Panagturpos iti Maika-83 a Klase iti Gilead Pudno a Maysa a Naragsak nga Okasion
“AGYAMANKAYO ken Jehova, O dakayo a tattao, ta isu naimbag: ta ti kinamanagayatna agnanayon.” (Salmo 136:1) Daytat’ naimpusuan a rikna amin dagiti 4,391 a timmabuno iti programa iti panagturpos iti Maika-83 a klase iti Watchtower Bible School of Gilead iti daytoy nga otonio. Dagiti palawag, kapkapadasan, ken ti naiparang a drama iti Biblia kabayatan ti programa ti namagawid iti amin a napnuan iti espiritu. Ti panagturpos naaramid idi Setiembre 6, 1987, idiay nagpintas nga Assembly Hall iti Jersey City, a dati a maam-ammo a kas Stanley Theater.
Kalpasan ti panglukat a kanta, ken kararag babaen ken ni John Booth iti Manarawidwid a Bagi, ti tsirman, a ni Albert Schroeder, a sabali pay a miembro iti Manarawidwid a Bagi, inabrasana ti tumunggal maysa iti daytoy a naragsak nga okasion. Dagiti 24 nga estudiante ket naggapuda iti lima a pagpagilian, ket maibaonda ita kadagiti walo a nadumaduma a dagdaga. Ni Kabsat Schroeder itinampokna ti adda a panagtalek ti ili ni Jehova agsipud ta ti pammatida ket naibasar iti kinasigurado. Ammoda, kas pangarigan, a ni Jehova ket isut’ Soberano iti Uniberso ket ti Saona, ti Nasantuan a Biblia, ket naan-anay a kinapudno. Daytoy ket maysa a nabatad a panangidilig kadagiti pilosopia a naibasar kadagiti panagduadua ken pagpagarup.
Ti immuna a nagpalawag ket ni Martin Poetzinger, maysa met a miembro iti Manarawidwid a Bagi, a nangbusbos iti siam a tawtawen iti kampo konsentrasion dagiti Nazi. Ti temana ket “Iti Siasino ti Pagtalkanyo?” a naibasar iti Proverbio 3:5, 6. Ingunamgunamna kadagiti estudiante ti pannakasapul iti naan-anay a panagtalek ken Jehova ken iti makitkita nga organisasionna, kasta met iti panangpaneknek iti kinamapagtalkan ti tunggal maysa. Ti pannakasanay dagiti estudiante iti Gilead ket maysa laeng a pamuon; itatta kasapulan nga agibangonda iti dayta babaen iti panangsurotda iti balakad ni apostol Pablo idiay Efeso 5:15, 16: ‘Dikay agnengnengneng,’ kinuna ti agpalawag. ‘Maaddaankayto kadagiti problema iti pakaitudinganyo a kas misionero no maipapan kadagiti pagsasao, klima, taraon, ken dadduma pay; ngem babaen ti panagtalekyo ken Jehova, masolbaryonto amin dagitoy a problema. Ti panagayatyo iti tattao isut’ tulbek ti panagballigiyo. Ti tunggal pammabileg ket aggapu iti Dios; ti tunggal panangupay ket aggapu ken Satanas.’
Ti simmaruno a nagpalawag ket ni Eldor Timm, maysa a miembro iti Factory Committee, a nangibasar iti komentona idiay 2 Corinto 13:5: “Sukimatenyo dagiti bagbagiyo met laeng no addakayo iti pammati.” Dagiti estudiante nalpasdan iti naisurat pannakasubok, kinunana, ngem sumangodanto kadagiti ad-adu pay a pannakasubok kadagiti nakaitudinganda a kas misionero. No kasano a sanguenda dagita a pannakasubok ti mangikeddengto iti panagballigida a kas misionero. Kasapulan nga agsalukagda a maibusor iti sobra a panagtalek babaen iti panangimdeng iti balakad: “Ti mangipagarup nga adda a sitatakder kitaenna ta di maikulbo.” (1 Corinto 10:12) Agtultuloydanto a maaddaan iti irarangay no salimetmetanda ti naimbag a kababalin iti panunot.
