MADMANNA

[nagtaud iti sao a kaipapananna ti “ganagan”].

1. Daytoy a nagan ket agparang iti listaan dagiti kaputotan ni Juda babaen ken Caleb. Nadakamat a ti kamalala ni Caleb a ni Maaca ket impasngayna ni “Saaf nga ama ni Madmanna.” (1Cr 2:49) Nupay kasta, kuna ti kaaduan nga eskolar a ti termino nga “ama” ket nausar ditoy iti kaipapananna a “namunganay.” Ibilangda a ti Madmanna a nausar iti daytoy a teksto ket katupag ti ili a nausig iti Num. 2, ta ibilangda a ni Saaf ti nangbuangay wenno nalabit nangbangon manen iti dayta kalpasan ti pannakakautibo. Mapaliiw nga agparang dagiti nagan a Kiriat-jearim ken Betlehem iti umasping a konteksto kadagiti sumaganad a bersikulo.​—1Cr 2:50, 54.

2. Maysa a siudad iti makin-abagatan a paset ti teritoria ti Juda. (Jos 15:21, 31) Nupay mabalin a ti kadaanan a naganna ket nataginayon iti Umm Deimneh, awan ebidensia a nasarakan kas pammaneknek a daytoy ti kadaanan a disso. Kadagiti naglabas laeng a tiempo, ibagbaga dagiti eskolar nga isu dayta ti Khirbet Tatrit, agarup 15 km (9.5 mi) iti amianan a daya ti Beer-seba. Ipasimudaag ti panangidilig iti Josue 15:31 kadagiti kapadana a listaan iti Josue 19:5 ken 1 Cronicas 4:31 nga isu met laeng dayta ti Bet-marcabot. Ti Bet-marcabot (kaipapananna ti “Balay Dagiti Karuahe”) ket mabalin a segundario a nagan ti Madmanna.​—Kitaenyo ti BET-MARCABOT.