DIOS TI NAIMBAG A GASAT, DIOS TI KEDDENG

Dagiti apostata a Judio idi tiempo ni Isaias nakiramanda iti panagdaydayaw “iti dios ti Naimbag a Gasat” (Heb., gadh) ken “iti dios ti Keddeng” (Heb., meniʹ). Dagiti managdaydayaw kadagitoy a didiosen nangidasarda iti lamisaan ti taraon ken inumen iti sangoda. Kinuna ni Jehova iti kakasta a managdaydayaw nga ikeddengna ida iti pannakagudas babaen iti kampilan.​—Isa 65:11, 12.

Masansan a nangisagana dagiti Asirio ken dagiti taga Babilonia iti taraon ken inumen maipaay kadagiti diosda. Dagiti umili idiay Haran nagkarkarida ken nangin-inanamada nga awaten ida ti “Apo ti Gasat.” Iti komentona maipapan iti Isaias 65:11, insurat ni Jerome a “kadagiti amin a siudad, ken nangnangruna idiay Egipto ken Alejandria, adda kadaanan nga idolatroso a kaugalian, nga iti maudi nga aldaw ti maudi a bulan ti tawenda mangidasarda iti lamisaan a napno iti nadumaduma a kita ti taraon, ken iti kopa a nagamporan iti nasam-it nga arak, a mangipasigurado iti naimbag a gasat iti kinabunga iti napalabas wenno iti um-umay a tawen.”​—Corpus Christianorum, Series Latina, LXXIII A, S. Hieronymi presbyteri opera, Pars 1, 2A, Turnhout, Belgium, 1963, p. 754.