Maysa a miembro iti Service Department, ni Joel Adams, isut’ simmaruno. Nagsarita iti tema nga: “Agpanunot a kas ken Jesus, Mangipakita iti Personal nga Interes kadagiti Dadduma.” Anian a nagpintas nga ulidan ti impaay ni Jesus iti daytoy a banag! Ti ulidanna iti di kinamanagimbubukodan ken kinapakumbaba ti naitampok kadatayo idiay Filipos 2:3-5. No ti dadduma ket agbalinda a suot kadatayo gapu kadagiti pagkuranganda, wenno ti kinaawan ti kinaannadda, agtignaytay koma mangipakita iti kinamanangngaasi kadakuada. Kabayatan ti kurso ti Eskuelaan iti Gilead, adut’ nangipakita iti interes kadagiti estudiante; itatta agpannuray kadakuada ti panangaramid met iti dayta kadagiti dadduma. Dagiti naballigi unay a misionero ket dagidiay mangipakita iti interes kadagiti dadduma no maipapan iti kustombre, pagsasao, pakasapulan, ken dadduma pay.
Sumaruno, napabileg dagiti estudiante babaen iti maysa a misionero kadagiti adun a tawtawen, ni Lloyd Barry, maysa met a miembro iti Manarawidwid a Bagi. Nagpalawag iti tema nga “Agkanta ken Jehova,” a naibasar iti Salmo 96:1. Kaay-ayo ti ili ni Jehova ti panagkanta. Ti panagkanta kumuykuyog iti kinaragsak, gapuna pinabilegna dagiti estudiante a saan pulos a mangpukpukaw iti rag-o ti panangidanon iti kinapudno kadagiti dadduma. ‘No kasapulan ti panangadalyo iti baro a pagsasao,’ kinunana, ‘ipapusoyo dayta manipud iti rugina. Ti Diablo padasennanto ti mangupay kadakayo, pagagarennakayo nga agawid, mangiyeg iti panagsisina kadakayo. Saanyo pulos isuna a palubosan iti maysa a pulgada!’ Ni Kabsat Barry nadakamatna ti “dekano dagiti misionero,” a ni Edwin Skinner, isu nga addaanen 60 a tawtawen iti nakaitudinganna a sabali a pagilian idiay India, ket ita nga agtawenen iti 93 kaskasdi nga agtrabaho a naan-anay iti uneg iti maysa nga aldaw. Sigun ken ni Kabsat Skinner, ti tulbek iti panagballigi kas maysa a misionero ket buklen ti uppat a sasao: “Ti kinapakumbaba isut’ kangrunaan!”
Kalpasan dagitoy a komento, ti tsirman binasana dagiti adu a telegrama a mangkablaaw kadagiti estudiante ken mangipapaay iti panangabrasa kadakuada. Dagiti mensahe ket naawatda manipud idiay Bolivia, Canada, Ecuador, Honduras, España, Sweden, ken Trinidad.
Ni Jack Redford, maysa kadagiti instruktor iti Eskuelaan iti Gilead, nagsarita iti tema nga “Itultuloyyo ti Agbalin a Gayyem ni Jehova.” Inrugina babaen iti panagkunana nga adu dagiti institusion iti komersio a mangitukon iti panagsanay iti panangragpat iti panagballigi iti negosio babaen iti pananggun-od kadagiti gagayyem ken panangimpluensia kadagiti tattao. Dagiti estudiante, kas misionero iti masanguanan, nasursuruanda met no kasano ti maaddaan kadagiti gagayyem ken no kasano a maimpluensiaan dagiti tattao, saan a maipaay iti kinaagum, nupay kasta, ngem tapnon dagita a tattao ket agbalinda a gagayyem ti Dios. ‘Ti biagyo ket maysa a panagsakripisio iti bagi,’ kinuna ti nagpalawag. ‘Inawatyo nga awan bayadna, itedyo nga awan bayadna. Awanen ti dakdakkel a pannakapnek wenno rag-o ngem iti panagballigi iti panangtulong kadagiti tattao nga agbalin a gagayyem ti Dios. Ti pannakigayyem iti Dios isut’ kadadakkelan a dayaw a magun-odan ti maysa a tao. Ti Santiago 2:23 ibagana a nagbalin ni Abraham a gayyem ni Jehova gapu iti panangalagadna iti pammati iti Dios. Napan iti adayu a daga ket saan a timmalliaw iti likudan; kasta met masapul a dakayo a misionero saankayto a tumalliaw iti likudan, ngem, imbes ketdi, kumitakay iti sanguanan kadagiti bendision idiay baro a lubong ti Dios.’
