Posible Kadi ti Napaypayso a Salaknib?

KINUNA naminsan ni mannalaysay a Ralph Waldo Emerson: “Dagiti narabaw panagpampanunotna a tattao mamatida iti gasat . . . Dagiti natakneng a tattao mamatida a tunggal pasamak adda gapuna.” Wen, ti tao a mamati iti bileg dagiti anib ken anting-anting paiturayanna ti biagna kadagiti di makita a puersa. Iwaksina ti nasin-aw a panagpampanunot ken tumulok iti minamaag, inaanito a panagamak.

Nupay kasta, kabaelan ti Biblia a ruk-atan ti maysa a tao iti kakasta a panagamak. Ipakitana nga awan maitulong, awan pannakabalin dagiti anib ken anting-anting. Kasano? Bueno, sigun iti The New Encyclopædia Britannica, “ti birtud dagiti anib maipagarup nga agtaud iti pannakainaig dagitoy [malaksid pay kadagiti dadduma a banag] kadagiti puersa ti nakaparsuaan.” Dagitoy a puersa nalabit isuda ‘dagiti espiritu dagiti natay’ wenno ‘ti pannakabalin ni gasat.’ Ngem nalawag nga ipakita ti Biblia a dagiti natay “dida ammo ti aniaman.” (Eclesiastes 9:5) Ngarud, awan dagiti espiritu dagiti natay a makatulong wenno mangdangran kadagiti sibibiag; ken awan met ti aniaman a di makita a puersa a kas iti gasat nga agtignay a maipaay kadakayo.

Idi panawen ti Biblia, kinondenar ti Dios dagidiay timmallikud kenkuana, dagidiay nanglipat iti nasantuan a bantayna, “dagidiay nangsagana iti maysa a lamisaan a maipaay iti dios ti Naimbag a Gasat ken dagidiay mangpunno iti naggampor nga arak a maipaay iti dios ti Signo.” Imbes a masalaknibanda, naikeddeng a madadael dagidiay a manangitandudo iti gasat. “Isignokayto iti kampilan,” kuna ni Jehova a Dios.​—Isaias 65:11, 12.

Gapu iti panagsalamangkana, nagtalek met ti nagkauna a nasion ti Babilonia iti pannalaknib dagiti misterioso a pannakabalin. Ngem sinagaba latta ti Babilonia ti didigra. “Itultuloymo ti kinabaglanmo ken dagiti makarimon a panagan-anitom,” inkarit ni mammadto Isaias. “Bareng no makagun-odka iti tulong kadakuada . . . Ngem saan! awan bilegmo uray no adu ti pangallilawmo.” (Isaias 47:12, 13, The New English Bible) Dimteng ti tiempo a naikisap a namimpinsan dayta a nasion. Awan serserbina ti panagtalek iti okulto. Kasta met, pulos a dinakay matulongan wenno masalakniban ti anib, anting-anting, wenno galinggaling.

Maysa a Kita ti Idolatria

Nupay kasta, mabalin a panunoten dagiti dadduma nga awan pagdaksanna ti panangitugot iti kristal, saka ti koneho, wenno relihiuso a medalia. Saan kadi a dagitoy ket di makadangran a babassit a bambanag laeng? Saan sigun iti Biblia. Kunaenna a makadangran dagiti alikamen iti okulto.

Maysa a kita ti idolatria ti panagusar kadagiti anib​—banag a nalawag a kondenaren ti Sao ti Dios. (Exodo 20:4, 5) Pudno, mabalin a pagarupen ti maysa a tao a saanna a direkta a pagdaydayawan ti maysa nga anib wenno galinggaling. Ngem saan kadi a ti panangikut laeng iti kasta a banag iparangarangna ti panagraem, panagdaydayaw kadagiti di makita a pannakabalin ti okulto? Ken saan kadi a masansan a maiturong kadagiti anting-anting a mismo dagiti tignay a mangipakita iti panagdaydayaw (kas iti panangagep)? Ngem ti Biblia, idiay 1 Juan 5:21, bagbagaanna dagiti Kristiano: “Igagayo dagiti bagbagiyo kadagiti didiosen.” Saan kadi a ramanen daytoy dagiti bambanag a maibilang nga anting-anting wenno anib?

