NEAPOLIS

[Baro a Siudad].

Maysa a siudad ti Grecia iti makin-amianan nga ungto ti Baybay Aegeano a nagpaay kas pagsangladan maipaay iti Filipos. Kuna ti kaaduan a dayta ita ti agdama-aldaw a Kavalla. Adda daytoy a siudad iti maysa a nabato a rawis a dimmawadaw iti uluanan ti Gulpo ti Kavalla. Masarakan ti sasangladanna iti makinlaud a deppaar, ket ti mismo a Kavalla adda iti agarup 15 km (9.5 mi) iti abagatan a daya dagiti rebba ti Filipos. Ipasimudaag dagiti Latin a kitikit a kadagidi tiempo dagiti Romano, ti siudad nagpannuray iti Filipos, ket agparang a gapuanan dagiti Romano ti paspaset ti maysa a kalasugan sadiay. Ti Kalsada Egnatia nga inaramid dagiti Romano pinagsilpona ti Neapolis ken Filipos, ket naglayon dayta nga agpalaud agingga iti Durazzo (Durrës) iti Baybay Adriatiko.

Idiay Neapolis ti damo a simrekan ni apostol Pablo iti Europa kas panangipangag iti ayab nga ‘umallatiw iti Macedonia.’ Manipud sadiay, napan idiay Filipos, a posible a tallo wenno uppat nga oras ti binusbosna a nangballasiw iti kabambantayan iti nagbaetan ti dua a siudad. (Ara 16:9-11) Agarup innem a tawen kalpasanna, di pagduaduaan a limmasat manen ni Pablo iti Neapolis.​—Ara 20:6.