Dagiti Baro a Misionero—Naisagana nga Agballigi iti Tay-ak
TI TANGATANG ti kasla napunno ti koriente, nakaragragsak unay idi dagiti 2,121 a tattao a nagtataripnong idi agsapa ti Domingo, Setiembre 9, 1984, idiay Queens, Nueva York, Assembly Hall dagiti Saksi ni Jehova. Ania ti okasion? Isu ti aldaw a panagturpos dagiti 37 nga estudiante a nangbukel ti maika-77 a klase ti Watchtower Bible School of Gilead. Apay ti kasta a kinaragsak? Agsipud ta dagitoy a seremonia ti panagturpos kanayon a mangted kadagiti tumabtabuno ti gundaway a makangngeg kadagiti makapatignay a palawag manipud kadagiti kameng ti hedkuarters ti Watchtower Society, tapno makakitada kadagiti makaparagsak a drama ti Biblia ken dadduma pay a makapabileg a presentasion, ken tapno makiraman iti rag-o dagiti estudiante iti manamnama a pakaitudinganda a misionero. Awan uray maysa kadagiti agdengdengngeg ti napaay.
Tapno marugian dagiti agsasaruno a palawag iti dayta nga agsapa, ni A. D. Schroeder, a kameng ti Bagi a Manarawidwid dagiti Saksi ni Jehova, malaglagipna pay dagiti immuna nga al-aldaw a kunkunana, “Kunkuna idi ni tatangko, ‘No addaanka ti trabaho nga aramiden, alaem dagiti umiso a rimienta ket leppasen ti trabaho iti umiso a pamay-an—dika pampanawan dayta a kagkagudua ti pannakaleppasna.’” Inlawlawagna a dagiti estudiante ti addaan itan kadagiti rimienta, inramanna dayta dagiti makatulong a literatura ti Biblia nga impaay ti Sosiedad a mainayon iti nagun-odanda manipud ti lima-bulan a kursoda iti ministerial a panagsanay. Kalpasanna insalaysayna dagiti mapagulidanan a nabunga a misionero nga itatta naballigida kadagiti destinoda.
Ni Jack Redford, maysa kadagiti instruktor ti Gilead, kastoy ti maikunana: “Dagiti naballigi a misionero us-usarenda ti utekda.” Babaen ti panangdakamatna ti bilin idiay Mateo 22:37 nga ‘ayatenyo ti Dios iti isuamin nga isipyo,’ impakitana no kasano a maaramidan dagiti misionero dayta. Kas maysa a pangarigan, intudo ni Redford iti nasayaat pannakapanunot a panagannad a maipaay iti salun-at nga innala ti maysa a pagassawaan a misionero iti maysa a paset ti Africa. Intan-okna met ti nabayagen a misionero idiay Chile a nangusar ti laingna a nangaskasaba agpapan pay napukawna ti panagdengngegna. “Dakayo nga estudiante mabalin a maipasangokayo met kadagiti kakasta a karit,” kuna ni Redford. “Ngem tunggal karit ket agbalin a makagunggona unay, depende no kasanot’ panangtengngelyo iti dayta.” “Agpanunotkayo,” ti patigmaan ni Redford.
Ti sabali pay nga instruktor ti Gilead, ni U. V. Glass, ti praktikal met ti panangbalakadna. Inyarigna dagiti estudiante kas dagiti bunubon iti maysa a balay a pagbunubonan, inlawlawagna nga itan dandanidan a maimula iti baro nga aglawlawda, ngem rebbengna a “pagtalinaedenda dagiti ramutda a nakatubo iti nateokratikuan a daga.” Pinakdaaranna dagiti estudiante a saanda koma a naingpis panagkudkudilda, wenno bumtakda, no dumakkel dagiti pakarigatan. Sa kalpasanna, nangted kadagiti suhestion no kasano a mapalag-ananda dagiti rigrigat a no maminsan masarakan iti biag iti maysa a misionero.
Ni John E. Barr, a kameng ti Bagi a Manarawidwid, pinalagipanna met dagiti estudiante a maysa kadagiti kangrunaan a nasudi a banag nga ipanda kadagiti pakaitudinganda isu “ti rag-o ni Jehova.” (Nehemias 8:10) “Sapay koma ta daytat’ aglippias kadagiti puspuso dagiti ginasgasut a sabsabali,” kunana. Binagbagaan met ni Leon Weaver dagiti estudiante nga agbalinda koma a pagulidanan iti ayat ken pammati, a maitunos iti 1 Timoteo 4:12. Ket ni Eldor Timm pinaregtana ida a maaddaan iti isu met laeng a “Kayatko” a kababalin nga impamatmat ni Jesus idi immay timmulong kadagiti tattao.—Marcos 1:40, 41.
Ti maudi a nagpalawag iti dayta a bigat isu ni F. W. Franz, presidente ti Watchtower Bible School of Gilead, a nangipalawag iti tema a “Ti Panangsukay iti Kasayaatan a Pannakigayyem iti Intero a Sapasap.” Iti panangilawlawagna a sigun kadagiti pamunganayan a kaipapananda, dagiti Hebreo ken Griego a sasao iti “gayyem” ket mabalin a maipatarus a “managayat,” intudo ni Franz a dagiti estudiante makagun-odda kadagiti pudpudno a gagayyem babaen ti panangipakitada ti pudpudno nga ayat kadagidiay tultulonganda idiay baro a pakaitudinganda. Ngem, nikaanoman, impaganetget ni Franz, a liwayanda ti panangsukay iti kasayaatan a pannakigayyem kadagiti isuamin, dayta ken Jehova a Dios.
Tapno maserraan ti sesion iti agsapa, ti tserman ti programa, ni L. K. Greenlees, inyawatna dagiti diploma. Maragsakan a makaammo dagiti agdengdengngeg a dagitoy a nagturpos manipud 7 a pagilian ket maibaonda kadagiti 13 a nagduduma a dagdaga idiay Africa, iti Central ken Sud America, Asia, Europa ken kadagiti purpuro ti baybay.
Kalpasanna immayen ti programa iti malem. Ni Donald Krebs ti nangaywan ti leksion ti Pagwanawanan iti dayta a lawas, dagiti estudiante ti nagkumento. Kalpasanna nangipabuya dagiti estudiante ti nagsasaruno a nabiag a drama a nangisalaysay kadagiti sumagmamano a makapainteres a paset ti lima-bulan a kursoda. Daytat’ sinaruno ti tampok iti dayta a malem—ti primera klase a drama ti Biblia a mangiladladawan kadagiti suot ken bendision ni Job. Wen, ti programa ti graduasion ti pudpudno a makapasaranta iti naespirituan a napadasan amin iti timmabuno.
Ti Watchtower Society ti nangipuonan ti adu unay a panawen ken panangsanay kadagitoy manamnama a misionero—ngem saan nga di awan panggepna. “Ti Gilead School ti nangisagana kadakayo nga agbalin a naballigi,” kuna ti maysa kadagiti nagpalawag iti klase. Pudno unay, sitatalektayo a ti maika-77 a klase ti Gilead maaddaandanto ti bendision ni Jehova bayat nga ibaklayda dagiti baro a pakaitudinganda kas misionero.