MEROM, DANDANUM TI

[Nangato (Natan-ok) a Disso].

Ditoy a nagpakarso ti nagkakappon a puersa dagiti Canaanita nga indauluan ni Jabin nga ari ti Hasor sakbay a pinarmek ida ni Josue. Nalabit damo idi a naipasango dagiti Israelita kadagiti Canaanita nga agus-usar iti kabalio ken karuahe, a mabalin a naipasimudaag iti panangbilin ti Dios ken Josue a mapuoran dagiti karuahe ken malugpi dagiti kabalio.​—Jos 11:1-9.

Maitunos iti daytoy, inlawlawag ni Y. Aharoni: “Awan duadua a ti ‘dandanum ti Merom’ ti gubuayan ti danum ti siudad a Merom nga adda iti sibay ti lugar a naguummong ti puersa dagiti Canaanita. Pagaammo ti Merom agpadpada kadagiti rekord ti Egipto idi maikadua a milenio . . . ken iti salaysay ni Tiglat-pileser III maipapan iti panagdaliasatna idiay Galilea . . . Kunaen ti kaaduan a ti Merom isu ti Meirun nga adda iti sakaanan ti Jebel Jarmaq, ngem gapu iti kaawan ti mayanatup a munturod iti daytoy a disso, maikanatad ti maysa a naam-amianan disso. Ti naganna ket mabalin a nataginayon iti Jebel Marun ken Marun er-Ras, ket mabalin a kunaentayo nga isu ti Tell el-Khirbeh, maysa kadagiti nalalawa a munturod ti Canaan iti makin-abagatan a paset ti Makinngato a Galilea iti Canaan. Ti dua a naisingasing a lugar nga ayanna ket agarup pito agingga iti walo a milia ti kaadayona manipud Hasor.”​—The Land of the Bible, impatarus ken inurnos ni A. Rainey, 1979, p. 225, 226.