TANGAN (TI IMA)

Ti ramay iti ima ti tao a mabalinna nga isabat iti dadduma pay a ramay. Maiggaman ti tattao ti bambanag ken makaaramidda iti adu a narikut nga ar-aramid nga imposible koma a maaramidanda no awan ti makisinnabet a tangan. Idi un-unana, adda dagiti gundaway a maguped dagiti tangan ti ima ken saka ti maysa a kautibo tapno saanen a makapagserbi iti militar.​—Uk 1:6, 7.

Ti Hebreo a sao a boʹhen ket naaramat a tumukoy kadagiti tangan ti ima ken saka. Iti amin a teksto a nakaaramatan ti boʹhen, ti paset ti bagi a madakdakamat ket napakuyogan iti sasao a ‘ti ima’ ken ‘ti saka.’ Tunggal madakamat iti Kasuratan ti tangan ti ima, natukoy met ti tangan ti saka iti dayta met laeng a teksto.​—Ex 29:20; Le 14:14, 17, 25, 28.

Idi maisaad ni Aaron ken ti annakna kas papadi, maysa a kalakian a karnero ti naparti, ket nangikabil ni Moises iti dara iti piditpidit ti makannawan a lapayag ni Aaron, iti tangan ti makannawan nga imana, ken iti tangan ti makannawan a sakana. Kalpasanna, kasta met laeng ti inaramidna iti tunggal annak ni Aaron. (Le 8:23, 24) Iti piguratibo a pamay-an, ti dara iti makannawan a tangan ti ima inrepresentarna ti obligasionda a mangitungpal kadagiti annongenda kas papadi buyogen ti amin a kabaelanda.