MEREMOT

1. Maysa kadagiti pannakaulo dagiti papadi a kimmuyog ken Zorobabel idiay Jerusalem manipud Babilonia idi 537 K.K.P. (Ne 12:1-7) “Meraiot” ti nagan ti maysa a “balay ti amma” ti papadi iti simmaruno a kaputotan, ket mabalin a ni Meremot ti nagtaudan dayta. (Ne 12:15) Agkaasping ti pannakaisurat dagitoy a nagan no maaramat dagiti Hebreo a letra.

2. Anak ni Uria ken mabigbigbig a padi idi kaaldawan da Esdras ken Nehemias. Idi a ni Esdras ken dagiti natda a Judio napanda idiay Jerusalem manipud Babilonia idi 468 K.K.P., karaman ni Meremot kadagiti papadi a ‘nangbagting iti pirak ken ti balitok ken dagiti aruaten iti balay’ ni Jehova. (Esd 8:31-34) Ni Meremot ket kaputotan ni Hacoz, a ti sumagmamano kadagiti kaputotanna saanda a napasingkedan ti kapuonanda. (Esd 2:61, 62) Ngem nabatad a posible a mapatalgedan ti kapuonan ti benneg ti pamiliana, yantangay nakipaset ni Meremot kadagiti annongen ti papadi. Nakiraman met iti pannakatarimaan ti pader ti Jerusalem iti panangidaulo ni Nehemias.​—Ne 3:3, 4, 21.

3. Maysa a padi, wenno inapo ti maysa kadagiti nangselio iti “mapagpiaran nga urnos” idi kaaldawan ni Nehemias.​—Ne 9:38–10:5.

4. Israelita a karaman kadagiti “annak ni Bani” a nangala iti ganggannaet nga assawa a babbai ngem pinagtalawda dagita ‘agraman ti annakda’ idi kaaldawan ni Esdras.​—Esd 10:25, 34, 36, 44.