DAGUM

Nakuttong a rimienta nga addaan natarumamis a tirad iti maysa nga ungto ken abut iti bangir nga ungto; naaramat iti panagdait buyogen ti sinulid (wenno no dadduma buyogen dagiti lalat a gisla) ken iti panagborda. (Ex 28:6; 35:34, 35; Ec 3:7; Lu 5:36) Nupay kadagiti kadaanan a disso adda natakuatan a tultulang a dagum ken sumagmamano a naaramid iti marfil, gagangay a naaramat dagiti bronse a dagum. Umaspingda unay kadagiti agdama-aldaw a dagum. Nasarakan idiay Palestina dagiti bronse a dagum a nagduduma ti kaatiddogda manipud aganay nga 4 agingga iti 14 cm (1.5 agingga iti 5.5 pul.). Ti sumagmamano a bronse a dagum dagiti Egipcio ket manipud 8 agingga iti 9 cm (3 agingga iti 3.5 pul.) a kaatiddog.