Ti Silo ti Okulto

Gapu iti panagusarda kadagiti anib, adu met ti nasiluan iti okulto. Pudno, dagiti dadduma mangitugotda iti kristal wenno iti pauli agsipud ta isut’ kannawidanda, saan a gapu ta mamatida iti dayta. Ngem no kasano a mabalin a maakaran iti AIDS ti maysa a tao a makial-alembong iti maysa a balangkantis, kasta met a mabalin a dakes ti ibunga ti pannakigamulo iti okulto. Adda naimbag a rason no apay nga imparit ti Dios kadagiti Israelita ti panagsalamangka, panagbuyon, ken panagipadles. “Makarimon ken Jehova ti siasinoman a mangaramid kadagitoy,” mamallaag ti Biblia.​—Deuteronomio 18:10-14.

Apay a kasta unay ti kinainget daytoy a bilin? Ngamin, ni Satanas a Diablo ken dagiti demoniona isuda dagiti di makita a puersa nga adda iti likudan dagiti kasta nga aramid, a saan ket a dagiti espiritu dagiti natay wenno ti pannakabalin ni gasat.a Ket ti panagusar kadagiti anib direkta a naikawing iti panagdaydayaw kadagiti demonio. Kastoy ti kuna ti Vine’s Expository Dictionary of Old and New Testament Words: “Iti panagbagel, ti panagusar kadagiti droga, nakapsut man wenno napigsa, kadawyan a mapakuyogan iti orasion ken mangawis kadagiti pannakabalin ti okulto, iti tulong dagiti nadumaduma nga anting-anting, anib, kdpy.”

Gapuna, ti agik-ikut iti anting-anting makigamgamulo iti espiritismo. Ipaspasidongna ti bagina iti dakes nga impluensia ken panangtengngel “ti dios daytoy sistema dagiti bambanag”​—ni Satanas a Diablo. (2 Corinto 4:4) Ngarud, adda naimbag a rason nga imbilin ti Biblia nga idiantay ti amin a kita ti espiritismo.​—Galacia 5:19-21.

Iruruk-at iti An-anito

Nupay kasta, kuna ti The World Book Encyclopedia: “Nalabit nga adda latta paset dagiti an-anito iti biag agingga a di maiwaksi ti panagbuteng dagiti tao iti padada a tao ken dida masinunuo ti masakbayan.” Ngem adut’ matultulongan dagiti Saksi ni Jehova a lumapsut kadagiti makadangran nga an-anito. Malagip ti maysa a babai a taga Sud Africa: “Rirriribukendak idi dagiti dakes nga espiritu, isut’ gapuna a napunno ti balayko iti muti tapno masalaknibanak maibusor kadakuada.” Isut’ tinulongan dagiti Saksi ni Jehova a makabigbig kadagiti peggad nga iyeg ti pannakiraman iti okulto. Aniat’ inaramidna? “Rinugiak nga imbelleng amin nga alikamek nga adda pakainaiganna iti demonismo,” kunana. “Kimmaradkadak. Indedikarko ti biagko ken Jehova tapno agserbiak kenkuana ken nagpabautisarak.” Naruk-atanen iti an-anito ken espiritismo.

Usigenyo met ti kapadasan ti maysa nga arbulario a taga-Nigeria a nagusar iti espiritismo iti panangagasna. Tunggal sumarungkar dagiti Saksi ni Jehova, masansan a butbutngen ken ilunodna ida tapno mapilitanda a pumanaw iti pagtaenganna. Iti naminsan, nangaramid pay ketdi iti naisangsangayan a pauli, inorasionanna, sana impugso iti rupa ti maysa a Saksi! “Matayka kalpasan ti pito nga aldaw!” inyikkisna. Nagsubli ti Saksi kalpasan ti pito nga aldaw. Nagdardaras ti arbulario a rimmuar iti balayna tapno inna kitaen. Impagarupna a nakakita iti al-alia! Gapu ta naibutaktak nga awan serserbi ti salamangkana, immannugot nga agadal iti Biblia ket nagangayanna nagbalin a maysa a Saksi.

Mabalinyo met ti rumuk-at iti kawar ti buteng ken an-anito. Pudno, mabalin a saan a nalaka daytoy. Nalabit dimmakkelkayo iti maysa a lugar a kadawyan ti panagusar kadagiti anib ken anting-anting. Naipasango iti kasta a karit dagiti Kristiano iti nagkauna nga Efeso. Nagnaedda iti maysa a lugar a napalalo ti pannakaigamerna iti espiritismo. Aniat’ inaramidda idi naammuanda ti kinapudno iti Sao ti Dios? Kunaen ti Biblia: “Adu kadagidi nagan-anito ti nangurnong kadagiti libroda ket pinuoranda ida iti sanguananda amin. Ket pininsarda ti pategda ket ti dagupna limapulo ribo a bagi ti pirak.”​—Aramid 19:19.

