PAPEL

Kadagidi tiempo ti Biblia, maysa a naingpis a pagsuratan a naaramid a piliego manipud kadagiti gisla a naala iti mula a papiro.​—Kitaenyo ti PAPIRO.

Napadayawan dagiti Egipcio kas kaunaan a managpartuat iti papel a papiro maipaay kadagiti panagsurat, a nagaramatda kadagiti mula a papiro nga agtubtubo idi kadagiti igid ti Karayan Nilo. Ti sumagmamano nga arkeologo isaadda ti kasta a panagpataud iti papel idi pay tiempo ni Abraham.

Dagidi nagkauna a Kristiano nagusarda kadagiti papel a papiro kadagiti surat, lukot, ken codex-da. Addaan met iti napateg a paset iti panangpataud kadagiti manuskrito ti Biblia, agingga a sinuktan dayta ti vellum (napino ti binggasna a lalat ti animal) idi maikapat a siglo K.P. Iti 2 Juan 12, insurat ti apostol nga idanonna ketdi a “rupanrupa” ti mensahena imbes a babaen iti “papel ken tinta.” Ti sao a “papel” ditoy ket pakaipatarusan ti Griego a sao a kharʹtes, a naikuna a kaipapananna ti maysa a piliego ti papel a naaramid iti papiro.