Dagiti “Panagrang-ay ti Pagarian” a Kumbension—Anian a Nagbaknang a Naespirituan a Padaya!
NI Jehova inkarina a ‘ti bassit agbalinto a sangaribo ket ti kabassitan maysa a napigsa a nasion.’ Isu a mismo “aramidennanto a nadaras iti panawenna.” (Isaias 60:22) Kadagiti dadduma a dagdaga nanipud Gubat Sangalubongan II, dagiti manangiwaragawag iti Pagarian ti rimmang-ay iti naminribo a daras. Agingga iti daytoy nga aldaw, dagiti Saksi ni Jehova aglaklak-amda kadagiti naisangsangayan a panagrang-ay idiay Brazil, Italia, Japan, Mexico—kinapudnona iti intero a daga. Anian a maiyanatup, ngarud, a ti nabiit pay nga asambleada ti napanaganan dagiti “Panagrang-ay ti Pagarian” a Kumbension Distrito!
Ngem siempre, ti ad-adda a napatpateg ngem kadagiti panagrang-ay laeng ti bilang, isuda dagiti nabaknang a naespirituan a bendision a tinagiragsaktayo kas Saksi ni Jehova. Ket anian a nagadu dagiti tinagiragsaktayo iti daytoy a kumbension! Ti panangrepaso kadagiti tampok ti programa ti mangipalagip kadagiti is-isiptayo, mangparagsak ti puspusotayo, ken mangpapigsa ti determinasiontayo a mangiyaplikar kadagiti nagsayaatan a balakad.
Ti Pangkaaduan nga Epektona
Iti intero nga Estados Unidos laengen 117 a kumbension ti naangay. Ti dagup a 1,159,898 ti timmabuno (35,828 nga ad-adu pay ngem idi napan a tawen), ken 10,625 dagiti nabautisaran. Ti uppat nga aldaw ti napno kadagiti naespirituan a panagpiesta ken panagragragsak, ket ti programa ti naiyarig kas maysa a trompeta a mangiyaweng iti nalawag a nota—dagiti Nainkasuratan a balakad a mangpabileg ti puso ken konsiensia.
“Dagiti palpalawag naiturongda iti tunggal paset iti panagbiag,” kuna ti maysa a kumbensionista. Dagiti komento a kas kadagitoy, ti nangngegan met: ‘Inton makapagawidakon, ad-adunto ti pagpampanunotak ngem kalpasan dagiti napalabas a kumbension.’ “Kanayon a kasla ti kumbension iti daytoy a tawen kasla nasaysayaat ngem iti napalabas a tawen, ngem ti kumbension iti daytoy a tawen ti kasasayaatan pay laeng!” Wen, dagiti programa ti pudno a naisangsangayanda.
Dagitoy a kumbension nagserbida met a mangipablaak ti nagan ken Pagarian ni Jehova. Kas pangarigan, naaramidan daytoy idi adu kadagiti manangiwaragawag iti Pagarian nakiramanda iti tay-ak iti ministerio iti malem ti Biernes. Sa, adda met, ti nasayaat a panangipablaak dagiti pagiwarnak. Dagiti periodiko, radio, ken report dagiti telebision ti naisentro kadagiti ar-aramid ti kumbension ken ti pammati dagiti Saksi ni Jehova.
“Ti Bassit Agbalinto a Sangaribo”
Naibatay iti Isaias 60:22, daytoy ti tema iti panglukat nga aldaw. Ti palawag nga “Agimdeng ken Agbalin a Masirib iti Masanguananyo” ti nangigunamgunam kadagiti kumbensionista nga agimdengda kadagiti balakad nangnangruna nga agaplikar kadakuada ken sadanto ipakat dagitoy no makapagsublidan iti pagtaenganda. (Proverbio 19:20) Kalpasanna immay ti palawag ti tsirman a “Sangsangkamaysa Itan-oktayo ti Nagan ti Dios,” a makaparegta unay a panangisalaysay iti Salmo 34. Ti panangitan-ok iti nagan ni Jehova kaipapananna ti panangidayaw iti dayta iti amin a kasasaad ken panagraem kadagiti isuamin a naespirituan a sagana iti Namarsua. Ket anian ti rebbeng a panagyamantayo iti aglaplapusanan a naespirituan a sagana nga inaramidna babaen iti organisasionna!
