BET-MARCABOT

[Balay Dagiti Karuahe].

Maysa kadagiti naipasngat a siudad ti Simeon a naited kadakuada iti uneg ti teritoria ti tribu ni Juda. (Jos 19:1, 5; 1Cr 4:31) Iti pumadpada a salaysay maipapan kadagiti siudad a sigud a naituding iti Juda (Jos 15:31), mabalin a ti Madmanna ti nangsukat iti Bet-marcabot. No ti Bet-marcabot ket isu met laeng ti Madmanna, ngarud nabatad nga adda dayta iti kangrunaan a kalsada manipud Beer-seba nga agturong idiay Jerusalem ken kadagiti makin-amianan a lugar, ket ti nagan a Bet-marcabot mabalin a segundario a nagan ti Madmanna. Ti nagan ti ili a nailista kalpasan ti Bet-marcabot, ti Hazar-susa (wenno Hazar-susim), ket kaipapananna ti “Paraangan (Purok) ti Kabaian a Kabalio (wenno Kabkabalio).” Kunaen ti dadduma nga agpada dagitoy nga estasion ken pagsardengan dagiti kabalio ken karuahe, a nagdaliasat kadagiti kadaanan a ruta iti nagbaetan ti Palestina ken Egipto. Dagiti karuahe ket maus-usar met idi a pakigubat (Uk 1:19), ket ti Bet-marcabot mabalin a maysa a sarikedked a siudad dagiti Canaanita a pagrubbuatan dagiti karuaheda a pakigubat nga agturong kadagiti lantag a paset ti Beer-seba.​—Kitaenyo ti MADMANNA Num. 2.