Pagarian ti Dios—Ti Sigurado nga Agas
“TI TAO addaan pannakabalin iti sabali a maipaay iti pagdaksanna.” Daytoy a grupo dagiti sasao, a nailanad iti Biblia idiay Eclesiastes 8:9, ti pimmayso iti isuamin a historia agingga iti kaaldawantayo. Apay a kastoy? Apay di nabaelan ti tao a pinasayaat ti napeggad a tiempo a sangsanguenna itan?
“Ti bassit a pannakaammo iti kasasaad ti tao ti mangkumbinsir kadatayo,” insurat ni George Washington idi 1778, “a, ti kadadakkelan a paset iti sangatauan, ti panagayat iti [bagina met laeng] isu ti mangiwanwan a prinsipio; ket ngangngani tunggal tao ti mabalin, nga adda iti sidong ti impluensiana. . . . Sumagmamano laeng a tattao ti makabael nga agtultuloy a mangisakripisio kadagiti amin a kapanunotan iti pribado a pagayatan, wenno pagimbagan, a maipaay iti pagimbagan dagiti isuamin. Minamaag ngarud ti mangiyebkas iti panangbusor iti kinababa ti kasasaad ti tao maipapan iti daytoy; pudno dayta, ti kapadasan iti tunggal panawen ken nasion pinaneknekannan dayta ket masapul ti kasta unay, a panangbalbaliw iti konstitusion iti tao, sakbay ti panangaramidtayo iti sabali a pamay-an.”
Agsipud ta amin dagiti tattao naipasngayda a saan a naan-anay ken managbasol, imposible para iti aniaman a tao a makilangen iti naan-anay ken nainkalintegan a pamay-an kadagiti padana a tao. (Roma 5:12) Dagiti inaagum a personal a pagayatan ti mabalin a mangipaay iti maris wenno mangituray iti pangngeddengna ken tigtignayna. Ket, nupay no ikagumaan iti tao ti mangaramid iti linlinteg a maibusor kadagitoy a naisigud a pagkapuyan, dagitoy saan a maidian ti aniaman a natauan a gobierno. “Awan ti sistema iti gobierno—monarkia man, diktador, naulpit a panangituray, aristokrasia, oligarchy (gobierno nga iturayan ti sumagmamano), republika, puro a demokrasia, wenno ti Partido Komunista—a napatauden ti mangipanamnamanto a ti naimbag ken masirib a pangulo ti kanayonto a mangtimon iti barko iti estado,” insurat ni Laurence Beilenson iti The Treaty Trap. “Ti makagapu a ta dagidiay a mangpili kadakuada wenno mangikabil kadakuada iti panagturay ket tattao. . . . Ket dagiti tattao nga iturayanda saanda met a naimbag ken masirib. No dagiti tattao ayatenda dagiti kaarrubada a kas ti bagbagida, dagiti linlinteg a manglapped, dagiti polis a mangipaalagad kadakuada, ken dagiti armas a mangsalaknib didanton kasapulan, ken kasta met dinton kasapulan dagiti katulagan.”
Nupay marikna ni Beilenson, a kas met ti panagrikna dagiti adu, a ti kasta a “naragsak nga aldaw” ket “saan a dumteng,” dayta a panangmatmat dina ikkaten ti panangusig iti panggep ti Dios a maipaay iti daga. Ti di panagballigi ti tao a mangituray a sisisirib ken sitatalna, aniaman nga aramid ti aramidenna, ti nalawag a nangipakitan a ti sangatauan dina kabaelan nga iturayan ti bagina met laeng. Ti kakaisuna a solusion agpannuray iti Pagarian ti Dios iti sidong ti panangituray iti Anakna ni Jesu-Kristo. Dayta ti makagapu no apay a ni Jesus, iti panangipaayna kadagiti ad-adalanna ti modelo a kararag, insurona ida nga agkararag iti Dios: “Umay koma ti pagariam, maaramid koma ti pagayatam, no kasano idiay langit kasta met ditoy daga.”—Mateo 6:10.
Pagayatan ti Dios a ti Pagarianna, a naipasdeken idiay langlangit, ti pamay-an a mangiyeg iti naan-anay a kappia ditoy daga. Maipapan iti panangituray iti Anakna, ti “Prinsipe iti Kappia,” ti naipaltiingan a salaysay kunaenna: “Ti naarian a pannakabalinna agtultuloyto a dumakkel; ti pagarianna kanayonto nga addaan kappia. Agturayto kas Ari a kasuno ni David, nga ibatayna ti pannakabalinna iti kinalinteg ken kinahustisia, manipud ita agingga iti agnanayon. Ti APO a Mannakabalin-amin ti mangikeddeng kadagitoy amin.”—Isaias 9:6, 7, Today’s English Version.
Saan laeng a patauden dayta a Pagarian ti pudpudno a talna a mangsaknap ti globo no di ket ibanagnanto ti aniaman a saan a nabaelan ti sabali a gobierno: ti panangikkat iti inaagum a pagannayasan ti tao gapu iti natawid a kinaimperpekto. Ta iti sidong ti turay ti Pagarian ti sangatauan, a nabang-aranen manipud iti basol ken ti panangkondenar iti ipapatay, mabalinnan a tagiragsaken ti namnama iti naan-anay, awan patinggana a biag iti maysa a paraiso a daga. (Roma 6:23) Maipaay iti daytoy a panggep, ti Dios “punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Dagiti immuna a bambanag napalabasdan.” Ken ti kari ni Jehova: “Adtoy! Pagbalinek a baro dagiti isuamin a bambanag.” (Apocalipsis 21:4, 5) Daytanto ti sigurado nga agas a maipaay iti napeggad a panawentayo.