Talaga a makaparagsak-puso, isu ti paset a “Panangiwaragawag kadagiti Ar-aramid ni Jehova Agpaay iti Sumaganad a Kaputotan.” Iti adun a tawtawen dagiti natataengan nga adda iti nagtetengngaantayo linak-amda ti kinaimbag ti Dios ket gapuna adu ti maibagada kadagidiay nga agtutubo. Ket dagiti natataengan a Saksi saanda nga agretiro. Ta, amin dagiti miembro iti Bagi a Manarawidwid nagtalinaedda nga aktibo numan pay ti edadda ket manipud 59 agingga iti 91 años! Kasta met, dagiti Nainkasuratan ken moderno-aldaw a pangarigan ipakitada no kasano a maibagay para kadagiti agtutubo a kaputotan a pagraeman ken makitunos kadagiti natataengan nga ad-adipen ni Jehova.
Ti kinapateg ti kinasanto ti maipaganetget iti palawag nga “Agtalinaed nga Awan Tulawna, Awan Pakapilawanna ken Sitatalna.” (2 Pedro 3:14) Tapno makapagtalinaed nga awan tulaw, masapul a liklikantayo ti imoralidad ken kinaagum ti lubong. Ti panangtaginayon ti natalna a pannakirelasion kadagiti dadduma sapulenna a manangpabus-aytayo koma no maipapan kadagiti kaykayattayo ken agtignaytayo kas kadagiti nanunumo.
Sumaruno, naigunamgunam kadagiti nakikumbension nga “Agsao Maipapan iti Dayag iti Kinaarina.” Kas pangarigan, mabalintayo a makapangasaba a di pormal no agitugtugottayo kadagiti traks ken dadduma pay a literatura, nga usarentay a naimbag dagiti gundawaytayo ken sukayan iti positibo a panagpampanunot. Ti tampok a palawag a napauluan “Ti Panagrang-ay Agtultuloy” impakitana a dadakkel a bilang ti mangab-abrasa iti naimbag a damag. Ta, iti 40 a tawtawen dagiti Saksi ni Jehova rimmang-ayda manipud agarup 126,000 agingga iti nasursurok ngem 2,842,500, a nasurok a 7,416,900 dagiti timmabuno ti Memorial! Dagiti makaparegta a sasao ti nangngegan manipud sumagmamano a nakiraman iti daytoy engrande a panagrang-ay.
Ti programa iti umuna nga aldaw nagpatingga babaen iti makapatignay a palawag a “Dagiti Makalasat nga Agturong iti Baro a Daga” ken ti pannakairuar ti baro a libro a napauluan iti Survival Into a New Earth. Insentro dayta ti atension kadagiti 47 a propetiko a padron ken ti panangisalaysay kadagiti tattao a makalasatto iti panungpalan daytoy a sistema ken panagtawiddanto iti naindagaan a paset iti Pagarian ti Dios. Daytoy a publikasion ti pudno a naawat a buyogen ti dakkel nga entusiasmo.
“Panangiwaragawag iti Pagarian”
Ti maikadua nga aldaw ti kumbension ti addaan iti daytoy kas temana, ken impaganetget ti programa ti pribilehiotayo a panangiwaragawag iti mensahe iti Pagarian. Dagiti payunir a napagsaludsodan bayat iti palawag a “Sumrekkayto Aya iti Silulukat a Dakkel a Ruangan?” insalaysayda dagiti panagsakripisioda a nagbalin nga amin-tiempo a ministro ngem pinaneknekanda a ti iseserrekda iti daytoy a dakkel a ruangan ti nangibunga iti nauneg a pannakapnek ken dagiti bendision a pudno a mamabaknang iti maysa. (Proverbio 10:22) Dagidiay awan iti amin-tiempo a ministerio ti addaan rason a pagpanunotanda a sisiserioso idi nga insaludsod ti nagpalawag: “Ipalubos kadi dagiti kasasaadtayo a makastrek iti payunir a serbisio?”
