Dagiti Saludsod Manipud Kadagiti Managbasa

◼ Apay a ti Isaias 11:6 idiay New World Translation of the Holy Scriptures kunaenna a “ti lobo makipagnaedto iti apagbiit iti kordero”? Saanto kadi a permanente dayta a talna?

Ti makapabang-ar a talna kadagiti animal a parsua a naipadto idiay Isaias 11:6-9 ti permanentento. Ngem ti naannad a panangipaulog iti Isaias 11:6 pagminarenna a dagiti kakasta nga an-animal ti saandanto a kankanayon nga agkakaddua.

Idiay New World Translation of the Holy Scriptures, mabasatayo ti Isaias 11:6 a kastoy: “Ti lobo makipagnaedto iti apagbiit iti kordero, ket makikaiddanto iti urbon a leopardo, ket ti baka ken ti urbon ti leon ken ti napalukmeg agkakaiddadanto; ti maysa nga ubing a bassit idalannanto ida.”

Ti pannakabasa kadagiti adu a patarus ti Biblia ti kasla: “Ti lobo makipagnaedto met iti kordero.” Dagiti kakasta a panangipaulog ti mabalin a mangiyegdat’ ladawan ti maysa a lobo ken maysa a kordero a kankanayon nga agkuykuyog, a kas ket tay addada iti baro a pamilia wenno urnos ti panagbiag.

Nupay kasta, ti Hebreo a sao a naipatarus nga “agnaed” wenno “agtaeng” ket gur. Sigun ken autor ti diksionario a William Gesenius, kaipapanan dayta ti “dumagas, agtalinaed biit, agtaeng a saan a kas iti balay, i.e. kas maysa a ganggannaet, saan nga umili, sangaili.” (A Hebrew and English Lexicon of the Old Testament, nga impatarus ni Edward Robinson) Ti diksionario da F. Brown, S. Driver, ken C. Briggs itedna met ti kaipapanan a “dumagas, agnaed iti (nakedngan wenno di nakedngan) a panawen, agnaed kas agdadamo . . . nga awanan nainkasigudan a karbengan.”

Inusar ti Dios ti gur iti panangibagana ken Abraham nga “agnaed kas ganggannaet” idiay Canaan. Ti patriarka dina matagikua ti daga, ngem isut’ masaluadan nga agnaed sadiay. (Genesis 26:3; Exodo 6:2-4; Hebreo 11:9, 13) Kasta met, kinuna ni Jacob nga isu ti ‘agtataeng kas maysa a ganggannaet’ idiay lugar ti Haran, gapu ta isut’ agsublinto idiay Canaan.​—Genesis 29:4; 32:4.

Idiay Paraiso nga asidegen nga ipasdek ti Dios, agkakappianto dagiti animal ken tattao. Awantot’ pagpeggadan ti lobo wenno baka a makikadua iti leopardo. Kasla tapno ipakitana ti nakaidumaan ti agdama, ti pagsasao palubosanna pay ti kapanunotan a ti lobo ket agnaedto nga aywanan ti kordero.​—Isaias 35:9; 65:25.a

Nupay kasta, nalabit addanto pay laeng masnop a pagnaedan dagiti kakasta nga animal. Dadduma nga animal ti maibagay kadagiti kabakiran, dadduma kadagiti tanap, ken ti sabsabali pay kadagiti dagdaga ti igid ti baybay wenno bambantay. Uray idi panawen ti orihinal a Paraiso, nagsao ti Dios maipapan kadagiti ‘naamo a dinguen ken dagiti naatap nga aniamal.’ (Genesis 1:24) Nalawag a dagiti naamo a dinguen isuda dagidiay kadawyanna asideg kadagiti tattao ken kadagiti pagtaenganda. Ti atap nga aniamal, nupay saan a narungsot, nabatad a kaykayatna ti aggian iti adayo manipud kadagiti tattao. Isu nga, kas ipakpakauna ti padto ni Isaias, ti lobo “makipagnaedto iti apagbiit iti kordero,” ngem saanto a kankanayon nga adda iti asideg dagiti kakasta nga animal.

[Footnote]

[Picture Credit Line iti panid 31]

Zoological Research Center, Tel-Aviv Hebrew University