Ni Ulysses Glass, maysa nga instruktor iti Gilead ken rehistrador iti eskuelaan, nagsarita iti suheto a “Ti Kamaudianan a Leksion.” Impamatmatna a naadalen dagiti estudiante no kasano a dagiti linlinteg ni Jehova ket dakkel ti saklawenda ken pudno a kalikagumanda ti panagregget. Kas maysa a pangarigan, intudona dagiti adu a detalye a nairaman kadagiti sakripisio a maidaton iti Aldaw iti Pannakaabbong ken dagiti adu nga an-animal a nairaman. (Levitico, kapitulo 16) Kinomendaranna dagiti estudiante iti panangiparangarangda iti naimpusuan unay a panangipategda ket kinunana a ti Salmo 145:7 deskribirenna a nalaing ti kababalin ti panunotda: “Iyesngawdanto ti dakkel a pannakalagipda iti dakkel nga a kinaimbagmo, ken ikantadanto ti kinaimbagmo.” Iti panangserrana, inadawna met ti Proverbio 3:5-7, nga impaganetgetna a kasapulanda iti ‘panagtalek ken Jehova iti amin a pusoda.’
Ni Kabsat F. W. Franz, ti 94 ti tawenna a presidente iti Eskuelaan iti Gilead ken kasta met a presidente iti Watch Tower Bible and Tract Society, impaayna ti pangserra a palawag iti dayta a bigat. Iti dayta insalaysayna ti historia iti Sosiedad manipud idi panawen ti immuna a presidente, ni C. T. Russell, agingga iti pannakabuangay ti Eskuelaan iti Gilead. Ti nabileg ken naregta a presentasion ket inapresiar unay ti isuamin. Kalpasan ti palawagna, inawat dagiti 24 nga estudiante dagiti diplomada agraman iti sumagmamano a regalo, ket kalpasanna maysa kadagiti estudiante ti nangbasa iti maysa a nagsayaat a surat a nangiyebkas iti panangapresiar dagiti estudiante kadagiti amin a tulong nga inawatda manipud iti Manarawidwid a Bagi ken kasta met manipud iti pamilia ti Bethel.
Kalpasan ti intermission nga agarup dua nga oras, ni Phil Wilcox, a maysa a miembro iti Watchtower Farms Committee, inmatonanna ti napaababa a panagadal iti agdama a pagadalan iti Pagwanawanan a dagiti salsaludsodna ket sinungbatan dagiti estudiante. Daytat’ sinaruno ti programa dagiti estudiante a ditoy ti nangiparanganda kadagiti kapadasan a tinagiragsakda kabayatan iti panangaskasabada kadagiti malem ti Mierkoles idiay siudad ti Nueva York. Daytoy ket paset iti panangsanay iti Gilead. Kasta met nga indemostrarda dagiti nadumaduma a problema a mabalin a namnamaenda inton makagtengda kadagiti nakaitudinganda iti sabali a pagilian.
Kas maysa a maikanatad a pangserra iti intero a programa, dagiti estudiante nangiparangda iti addaan maiyanatup a kawes a drama iti Biblia iti dua a paset, a mangitampok iti kinaganat iti panawen a pagbibiagantayo. Ti drama inaramidna daytoy babaen iti panamagdiligna iti kaaldawantayo kadagiti napalabas a panawen ti panangukom. Idi 4:15 t.m., buyogen ti panangkanta iti kanta nga “Irarang-ay ti Teokrasia” ken iti maysa a kararag babaen iti maysa a miembro iti Manarawidwid a Bagi a ni Milton Henschel, ti kararagsakan unay a programa dimteng iti panagngudona.
[Ladawan iti panid 23]
Maika-83 a Klase dagiti Nagturpos iti Watchtower Bible School iti Gilead
Iti listaan iti baba, dagiti binatog ket nabilanganda manipud iti sango nga agpalikud ket dagiti nagan nailistada manipud iti kannigid nga agpakannawan iti tunggal binatog.(1) Melin, D.; Goode, M.; Ramos, M.; Chow, N.; Hermanson, A.; Dagostini, D. (2) David, E.; DiPaolo, A.; Neiman, D.; Shephard, J.; Foster, M.; Ramos, R. (3) Foster, W.; Melin, D.; Fristad, D.; Fristad, R.; White, L.; Dagostini, F.; (4) Neiman, D.; Ness, S.; Shephard, D.; Goode, J.; White, K.; Hermanson, L.