Kas apag-isu a naipakita iti sumaganad a palawag, ni apostol Pablo “Naregget unay iti Naimbag a Damag iti Pagarian.” (Aramid 18:5) Yantangay ti panangikasaba iti naimbag a damag ket maysa kadagiti kangrunaan a rason iti kaadda iti kongregasion Kristiano, tunggal agdama-aldaw a saksi ni Jehova ti nainsiriban a maisaludsodna: “Maysaak aya a naregta a manangiwaragawag iti Pagarian? Adda aya aniaman a rason a diak mabalin ti makipaset a regular iti kada lawas iti sumagmamano a paset iti panangikaskasaba iti Pagarian?”
Ti palawag nga “Iti Panagsanayyo Ragpaten ti Nadiosan a Debosion” impakitana a ti kasta a debosion kaipapananna ti panagbalin a personal a nadekket ken Jehova. Ket numan pay kasapulan met ti sumagmamano a sekular nga edukasion nasayaat no maisaludsodtayo: Ania ti kalatko, maysa a nailubongan a karera wenno ti panangay-ayo ken Jehova?
Ti nailubongan nga edukasion ti nausig met iti moderno-aldaw a drama a Ti Nadiosan nga Edukasion Parang-ayenna ti Bunga ti Pagarian. Pinagdilig daytoy a drama dagiti peggad a gagangayen iti panagadal kadagiti kolehio ken dagiti gunggona iti amin-tiempo a serbisio. Inapresiar dagiti agtutubo dagiti diretsa a balakad, ket maysa nga agtutubo a lalaki ti nagkuna: “Dayta a drama ket saan a parparbo.”
Ti makaparagsak a surpresa iti dayta nga agsapa isu ti pannakairuar iti Kingdom Melodies No. 5. Ket nagadu dagiti nangiyebkas iti panangapresiarda kadagiti baro a kankanta a nausar iti programa.
Ti programa iti malem nangrugi iti tampok a palawag a “Dagiti Bunga iti Pagarian Rumangrang-ay iti Intero a Lubong.” Inlagalaga dayta ti bersikulo por bersikulo a panangisalaysay iti Isaias kapitulo 60 babaen iti panangrepaso iti panagrang-ay iti Pagarian nanipud 1919, a sinagudayna dagiti nangangato a punto a kas ti panangaklon iti nagan a Saksi ni Jehova idi 1931 ken ti pannakailasin ti “dakkel a bunggoy” idi 1935. (Isaias 43:10-12; Apocalipsis 7:9) Naallukoy met ti atension iti panagrang-ay a tinagiragsaktayo bayat ti Gubat Sangalubongan II ken nanipud idin, a mangitungtungpal ti Isaias 60:22.
Amin daytoy ti bagbagay a pakpakauna ti palawag a “Maysa a Naragsak nga Ili—Apay?” Anian dagiti rason a pagrag-oantayo! Ti diostayo ket Dios a naragsak, ket ti rag-o maysa kadagiti bungbunga ti espiritu. Tagtagiragsakentayo ti lawag ti kinapudno, ti pannalaknib dagiti naibatay ti Biblia a moralidad, ti kasasayaatan a panaglalangen, ken ti pribilehio a panamagbalin a naragsak ti puso ni Jehova babaen ti intay panangsalimetmet ti kinatarnawtayo ken panangikaskasaba iti naimbag a damag. Kinapudnona, adu dagiti kumbinsionista a siraragsak a nakiraman iti trabaho a panangaskasaba iti Pagarian iti dayta a malem, a simmaruno iti palawag a nangpabara iti panangapresiar kadagiti nagadu a kinamanagdudumaduma dagiti naimaldit a material a makatulong iti ministeriotayo.
