TARTAC

Maysa a didiosen a nagdaydayawan dagiti Aveo a pinagyan ti ari ti Asiria idiay teritoria ti Samaria kalpasan ti panangkautibona kadagiti Israelita ti sangapulo-tribu a pagarian. (2Ar 17:31) Sigun iti Talmud ti Babilonia, ni Tartac ket aglanglanga nga asno. (Sanhedrin 63b) Naidatag ti konklusion a ti nagan a Tartac mabalin a kaas-asping ti Pahlavi (Persiano) a sao a tar-thakh (nakaro a kinasipnget, bannuar ti kasipngetan). Maibatay iti daytoy, naikuna a ni Tartac mabalbalin a maysa a sairo kadagiti nababbaba a rehion. Nupay kasta, malaksid iti ababa a pannakatukoy ni Tartac iti Kasuratan, awanen ti mapagtalkan nga impormasion maipapan iti kasasaad daytoy a didiosen.