ABDIAS

[Adipen ni Jehova].

1. Pannakaulo ti pamilia iti tribu ni Isacar; anak ni Izrahias ken kaputotan ni Tola.​—1Cr 7:1-3.

2. Zabulonita a ti anakna ket maysa a prinsipe iti tribu ni Zabulon bayat ti panagturay ni David.​—1Cr 27:19, 22.

3. Nabileg a Gadita a mannakigubat a bimmallasiw iti aglaylayus a Jordan ken nangsuporta ken David idi nagbiag kas pugante manipud pungtot ni Saul.​—1Cr 12:8, 9, 14, 15.

4. Ti mayordomo iti sangakabbalayan ni Ari Acab. Nupay inannurot da Ari Acab ken Jezebel ti kinadakes, ni Abdias nagbuteng iti kasta unay ken Jehova, ket inlemmengna ti 100 a mammadto ni Jehova “a saglilimapulo iti maysa a rukib” idi imbilin ni Jezebel a magudasda amin. Kabayatan ti nadibinuan pannakayetnagna a tikag nga impadto ni Elias, ti apo ni Abdias a ni Acab nangibingay kenkuana iti maysa a teritoria, ket ti tunggal maysa agbirbirok iti ruot nga ipakan iti an-animal idi a ni Elias nasabetna ni Abdias. Ni Elias saan a nakitkita ni Acab bayat ti tikag, maysa a periodo nga agarup tallo a tawen. Idi naibaga kenkuana nga ipakaammona ken Acab a nagsublin ni Elias, ni Abdias, gapu iti dakkel a butengna, nagkitakit a mapan agingga a naipasigurado kenkuana a saan a pumanaw ti mammadto, ta papatayen la ketdi ni Acab ti adipenna no mapaneknekan a saan a pudno daytoy a damag.​—1Ar 18:1-16.

5. Maysa a prinsipe nga imbaon ni Jehosafat a mangisuro iti linteg ni Jehova kadagiti siudad ti Juda.​—2Cr 17:7, 9.

6. Adayo a kaputotan da Saul ken Jonatan iti tribu ni Benjamin.​—1Cr 8:33-38; 9:44.

7. Merarita a Levita, maysa kadagiti manangaywan kadagiti panagtarimaan iti templo kas imbilin ni Ari Josias a maaramid.​—2Cr 34:8, 12.

8. Maysa a mammadto ni Jehova ken nangisurat iti maikapat kadagiti libro dagiti makunkuna a segundario a mammadto. (Abd 1) Awan ti ammo maipapan iti kinatao daytoy a mammadto ti maikapito a siglo K.K.P.​—Kitaenyo ti ABDIAS, LIBRO TI.

9. Levita a nagsubli manipud Babilonia ken nagnaed idiay Jerusalem. (1Cr 9:2, 3, 14, 16) Nalawag a naawagan Abda iti Nehemias 11:17. Mabalbalin nga isu met laeng ti Num. 13.

10. Kaputotan ni David kalpasan ti pannakaidestiero.​—1Cr 3:5, 9, 10, 21.

11. Pannakaulo ti sangakabbalayan ni Joab iti dasig ti amana ken nangidaulo iti 218 a lallaki iti daytoy a pamilia a nagsubli idiay Jerusalem a naikuyog ken Esdras idi 468 K.K.P.; anak ni Jehiel.​—Esd 8:1, 9.

12. Maysa kadagiti papadi (wenno kaputotanna) a nangpatalged iti tulag ti kinamatalek nga inaramid dagiti nagsubli a destiero iti sidong ti kinagobernador ni Nehemias.​—Ne 9:38; 10:1, 5, 8.

13. Levita nga agay-aywan iti ruangan idi kaaldawan da Nehemias ken Esdras. (Ne 12:25, 26) Mabalbalin nga isu met laeng ti Num. 9.