“Panangitungpal kadagiti Bambanag a Naad-adaltayo”
Ti maikatlo nga aldaw nangrugi babaen iti panangisalaysay dagiti dua a panglakayen iti inaldaw-aldaw a teksto ken panangisentro iti atension iti napalabas a tema. Kalpasanna simmaruno ti simposium a napauluan “Pannakairukod kas Nakristianuan a Pamilia.” Umuna a nausig isu ti rebbengen ti Kristiano nga asawa a lalaki, a mangsungsungbat kadagiti salsaludsod a kas kadagitoy: Naannadkay met laeng a di mangus-usar iti kinauloyo a maipaay iti inaagum a panggep? Mangipakpakitakay met laeng aya ti nasayaat nga ulidan babaen iti panangsalimetmetyo kadagiti material nga intereses iti umiso a lugarda bayat ti panangisursuroyo kadagiti annakyo a mangipangpangruna iti Pagarian iti panagbiagda? Dagiti ngudo ti lawas mamatmatmatanda laeng aya a kas panawen a maipaay iti panaglinglingay wenno kangrunaanna kas gundaway a makiraman iti sagrado a serbisio?
Ti sumaganad a palawag, “Maysa nga Asawa a Babai a Mangipakpakita ti Napasnek a Panagraem,” intudona a ti Nainkasuratan nga akem ti asawa a babai ti namunganay iti maysa a nasirib, nalinteg ken naayat a Dios a makaammo no ania ti nasayaat nga agpaay kadagiti isuamin. Siempre, ti asawa a babai ket mapakitaan met iti panagraem. Mabalin a saan a kanayon a nalaka para iti maysa a babai a mangipakita iti nauneg a panagraem ken lakayna, agsipud ta isu ket saan a perpekto. Ngem ti panangipakita iti kasta a panagraem magun-odanna ti anamong ni Jehova, a mangibunga iti panagtutunos ti pamilia, ken mangyeg ragsak iti babai.
Nangnangruna a nagunggonaan dagiti agtutubo manipud iti palawag a “Dagiti Annak a Mangidaydayaw kadagiti Dadakkelda.” Ti panangidayaw kadagiti nagannak kasapulanna ti panagtulnog kadakuada manipud iti puso ken salwadan ti puso kadagiti di umiso a pagannayasan. Gapuna iti Kristiano nga agtutubo nainsiriban a maisaludsodna: Ti kadi ar-aramidek mangyeg dayaw iti Dios, kadagiti dadakkelko, ken kasta met kaniak?
Ti kanayonan a balakad a maipaay kadagiti agtutubo ti naidatag iti palawag nga “Agtutubo, Dikayo Paallilaw.” Inraman dayta ti sumagmamano a nasayaat a panagsaludsod ken panangipaganetget iti pannakasapul a mangparmek iti panagregget ti Diablo a mangallilaw kadatayo. Napasarunuan daytoy iti palawag a “Dagiti Annak a Lallaki a Mangparagsak iti Puso ni Jehova,” a nangipakita a ni Jesus, ni David, ken dagiti dadduma pay pinaragsakda ti puso ni Jehova iti kinaagtutuboda. Umasping met, babaen iti nasayaat a kababalin ken naregta a serbisio adu kadagiti agtutubo iti nagtetengngaantayo ti mangparparagsak met iti puso ni Jehova ita. (Proverbio 27:11) Anian a pribilehio!
Ti palawag iti bautismo, “Panagpaituray iti Sidong ti Mannakabalin nga Ima ni Jehova,” impaganetgetna a ti maysa a tao ket mabalin a nasungdo iti organisasion ti Dios wenno ken Satanas. Ti dedikasion ken bautismo sapulenna ti panagbalbaliw ti panagpampanunottayo, panagsasao, ken panagtigtignay ken sapulenna ti regular a kaaddatayo iti panaggigimong ken ti naan-anay a pannakipaset iti Nakristianuan a ministerio.
Dagiti tallo a kangrunaan a rebbengen dagiti manangaywan ipaganetgetget met iti palawag iti malem a “Dakayo a Panglakayen Tuladenyo ti Naindaklan a Pastor.” (1) Masapul nga alaen a sisiserioso dagiti panglakayen ti obligasion a mangtaraon iti arban ti Dios, a liklikan dagiti panagsagana iti maudi a minuto. (2) Babaen iti ulidan ken pannursuro masapul a salaknibanda ti arban manipud kadagiti peggad kas ti kinalulok, aglablabes a ragragsak, dagiti di umno a sekso, ken apostasia. (3) Kasapulan met a makiraman a regular dagiti panglakayen iti trabaho a panangipastor.
