SOREC, NAAPRES A GINGET TI

Ti ayan ti pagtaengan ni Dalila. Ditoy nga inallukoyna ni Samson a mangipalgak iti palimed ti pigsana, a nagbanag iti panangtiliw, panangbulsek, ken panangibalud kenkuana dagiti Filisteo. (Uk 16:4-21) Maikunkuna nga isu ti Wadi es-Sarar (Nahal Soreq), a lumasat nga agpalaud a bumallasiw iti Sefela nga agturong iti Baybay Mediteraneo. Ti nagan a Sorec, a kaipapananna ti “Napili a Nalabaga nga Ubas,” ket agparang a nataginayon iti Khirbet Suriq, agarup 25 km (16 mi) iti laud ti Jerusalem, adda iti makin-amianan a deppaar ti wadi ken kabatog ti Bet-semes. Kas iti agdama, kaaduan a paset daytoy a rehion ket nalabit maikanatad maipaay kadagiti kaubasan (mabalin a maysa a makagapu no apay a kastoy ti naganna). Nabatad ti kareson dagiti Filisteo a nangisubli iti lakasa ti tulag kadagiti Israelita ket limmasat iti naapres a ginget ti Sorec manipud Ekron iti dalan nga agturong iti Bet-semes.​—1Sm 5:10; 6:10-12.