SIBMA

Maysa nga ili iti daya ti Jordan. Innala dayta ti Israel manipud ken Sihon nga ari dagiti Amoreo ken naituding kadagiti Rubenita a nangtarigagay iti dayta gapu kadagiti lugar a pagpaaraban iti aglikmutna. Nalawag a naawagan met iti Sebam. (Nu 32:2-5, 37, 38; Jos 13:15, 19, 21) Sigud a siudad dayta dagiti Moabita (idiligyo ti Nu 21:25, 26) ket saan nga ammo no kaano a nabawida. Nalatak daytoy gapu kadagiti kaubasan ken prutas bayat ti kalgaw. (Isa 16:8, 9, 13, 14; Jer 48:32, 46, 47) Saan nga ammo ita ti eksakto nga ayan ti Sibma (Sebam), nupay nadakamat a kadua ti Hesbon ken Nebo (Nu 32:3), ken kunaen ti komentario ni Jerome maipapan iti Isaias 16:8 nga agarup 500 nga addang laeng ti kaadayo dayta manipud Hesbon. Ngem nupay di sigurado, kunaen ti dadduma nga isu dayta ti Qurn el-Kibsh, agarup 5 km (3 mi) iti laud nga abagatan-a-laud ti Hesbon (agdama a Hisban).