MANANGTAGIBI, MANANGTARIPATO

Adda dua a kita ti manangtaripato a naaramat kadagidi nagkauna a tiempo. Ti maysa ket nagakem kas ‘manangtagibi a babai’ (Heb., meh·neʹqeth; Ex 2:7; 2Ar 11:2; 2Cr 22:11; Isa 49:23), nagserbi kas sandi ti ina iti panangpasuso iti maladaga. Ni Debora ket maysa a kasta a manangtaripato ni Rebecca ngem idi agangay nagserbi kas adipenna wenno agaywan kenkuana, ken nagtultuloy nga adipen ti pamilia uray pay kalpasan ti ipapatay ti apona a babai. (Ge 24:59, 67; 35:8) Ti sabali pay a kita ti manangtaripato ket mabalin a maysa a lalaki (Heb., ʼo·menʹ; Nu 11:12 [“manangtagibi”]; Isa 49:23 [“agay-aywan”]) wenno maysa a babai (Heb., ʼo·meʹneth; 2Sm 4:4 [“mangtagtagibi”). Ti lalaki wenno babai mabalin nga agaywan iti ubbing, masaksakit, wenno lallakay ken babbaketen. Ti akem ti manangtaripato kas manangtagibi wenno agay-aywan ket inaramid ti baketen a ni Noemi maipaay iti apokona a ni Obed, ken inaramid ti nalibnos a birhen a ni Abisag maipaay ken Ari David.​—Ru 4:13, 16, 17; 1Ar 1:1-4.

Iti 1 Tesalonica 2:7, inyarig ni Pablo ti bagina ken ti kakaduana iti maysa nga “agtagtagibi nga ina” (Gr., tro·phosʹ), iti kasta impaganetgetna a naalumamayda kadagiti manamati a taga Macedonia.