JOAS

Adda dua a nagduma a pannakaisurat daytoy a nagan iti Hebreo, nupay “Joas” laeng iti Iloko. Ti umuna ken kadawyan, Yoh·ʼashʹ, ket napaababa a porma ti Jehoas. Ti naiduma a pannakaisuratna kas Yoh·ʽashʹ ket agaplikar iti Num. 1 ken 5 a nailista iti baba.

1. Maysa a Benjamita iti linia ti pamilia ni Bequer.​—1Cr 7:6, 8.

2. Maysa a kaputotan ni Juda babaen iti maikatlo a nainaganan nga anakna a ni Sela.​—1Cr 2:3; 4:21, 22.

3. Ti ama ni Ukom Gideon; maysa nga Abi-ezerita a kameng ti tribu ni Manases. (Uk 6:11, 15; 7:14; 8:13, 32) Nabatad nga adu ti sanikua ni Joas ken dakkel ti impluensiana iti komunidad, yantangay adda altarna a naidedikar ken Baal, kasta met ti maysa a “sagrado a teddek,” ken addaan iti maysa a sangakabbalayan ti ad-adipen. Idi sililimed a rinebba ti anakna a ni Gideon daytoy nga altar ken sagrado a teddek, ken nangbangon sadiay iti altar ken Jehova a nangidatonanna iti pito ti tawenna a toro, kinalikaguman dagiti umili iti dayta a lugar nga iyawat ni Joas ti anakna tapno mapapatay. Ngem daytoy ti insungbat ni Joas: “No [ni Baal] Dios, bay-anyo a mangaramid iti legal a panangikalintegan iti bagina.” Gapu itoy, rinugian ni Joas nga awagan ti anakna iti Jerubaal.​—Uk 6:25-32; 8:29.

4. Maysa kadagiti nabileg a lallaki iti tribu ni Benjamin a kimmappon iti buyot ni David idiay Siclag bayat nga aglemlemmeng ni David gapu ken Saul; anak a lalaki ni Semaa a Gabaatita.​—1Cr 12:1-3.

5. Panguluen a dinutokan ni Ari David a mangaywan kadagiti abasto iti lana.​—1Cr 27:28, 31.

6. Maysa kadagidiay intuding ni Acab a mangibalud iti matalek a mammadto a ni Mikaias. Naawagan kas “anak ti ari.” (1Ar 22:26, 27; 2Cr 18:25, 26) Daytoy a termino ket mabalin a tumukoy iti maysa a kaputotan ni Ari Acab wenno iti maysa nga opisial a nagtaud iti naarian a kapuonan wenno iti maysa a tao nga asideg ti pannakainaigna iti sangakabbalayan ti ari.

7. Napaababa a porma ti Jehoas, ari ti Juda ken anak ni Ocozias. (2Ar 11:2, 3, 21) Ti Joas kas sabali pay nga ispeling ti Jehoas ket namin-adu nga agparang iti Hebreo a Masoretiko a teksto, kas kunaen dagiti footnote ti Rbi8.​—2Ar 12:19; 1Cr 3:11; 2Cr 24:1, 2; kitaenyo ti JEHOAS Num. 1.

8. Napaababa a porma ti Jehoas, ari ti Israel, anak ni Jehoacaz ken apoko ni Jehu. (2Ar 14:1, 8, 9) Daytoy a sabali pay nga ispeling (Joas) ket masansan nga agparang iti Masoretiko a teksto.​—2Ar 13:9, 12, 13; 2Cr 25:17, 18, 21; Os 1:1; Am 1:1; kitaenyo ti JEHOAS Num. 2.