ABUT TI DAGUM

Iti maysa a pangngarig maipapan iti iseserrek iti Pagarian, kinuna ni Jesu-Kristo: “Ti maysa a kamelio nalaklaka a lumsot iti abut ti dagum ngem iti maysa a nabaknang a tao a sumrek iti pagarian ti Dios.” (Mt 19:24; Mr 10:25) Pinati ti sumagmamano a ti abut ti dagum ket maysa a bassit a ruangan nga iti dayta ti kamelio, no maikkatan iti awit, mabalinna ti lumsot a nakarigrigat. Nupay kasta, ti Griego a sao maipaay iti “dagum” a masarakan iti Mateo 19:24 ken Marcos 10:25 (rha·phisʹ) naadaw iti berbo a kaipapananna ti “agdait.” Kasta met, ti Griego a sao nga agparang iti pumadpada a teksto ti Lucas 18:25 (be·loʹne) naaramat a tumukoy iti literal a dagum iti panagopera. Maipapan kadagitoy a Griego a termino kunaen ti Vine’s Expository Dictionary of Old and New Testament Words: “Agparang a moderno daydiay kapanunotan a panangyaplikar iti ‘abut ti dagum’ iti babassit a ruangan; awan ti mangipakita a kasta ti nagkauna a kaipapanan dayta. Ti panggep ti Apo iti dayta a sasao isu ti panangyebkas iti natauan a kinaimposible ken saanen a kasapulan nga ikagumaan a palag-anen dayta a kinarigat babaen ti panangipapan a ti dagum kaipapananna ti aniaman a banag a saan laeng a kas kadawyan a gamigam.”​—1981, Tomo 3, p. 106.

Kas nalablabes a panagsao, impaganetget ti pangngarig no kasano karigat iti nabaknang a tattao saan laeng a ti panangirugi iti panagserbi iti Dios no di ket iti kinapudnona ti iseserrek iti Pagarian.​—1Ti 6:17-19; Lu 13:24.