PATA

Nalukneng ken nataba a tisyu ti ur-urat a laonen dagiti makin-uneg nga ungib ti kaaduan a tulang. Adda dua a kita ti pata, ti duyaw ken nalabaga. Kadagiti adulto, ti atitiddog, nabukbukel a tulang naglaonda iti duyaw, wenno di aktibo, a pata a nangnangruna a buklen ti taba, ket dagiti daplat a tulang ti bangabanga, dagiti paragpag, ti sternum, ken ti pelvis naglaonda iti nalabaga, wenno aktibo, a pata. Napateg ti akem ti nalabaga a pata iti pannakapataud ti dara. Ipaayna dagiti agaw-awit-oksihena a selula ti nalabaga a dara, dagiti napateg nga elemento a mamagbalay iti dara a maawagan platelet, ken ti dakkel a porsiento dagiti puraw a selula, a kangrunaanna nga agserbi kas manglaban iti impeksion. Kas maysa a kameng nga agpatpataud iti dara, ti pata addaan direkta nga epekto iti salun-at ken kired ti maysa a tao. Gapuna, ni Job (21:24) mayanatup nga iparipiripna ti nagsayaat-pannakataraonna ken nasalun-at a tao babaen ti ladawan ti maysa a tao a ti pata ti tulangna “mapagtalinaed a nabasa.”

Ti pata ti tulang ti animal nalawag nga inaramat dagiti Israelita kas pagtaraon. (Idiligyo ti Mik 3:2, 3.) Nakasussustansia unay dayta, nabaknang iti protina, taba, ken iron. Ngarud, ti bangkete ni Jehova a maipaay iti amin nga ili tumutop a ramanenna ti simboliko a “nataba unay a putahe a napno iti pata.”​—Isa 25:6.

Iti Hebreo 4:12 “ti sao ti Dios” naipadis iti maysa nga igam a natartarumamis ngem iti aniaman a kampilan a dua ti tademna ken mastrekna dagiti panunot ken motibo ti maysa a tao, a sumalput, no ar-arigen, agingga iti pata, ti kaunggan a paset dagiti tulang.