SISAC

Maysa nga ari ti Egipto a pagaammo kas Sheshonk (I) manipud kadagiti rekord ti Egipto. Kunaen ti kaaduan a nagturay ni Sisac iti agarup 21 a tawen, nga isu ti naibilang a nangbuangay iti “dinastia iti Libya.” Simmuno kenkuana ti anakna a ni Osorkon I.

Ni Sisac ti agturturay idiay Egipto idi nagkamang sadiay ni Jeroboam tapno maliklikanna ti pungtot ni Ari Solomon. (1Ar 11:40) Sumagmamano a tawen kalpasanna, iti maikalima a tawen ti suno ni Solomon a ni Rehoboam (993 K.K.P.), rinaut ni Sisac ti Juda babaen iti nabileg a puersa a buklen dagiti karuahe ken kumakabalio. Kinautibona ti sumagmamano a nasarikedkedan a siudad iti Juda sa nagturong idiay Jerusalem. Ngem saan nga impalubos ni Jehova a dadaelenna ti Jerusalem, ta nagpakumbaba ni Rehoboam ken dagiti prinsipe ti Juda apaman a naawatda ti maysa a mensahe manipud ken mammadto Semaias. Nupay kasta, innala ni Sisac dagiti gameng ti siudad.​—2Cr 12:1-12.

Adda ebidensia ti arkeolohia maipapan iti iraraut ni Sisac iti lugar ti Palestina. Iti kapaset ti maysa a batonlagip a nasarakan idiay Megiddo, nadakamat ti nagan ni Sheshonk (Sisac), a mabalin a mangipasimudaag a naipatakder sadiay ti batonlagip kas tanda ti panagballigina. (Ancient Near Eastern Texts, inurnos ni J. Pritchard, 1974, p. 263, 264) Kasta met, iti timmambukor a kitikit iti maysa a pader ti templo idiay Karnak (makin-amianan a paset ti kadaanan a siudad ti Thebes iti Egipto), nailanad ti nakaad-adu a siudad wenno purok a pinarmek ni Sisac. (LADAWAN, Tomo 1, p. 952; Supplements to Vetus Testamentum, Leiden, 1957, Tomo IV, p. 59, 60) Adu kadagita a lugar a mabalin a kunaen a kapadpada dagiti disso iti Biblia ket masarakan iti teritoria ti sangapulo-tribu a pagarian. Ipasimudaag daytoy a ti panggep ti namilitariaan a kampania ni Sisac ket isu ti panangiturayna kadagiti napateg a ruta ti komersio, saan ket a ti panangtulong iti sangapulo-tribu a pagarian, tapno maisaknapna ti bileg ken impluensia ti Egipto.