Ti diskusion iti nagbaetan iti maysa a panglakayen ken ti ministerial nga adipen ti sumaganad a mangilawlawag iti “Aniat’ Kaipapanan ti Panagpaituray iti Autoridad ti Pagarian.” Ti ramut ti di panangikaskaso iti umiso nga autoridad isu ti kinaagum, a daytat’ nangrugi iti Diablo. Ti panagpaituray iti autoridad iti Pagarian kaipapananna ti panangsurot kadagiti prinsipio iti Biblia ken ti panagpaituray kadagiti nadutokan a mangidaulo kadatayo. Kasanon no ti maysa a nasinged a gayyem ibagana kadatayo nga isut’ nakaaramid ti nadagsen a basol ngem kayatna nga ilimed pay dayta? Ti makasukimat kararua a palawag a “Dikay Makiraman iti Basbasol dagiti Dadduma” impaganetgetna ti panagbalin a nasungdo ken Jehova ken iti organisasionna. No ditay maallukoy ti mariribukan konsiensiana a gayyemtayo nga agkompable kadagiti panglakayen rebbengna a datayo ti mapan kadakuada maipapan iti dayta a banag. Kinapudnona, daytoy ti agpaay iti kabukbukodan a naespirituan a salun-at ti managbasol, ket ipamatmat dagiti report a sumagmamano kadagiti indibidual nagtignayda a maitunos iti daytoy a balakad.
Maysa a palawag a nangparegta kadagiti adu a nasayaat a komento isu ti palawag a napauluan “Iti Ania a Lamisaan ti Pangpangananyo?” Babaen iti panangpalawa iti prinsipio iti balakad ni apostol Pablo iti 1 Corinto 10:14-22, mailasintayo a ti pannangan iti lamisaan ni Jehova kaipapananna ti panangted iti Dios iti panagdayaw a maiparbeng kenkuana ken panagtaraon kadagiti kinapudnona. Masapul a liklikantayo “ti lamisaan dagiti sairo” babaen iti panagalwadtayo a maibusor kadagiti bambanag a kas iti narugit a sekso, materialismo, di umiso a panaglinglingay ken dagiti pilosopia a manglalais iti Sao ti Dios. Ti pananglimitar kadagiti bagbagitayo iti lamisaan ni Jehova ti mangibunga iti rag-o, pannakapnek, ken iti sigurado a namnama.
Ti pangserra a palawag iti maikatlo nga aldaw ti napauluan “Dagiti Sagrado a Kasuratan Parang-ayenda ti Umiso a Pannakaammotayo iti Dios.” Kalpasan iti panangtuntonna ti rekord ti Watch Tower Society iti panagimaldit kadagiti nadumaduma a Biblia, pinaragsak ti nagpalawag dagiti managdengngegna babaen iti panangiyanunsio iti pannakairuar iti New World Translation of the Holy Scriptures—With References. Daytat’ naglaon iti nasurok a 125,000 a cross-references, dagiti makatulong unay a footnotes, ken ti napateg unay nga apendise. Anian a tulong kadagiti estudiante iti Biblia!
“Ti Idadakkel ti Turay iti Pagarian Awan Inggana”
Isu daytoy ti tema iti maikapat ken maudi nga aldaw iti kumbension. Ti umuna a kangrunaan a palawag naisentro iti saludsod a “Kagurayo Aya ti Dakes?” Kasapulantay ti kinasirib a mangikeddeng no ania ti dakes ken masapul ti aktual a pananggura wenno panagsimron, iti kinadakes, ta ti panangsurot iti di umiso a kurso mangyeg iti kinaawan pabor ni Jehova ken daytat’ mangdangran kadatayo ken kadagiti dadduma. (Roma 12:9) Mainayon pay, rebbeng a bigbigentayo a no kuna ni Jehova a ti maysa a banag ket dakes, talaga a dayta ket dakes ket rebbeng a lisiantayo dayta.
