RABSARIS

[Panguluen nga Opisial ti Palasio].

Ti titulo ti panguluen nga opisial ti palasio kadagiti gobierno ti Asiria ken Babilonia. Ti Rabsaris ket kameng ti komite a buklen ti tallo a nangato nga Asirio a dignitario nga imbaon ti ari ti Asiria. Kiniddawna ti isusuko ti Jerusalem idi tiempo ni Ari Ezekias.​—2Ar 18:17.

Maysa ti Rabsaris kadagiti opisial ti Babilonia a nangkontrol iti Jerusalem maipaay ken Nabucodonosor idi naabak ti siudad idi 607 K.K.P. Ni Nabusazban ti nainaganan a Rabsaris idi naibilin ken Jeremias nga agnaed iti pagtaengan ni Gedalias. (Jer 39:3, 13, 14; 40:1-5) Kadagiti panagkabakab dagiti arkeologo, adda dagiti natakuatanda a kitikit a naglaon kadagita a titulo.​—Bulletin of the Israel Exploration Society, Jerusalem, 1967, Tomo XXXI, p. 77; Le palais royal d’Ugarit, III, Paris, 1955, Num. 16:162, p. 126.