SILIA

Tugaw a naigalut a naipasakay iti bukot ti maysa nga animal tapno pagtugawan ti agsakay. Namin-adu a dinakamat ti Biblia ti panangsilia kadagiti asno (Ge 22:3; Nu 22:21; 2Sm 17:23; 19:26; 1Ar 2:40; 13:13, 27; 2Ar 4:24), ngem saan a nadeskribir ti langa dagiti silia. Maibasar iti ipakpakita dagiti kadaanan a monumento, agparang a dagiti nagkauna a silia dagiti kabalio ket maymayat laeng bassit ngem iti ap-ap a lupot wenno lalat. Ti Hebreo a berbo a “siliaan” kangrunaan a kaipapananna ti “igalut,” a mangipakita a dagiti silia ket nairakus iti animal. Ti maysa a kadaanan a timmambukor a kitikit iladawanna ti maysa a sinankahon a silia a nairakus iti bukot ti kamelio a maymaysa ti bungkatolna. Saan a masigurado no ania ti “silia a labba ti kamelio a maipaay iti babai” a nadakamat iti Genesis 31:34. Ti Hebreo a sasao a kar hag·ga·malʹ nadumaduma ti pannakaipatarusna kas “supot ti kamelio” (NE), “kamilia ti kamelio” (JB), ken “silia ti kamelio” (AT).

Iti sidong ti Linteg, agbalin a narugit ti asinoman a makasagid iti silia a nagsakayan daydiay addaan iti panagpasayasay, no kasano a kasta ti mapasamak iti maysa tao a makasagid iti aruaten a nagtugawan ti agkadawyan a babai.​—Le 15:9, 19-23.