Sumaruno, naipaganetget a ti “Panagrang-ay ti Pagarian Nayonanna dagiti Rebbengen.” Wen, ti dakkel a panagrang-ay ikabilna ti obligasion kadagiti amin nga addan iti kinapudno a nabaybayag. Masapul nga aywananda dagiti naespirituan nga intereses dagiti kabbaro. Mairaman kadagiti dadduma a bambanag, maaramid daytoy babaen iti panangipakita iti kinamanagpadagos ken panangipakita iti nasayaat nga ulidan iti amin a porma iti sagrado a serbisio.
Agannad a Maibusor iti Nakababain a Kinamaag ti paulo ti maikadua a drama. Siepektibo a nailadawan ti dakes a nagtungpalan ti kinaagum ni Acan. (Josue, kapitulo 7) Impakita met ti drama no kasano a ti umas-asping a pasamak ti nakababain a kinamaag ket lapdanna ti panagayus ti nasantuan nga espiritu ti Dios iti kongregasion. Anian ti panangipaganetget daytoy ti pannakasapul ti panangaramid ti pasettayo a mamagtalinaed a nadalus ti organisasion bayat a bambantayantayo met ti mismo a puspusotayo a maibusor kadagiti pannulisog!
Ti malem nangrugi iti palawag publiko a “Ti Gobierno a Makaaramid kadagiti Di Maaramidan ti Tao.” Mabalinyo a basaen ti impormasion manipud iti daytoy makaparagsak-puso a mensahe iti panid 10 ingganat’ 20 iti daytoy a ruar Ti Pagwanawanan.
Simmaruno ti palawag a “Ti Dayaw a Panangibaklay iti Nagan ni Jehova.” Naibatay dayta ti broshur a The Divine Name That Will Endure Forever, a nairuar iti katengngaan dayta nga aldaw. Kuna ti nagpalawag a ti kapapatgan a kinapudno ti Biblia ket saan a ti subbot wenno ti namnama ti biag idiay Paraiso no di ket ti kinapudno a ni Jehova isu ti maymaysa a pudno a Dios. Kas manangawit iti nagan ni Jehova, masapul a bigbigentayo nga isu ti Naindaklan a managpanggep, ayatentay dagiti kualidadna ken aramidentay ti amin a kabaelantayo a mangtulad kenkuana nga ipakaammotayo ti naganna iti isuamin a gundaway.
Iti maudi a palawag a, “Nakasagana ti Organisasion ti Pagarian a Maipaay iti Ad-adu a Panagrang-ay,” impaganetget ti nagpalawag ti naindaklan a pribilehiotayo nga agbibiagen iti daytoy a panawen ti panagrang-ay. Nupay kasta, masapul a taginayonentayo ti kualidad ti panagdaydayawtayo, ket tunggal maysa masapul a salimetmetantayo ti panagadelantartayo. Kas kinuna ti maysa a nagpalawag iti pangserra ti palawagna: “Babaen ken Jehova ken ti Anakna a mangipapaay iti nadiosan a panangtulong kadatayo, agtultuloytayo nga umadelantar kas maysa nga organisasion iti Pagarian a nakasagana a maipaay iti ad-adu pay a panagrang-ay. Addaantayo iti amin a rason a mangitan-ok a sangsangkamaysa iti nagan ti Dios itan ken iti agnanayon.”
Gapuna dagiti “Panagrang-ay ti Pagarian” a kumbension Distrito ti nakatignay iti maysa a positibo ken naespirituan a pannakaawis. Manipud pangrugianna agingga iti panagpatinggana, pudno a daytat’ maysa a nabaknang a naespirituan a padaya.
[Ladawan iti panid 24]
Dagiti moderno-aldaw a panangiyaplikar kadagiti prinsipio ti Biblia nangted kadagiti drama ti kumbension ti kanayonan a bilegda
[Ladawan iti panid 25]
Dagiti rinibribo a nabautisaran nagpaiturayda iti sidong ti mannakabalin nga ima ni Jehova
[Ladawan iti panid 26]
Maragsakan dagiti kumbensionista nga immawat iti naisangsangayan nga edision a pagreperensiaan a New World Translation
[Ladawan iti panid 27]
Ti maysa a makatignay a drama ti Biblia impaganetgetna ti panagannad iti nakababain a kinamaag