PUT

‘Anak’ ni Ham. (Ge 10:6; 1Cr 1:8) Nupay nadakamat ni Put iti sabsabali pay a paset iti Biblia, awan kadagiti putotna ti nainaganan. Masansan a nangipaay dagiti kaputotanna iti namilitariaan a suporta iti Egipto. (Jer 46:9; Eze 30:4-6; Na 3:9) Nagserbida kas matangtangdanan a soldado kadagiti buyot ti Tiro ken nakatulongda maipaay iti kinanaindaklan dayta a siudad. (Eze 27:3, 10) Naipadto met a ti Put karaman kadagiti puersa ni Gog ti Magog.​—Eze 38:5.

Ti magun-odan nga ebidensia ipatuldona ti panagnaig iti nagbaetan ti Put ken dagiti taga Libya ti makin-amianan nga Africa. Iti tallo kadagiti panagparangna, ti “Put” naipatarus a “dagiti taga Libya” iti Griego a Septuagint ken iti Latin a Vulgate. (Jer 46:9; Eze 27:10; 38:5) Ti Hebreo a “Put” katupagna met unay ti put[i]ja (gagangay a maibilang nga isu ti Libya) kadagiti kitikit ti Daan a Persiano. Nupay kasta, kasla ipasimudaag ti Nahum 3:9 a ti Put ken dagiti Lu·vimʹ (dagiti taga Libya) nagdumada a tattao. Ngem daytoy a mismo saanna nga ilaksid ti pananginaig iti Put kadagiti taga Libya. Ti termino a “dagiti taga Libya” nalabit nalawlawa ti saklawna ngem ti Hebreo nga awag a Lu·vimʹ, kas mabalin a masinunuo manipud panangtukoy ni Herodotus (II, 32) kadagiti “taga Libya, adu a tribu kadakuada.”

Ti pannakainaig ti Put iti “Punt” kadagiti kitikit ti Egipto ket saan nga awaten ti kaaduan itatta gapu kadagiti rason mainaig kadagiti letra a mangirepresentar iti aweng.