Pananggun-od iti Pannalaknib ti Dios

No idianyo ti amin a ramramit ti okulto, mabaybay-ankay kadi nga awanan iti salaknib? Maisupadi ketdi, “ti Dios isu ti kamang ken bilegtayo, sisisibay unay a saranay iti panagdukot.” (Salmo 46:1) Maiparangarangto a naan-anay ti pannalaknib ti Dios inton dadaelenna daytoy dakes a sistema dagiti bambanag. “Ammo ni Jehova nga isalakan dagiti tattao nga addaan nadiosan a debosion manipud iti pakasuotanda, ngem aywananna dagiti managdakdakes a maipaay iti pannakadusa iti aldaw ti pannakaukom.”​—2 Pedro 2:9; idiligyo ti Salmo 37:40.

Kabayatanna, ‘ti panawen ken di mapakpakadaan a pasamak dumteng kadatayo amin.’ (Eclesiastes 9:11) Saan nga inkari ti Dios a masalakniban dagiti adipenna kadagiti pakarigatan wenno igagana ida iti amin a pakadangran. Nupay kasta, inkarina a salaknibanna ti espiritualidadtayo ken ti relasiontayo kenkuana. (Salmo 91:1-9) Kasano? Babaen ti panangtedna kadatayo kadagiti linteg ken prinsipiona a maipaay iti pagimbagantayo ken mangsalaknib kadatayo kadagiti dakes nga impluensia ni Satanas. (Isaias 48:17) No ammuentayo dagiti daldalan ni Jehova, ‘ti kinasaririt saluadannatayto, ti pannakaawat igaganatayto’​—kas pangarigan, kadagiti awan serserbina wenno makadangran nga aramid.​—Proverbio 2:11.

Ti maysa pay a wagas a panangsalaknib ti Dios kadatayo ket babaen ti panangipaayna iti “bileg a napigpigsa ngem iti gagangay” kadagiti kanito ti pakasuotan. (2 Corinto 4:7) Ket no pagpeggaden dagiti kasasaad ti maysa a Kristiano, ipaayna “ti talna ti Dios a daeganna ti amin a pannakaawat” a mangsaluad iti puso ken panunot. (Filipos 4:7) Wen, makabalan ti Kristiano nga ‘agtakder a sititibker a maibusor kadagiti pangallilaw ti Diablo.’​—Efeso 6:11-13.

Kasanoyo a magun-odan ti kasta a pannalaknib? Rugianyo babaen ti pananggun-od iti pannakaammo maipapan ken Jehova ken ni Jesu-Kristo nga Anakna. (Juan 17:3) Dakkel ti maitulong dagiti Saksi ni Jehova kadakayo iti daytoy a banag. No sukayenyo ti nabara a pannakirelasion ken Jehova, mapasaranyo ti naayat a pannalaknibna. Kastoy ti kuna ti Dios, kas mabasatayo idiay Salmo 91:14: “Gapu ta insaadna ti ayatna kaniak, ngarud isu ilasatkonto. Salaknibakto agsipud ta inammona ti naganko.”

Wen, no matalekkayo kenkuana, paraburannakayto ti Dios iti kamaudiananna iti biag nga agnanayon iti mapasungad a baro a lubong. Maipapan kadagidiay agbiag iti dayta a tiempo, ipanamnama ni Jehova: “Awanto ti mangpabuteng kadakuada; ta ti ngiwat ni Jehova dagiti buybuyot sinaona.” (Mikias 4:4) Awanton ti sakit ken ipapatay. (Apocalipsis 21:4) Nupay kasta, uray ita, matagiragsakyo ti kinatalged​—no sukayenyo ti nasinged a pannakirelasion ken Jehova. Kas iti salmista, maikunayonto: “Ti tulongko aggapu ken Jehova, a Nangaramid iti langit ken daga.”​—Salmo 121:2.

[Footnote]

[Ladawan iti panid 6]

Dinadael dagiti Kristiano idiay Efeso dagiti amin nga adda pakainaiganna iti okultismo

[Ladawan iti panid 7]

Iti sidong ti Pagarian ti Dios, awanton ti buteng