CAMON

Ti lugar a nakaitabonan ni Ukom Jair. (Uk 10:5) Dakamaten ni Josephus ti Camon kas “maysa a siudad ti Galaad.” (Jewish Antiquities, V, 254, [vii, 6]) Agparang a tumunos daytoy iti pannakatukoy ni Jair iti Kasuratan kas maysa a “Galaadita.” (Uk 10:3) Adda dua a disso iti daya ti Jordan a gagangay a maikunkuna kas nagkauna a Camon. Ti maysa ket ti Qamm, agarup 18 km (11 mi) iti abagatan a daya ti Baybay ti Galilea. Ngem iti panangadal kadagiti rebbana, awan ti nasarakan a pammaneknek a napagnaedan dayta sakbay ti panawen dagiti Romano. Ti sabali pay a disso ket ti saan unay a nalawa a rebrebba idiay Qumeim a di masinunuo ti kinadaanda, ad-adayo dayta iti agarup 3 km (2 mi) iti abagatan.