AANAKAN
Paset ti bagi ti babai a pakataraknan ken pakapadakkelan ti maladaga sakbay a maipasngay. Ni Jehova ti Namarsua iti aanakan (Ge 2:22), ken isu Daydiay makabael a mamagbalin iti dayta a nabunga (Ge 29:31; 30:22; 49:25) wenno di nabunga. (Ge 20:18) “Natayen” ti aanakan ni Sara, wenno awanan iti pannakabalin a mangipasngay iti anak, idi insubli kenkuana ni Jehova dayta a pannakabalin. (Ro 4:19; Ge 18:11, 12; 21:1-3) Ipatuldo ti Biblia a ni Jehova ti makinggapuanan iti pannakabukel ti maisiksikog a bagi iti aanakan, a mangipakita a ti pannakadisenio ti tao iti aanakan ket maitunos iti padron nga inaramid ti Dios ket saan a babaen iti pannakaiparparna wenno ebolusion. (Job 31:15; idiligyo ti Job 10:8; Sal 139:13-16; Isa 45:9.) Yantangay naparsua ti aanakan nga agpaay laeng iti panagpaadu iti puli, nailanad ti “nalapdan nga aanakan” kas maysa kadagiti uppat a banag a saan a nangikuna: “Umanayen!”—Pr 30:15, 16.
Yantangay ti aanakan masarakan iti pangkaaduan a paset ti bagi a pagaammo kas tian, ti Hebreo a sao maipaay iti “tian” masansan a maus-usar a kangrunaan a tumukoy iti aanakan, kas iti Genesis 25:23; Deuteronomio 7:13; Salmo 127:3.—Kitaenyo ti TIAN.
Ti Dios, kas Diseniador ti aanakan, apagpag-isu met a makitana ti mabukbukel iti dayta. Mabasana dagiti natawid a kababalin a tumantanor iti di pay naipasngay nga ubing ken maikeddengna no ania ti kayatna a pangaramatan iti dayta nga indibidual, no tarigagayanna a kasta.—Jer 1:5; Lu 1:15; idiligyo ti Ro 9:10-13.
Imbilin ni Jehova iti Israel: “Santipikarem kaniak ti tunggal lalaki nga inauna a mangilukat iti tunggal aanakan iti annak ti Israel, kadagiti tattao ken an-animal. Kukuak dayta.” (Ex 13:2) Kadagiti natauan a pannakayanak, tumukoy idi daytoy iti umuna a lalaki nga anak ti ama.—Kitaenyo ti INAUNA.
Impatuldo ni Jesus a ti inana a ni Maria saan a mapadayawan a nangnangruna ngem iti dadduma pay nga agserserbi iti Dios. Iti maysa a gundaway idi mangisursuro ni Jesus, impukkaw ti maysa a babai: “Naragsak ti aanakan a nangawit kenka ken dagiti suso a sinusuam!” Insungbat ni Jesus: “Saan, imbes ketdi, Naragsak dagidiay dumdumngeg iti sao ti Dios ken mangsalsalimetmet iti dayta!” (Lu 11:27, 28) Idi agangay, bayat ti pannakaiturong ni Jesus iti kayo a pagtutuokan, nangted iti padto maipapan iti um-umay a pannakadadael ti Jerusalem, nga imbagana iti babbai nga agsangsangit gapu kenkuana nga um-umay dagiti aldaw a kunaen dagiti tattao: “Naragsak dagiti lupes a babbai, ken dagiti aanakan a saan a nagipasngay.” (Lu 23:27-29) Natungpal daytoy idi 70 K.P. idi a nasurok a maysa a milion a Judio, a pakairamanan dagiti ubbing, ti napukaw, ken rinibu ti naipan iti pannakakautibo, tapno mailako iti pannakaadipen.
Ti Judio nga agturay ken Fariseo a ni Nicodemo, idi nangngegna ti sasao ni Jesus a, “Malaksid no ti asinoman mayanak manen, saanna a mabalin a kitaen ti pagarian ti Dios,” inyimtuodna: “Kasano . . . ? Mabalinna aya ti sumrek iti aanakan ni inana iti maikadua a daras ket mayanak?” Idin inlawlawag ni Jesus a daytoy a baro a pannakayanak ket, saan a manipud iti aanakan ti tao, no di ket “manipud danum ken espiritu.”—Jn 3:1-8.
Piguratibo nga Usar. No dadduma maar-aramat ti “aanakan” mainaig iti gubuayan ti maysa a banag. Iti panagsaona maipapan iti ar-aramid a panagparsua a nakairamanan ti daga, agsao ni Jehova maipapan iti baybay kas rimkuas “manipud iti aanakan.” (Job 38:8) Kunaen ni Jehova iti Apo ni David nga iti aldaw ti puersa militarna maaddaanto daytoy kadagiti situtulok a boluntario a “kas kadagiti amor” manipud iti “aanakan ti bannawag” (paggapgapuan ti linnaaw iti bigat).—Sal 110:1-3.