LOBO

[Heb., zeʼevʹ; Gr., lyʹkos].

Animal nga agkaan iti lasag a kaar-arngina ti aso, a dakkel a German shepherd, ngem at-atiddog ti gurongna, daddadakkel ti sakana, nasabsabang ti ulona, ken napigpigsa ti pangana. Naipadamag nga idiay Palestina ken Siria gagangay nga aganup dagiti lobo a saggaysa wenno sagdudua wenno saggatlo, saan a pinangen. Aganupda no nasipnget, ngem aglemmengda no aldaw. (Hab 1:8; Sof 3:3) Dagiti lobo ket narungsot, narawet, natured, ken nagaramugam, a masansan nga ad-adu a karnero ti patayenda ngem iti kabaelanda a kanen wenno iparingguyod. Ti pastor kadagidi kadaanan a tiempo kasapulan ngarud a natured ken manangipamuspusan tapno masalaknibanna ti arban manipud kadagiti lobo.​—Jn 10:12, 13.

Ti kaaduan a panangtukoy ti Kasuratan iti lobo ket tapno mangiladawan. Iti padtona idi matayen, inyasping ni Jacob ti anakna a ni Benjamin iti maysa a lobo, awan duadua a mainaig daytoy iti abilidad ti tribu a makirupak. (Ge 49:27; kitaenyo ti BENJAMIN Num. 2.) Dagiti nasikap a prinsipe ti Juda (Eze 22:27), dagiti ulbod a mammadto (Mt 7:15), dagiti nadamsak a bumusbusor iti Nakristianuan a ministerio (Mt 10:16; Lu 10:3), kasta met dagiti ulbod a mannursuro a nagtaud iti uneg isuda a mamagpeggad iti kongregasion Kristiano (Ara 20:29, 30), ket naipadisda kadagiti lobo. Maisupadi kadagiti pagaammo unay a panagrubbuot dagiti lobo (Jer 5:6), nailadawan nga adda kappia iti nagbaetan ti lobo ken ti kordero bayat ti panagturay ti Mesias, nga aglanglanglang dagitoy; malaksid pay iti kaipapananna a ti kabibiag ti tattao ket nagbalbaliw, awan duadua a daytoy naimpadtuan a ladawan ipasimudaagna nga agkakappianto dagiti animal.​—Isa 11:6; 65:25.