SUNAMITA

[Iti (Kukua ti) Sunem].

Maysa nga agnanaed iti Sunem. Ni Abisag, ti manangtaripato ni David idi lakayen, ket naawagan “Sunamita.”​—1Ar 1:3, 4, 15; 2:17, 21, 22; kitaenyo ti ABISAG.

Saan a nadakamat ti nagan ti maysa a nalatak a babai ti Sunem a nangsangsangaili ken mammadto Eliseo, a kanayon nga impaayanna iti taraon ken pagdagusan. Gapu iti kinamanangngaasi ti babai, nagunggonaan iti maysa nga anak. Kalpasan ti sumagmamano a tawen, idi natay ti ubing, nagdaliasat daytoy a Sunamita iti agarup 30 km (19 mi), ket idi nasarakanna ni Eliseo idiay Bantay Carmelo, inyebkasna ti nakaro a ladingitna, a kinunana: “Nagkiddawak kadi iti anak babaen iti apok? Saan aya a kinunak, ‘Saannak koma nga iturong iti ulbod a namnama’?” Idi nagsubli ni Eliseo a kadua ti babai, nagkararag ti mammadto ken Jehova, ket napagungar ti ubing.​—2Ar 4:8-37.

Idi pinakdaaran ni Eliseo ti nabalon a Sunamita a babai maipapan iti dumteng a nakaro a bisin, daytoy a babai agraman ti sangakabbalayanna nagnaedda iti tengnga dagiti Filisteo iti pito a tawen. Idi nagngudo daytoy a tiempo nagsubli ti babai, ngem natakuatanna nga adda nangtagikua iti sanikuana. Idi naammuan ti ari dagiti naglabas a panangtratona ken Eliseo, naisubli iti babai ti amin a sanikuana.​—2Ar 8:1-6.