HAZAR-SUSA

[Paraangan (Purok) ti Kabaian a Kabalio].

Naipasngat a siudad dagiti Simeonita iti makin-abagatan a paset ti Juda (Jos 19:1, 2, 5), naawagan met iti Hazar-susim. (1Cr 4:31) Iti umasping a listaan dagiti siudad a sigud a naituding iti Juda, nailanad ti “Sansana” imbes a Hazar-susa. (Jos 15:21, 31) Ibilang ti sumagmamano a nagduma dagitoy a lugar, a kunaenda nga adda ti Sansana iti amianan nga amianan-a-daya ti Beer-seba ket ti Hazar-susa iti agarup 26 km (16 mi) iti laud ti Beer-seba idiay Sbalat Abu Susein, iti asideg ti Tantanap ti Filistia. Nupay kasta, ibilang ti adu nga eskolar a nalabit ti Hazar-susa ket segundario laeng a nagan ti Sansana, a ti kaipapanan ti Hazar-susa ipasimudaagna ti pagaammo nga usar dayta a lugar. No isu met laeng ti Sansana, ti Hazar-susa mabalin a kunaen nga isu ti Khirbet esh-Shamsaniyat iti amianan nga amianan-a-daya ti Beer-seba, asideg laeng iti naikuna nga ayan ti Madmanna (nalabit ti Bet-marcabot), nga immun-una a nadakamat (sakbay ti Hazar-susa, Hazar-susim, wenno Sansana) kadagiti nausig a teksto.​—Kitaenyo ti BET-MARCABOT.