ditoy Isa 15 bersikulo 9, ken ti sasao ni Jerome nga idi kaaldawanna (a. 347-420 K.P.) napagsinsinnukat a naaramat dagitoy dua a nagan.

Nupay kasta, ibilang ti dadduma a saan a posible a maiparang ti nagan a Dibon iti dua a nagduma a pamay-an iti las-ud daytoy a nakaab-ababa a pammakdaar, ken mapaliiwda met nga awan sabalin a namindua a nadakamat iti pammakdaar. Ipatuldoda pay a ti Dibon saan a nagsaad iti abay ti aniaman a dakkel a “dandanum,” yantangay pangadaywen dayta manipud iti kaasitgan a wadi, ti Arnon. Ngarud kunaenda a ti Dimon mabalin a panangbalbaliw ti eskriba iti nagan a Madmen, a nadakamat iti panangkondenar ni Jeremias iti Moab (Jer 48:2), ken kadawyanna a maikunkuna nga isu ti Dimna, agarup 4 km (2.5 mi) iti laud nga amianan-a-laud ti Rabbath-Moab, iti kangato a matannawaganna ti dandanum ti ʽAin el-Megheisil iti abagatan a daya.

Dagitoy a panangmatmat ket agpadpada a panangipapan laeng, a ti naud-udi a nadakamat ad-adda nga umataday yantangay nainaig dayta iti maysa a disso nga asideg iti dandanum, a dayta ti kasla ipasimudaag ti konteksto.