Ti “Nadiosan a Talna” a Kumbension Distrito—Ti Apagpag-isu a Kasapulantayo!
“NADANON dagiti puspuso ken naapektaran dagiti kababalin.” “Nangisagana ni Jehova ti maysa a bangkete dagiti adu a nakaskasdaaw a putahe.” “Dagiti palpalawag ti prangka ken espisipiko.” “Ti apagpag-isu a kasapulantayo ITA!” “Isu daytoy ti talaga a kasapulantayo!”
Dagita ti gagangay kadagiti adu nga ebkas ti panangipateg a nangngeg a maipaay ti 1986 “Nadiosan a Talna” a Kumbension Distrito dagiti Saksi ni Jehova. Amin dagita a balbalikas ipakitada a dagidiay timmabuno impangagda dagiti nasasaayaat a balakad nga inted agpadpada ti tsirman ken ti panglukat a palawag: “Agimdengkayo ket Alaenyo ti Kababagas Dayta.”
Gapu ta ti tema ti talna ti naaramid a prominente unay iti Sao ti Dios, a ti termino napasamak iti nasurok ngem 300 a daras idiay Biblia, maiyanatup laeng a daytat’ maaramid a tema dagiti 1986 a kumbension distritotayo. Kinapudnona, 18 kadagiti naipaltiing a sursurat manipud Roma ingganat’ Apocalipsis ti nangrugi kadagiti sasao kas ti, “Parabur ken talna ti umadu koma kadakayo.” Laglagipen koma nga iti Hebreo a Kasuratan ti sao a naipatarus a “talna” ket sha·lohmʹ, a kaipapananna saan laeng a ti kinaawan ti gubat ken gulo no di ket isingasingna pay met ti salun-at, rang-ay, ken pagimbagan.—1 Pedro 1:2.
Masansan a ti talna ti naitampok iti intero a programa. Kas impaganetget ti keynote speaker, ni Jehova isu “ti Dios ti talna” ken “ti Dios a mangted ti talna.” Ti Anakna, ti “Prinsipe ti Kappia,” ti nangikari ti talna kadagiti paspasurotna. (Filipos 4:9; Roma 16:20; Isaias 9:6; Juan 14:27; 16:33) Impakita pay met ti keynote speaker a ti talna a tagtagiragsaken dagiti Saksi ti naisangsangayan ta daytat’ saan nga agpannuray kadagiti makinruar a sirkumstansia. Daytat’ agpannuray iti panagraemtayo iti autoridad, nga isu ti rason no apay a ti lubong ket awanan talna—daytat’ awanan panagraem iti kadadakkelan nga Autoridad, ni Jehova a Dios. Nagsayaat ti panangyebkas ni Isaias iti dayta: “O no dinengngegmo koma dagiti bilinko! Iti kasta ti talnam kas koma ti maysa a karayan.”—Isaias 48:18.
Maysa kadagiti naited a makatulong a suhestion tapno mabalintay a tagiragsaken a naan-anay pay ti nadiosan a talna a ta pagreggetantay a makaiyawid koma manipud tunggal gimong ti maysa a praktikal a punto ti balakad nga intay parang-ayen. Daytoy a palawag impakitana a tapno agbalin a mamagkakappia saan nga umdas laeng ti panagbalintayo a natalna; masapul ti intay panagregget a maipaay iti talna, a manangpabus-aytay koma a maipaay iti interes ti talna.
Saksaka a Nakasagana kadagiti Aruaten ti Naimbag a Damag ti Kappia
Nagsayaat ti pannakaawag ti mensahetayo a “ti naimbag a damag ti kappia.” (Efeso 6:15) Nagadu a nagsayaat a balakad ti inawattayo no kasano ti panangyeg iti daytoy naimbag a damag ti kappia kadagiti dadduma. Ti tallo kapaset a simposium maipapan iti ministeriotayo ti makatulong unay a maipaay iti daytoy. Impakita ti umuna a nagpalawag no kasano a ti panagbalaybalay a ministerio ti nagbalinen a marka dagiti Saksi ni Jehova. Yantangay saan unay a nalaka daytoy a trabaho, pampaneknekantayo ti ayattayo iti Dios ken kadagiti tattao babaen ti pannakiraman iti dayta. Tapno agbalin a pudpudno nga epektibo, masapul a sipapasnek ken sigagagettayo koma, a salimetmetan dagiti apagpag-isu a rekord ken agsarungkar iti nadumaduma a panawen tapno madanon dagiti isuamin.
Inlawlawag ti maikadua a managpalawag a tapno makapagaramidtayo ti ad-adalan masapul ti intay panangitultuloy a panagaramid ti panagsarungkar kadagiti interesado a tattao, nga ar-aramiden dayta nga addaan iti positibo a kababalin. Masapul a maaddaantay ti personal nga interes kadagidiay sarsarungkarantayo, nga inkur-ittayo ti aniaman a paginteresan ti bumalay iti daydiay immuna nga isasarungkartayo. Siguraduenyo nga adda banag a baro a naadal ti bumalay ti tunggal panagsarungkaryo.
Intudo met ti maikatlo a nagpalawag a dagiti estudiantetayo ti Biblia ket matulonganda nga agbalin kas Saksi no madanontay dagiti puspusoda babaen kadagiti salsaludsod ti punto de vistada. Kayattay ti mangipakita ti pudpudno nga interes kadakuada babaen ti panangiturong kadakuada iti organisasion ti Dios, a tultulongan ida a makagtengda kadagiti panaggigimong, a sarungkaran ida kadagiti nagduduma a tiempo, ken uray awisen pay ida kadagiti pagtaengantayo. Kadagiti napalabas a 35 a tawtawen, dimmur-as ti naminsangapulo a daras dagiti panangyadal ti Biblia.
Simmaruno iti daytoy simposium, naipaganetget kadatayo ti pannakasapul ti panangipamatmat iti panaggagar a mangiranud ti naimbag a damag ti kappia sadinoman a mabalin ken iti amin a sirkumstansia. Ti edad ket saan nga isut’ lapped. Uray dagiti ub-ubbing ken dagidiay agtawenen ti nalabes a 90 mabalinda ti agtultuloy a mangasaba. Dadduma ket payunirda, wenno amin-tiempo a manangaskasaba, nupay naan-anay a bulsekda. Dadduma a payunir tulengda, kaskasdi dagiti dadduma uray no situtugawda laengen iti wheelchair. Maysa a pagasawaan a payunir ti addaan innem nga ubbing pay nga annakda a kumuykuyog kadakuada iti tay-ak ti serbisio.
Maibagay unay isu ti balakad nga “Aramidenyo ti Inggat’ Kabaelanyo a Makiraman iti Amin-Tiempo a Ministerio.” Ti amin-tiempo a serbisio ti makapnek unay, makagunggona unay, a wagas ti panagbiag. Kalpasan a nakapangrugidan, maigunamgunam kadagiti payunir nga aramidenda ti inggat’ kabaelanda nga agtalinaed iti amin-tiempo a serbisio.
Kas kadagiti naglabas a kumbension, nakangngegtayon manipud kadagiti nabayagen a manangiwaragawag ti naimbag a damag, dadduma nagserserbidan manipud 30 aginggat’ 70 a tawtawen. Insalaysayda dagiti rag-oda iti panangikaskasaba ti naimbag a damag. Pudno a makaparegta a mangngegan no kasanot’ panangparmekda kadagiti makalapped tapno makapagtultuloyda iti ministerio. Kas pangarigan, maysa a kabsat a lalaki ti saan a a pulos a limmangan a nakipaset iti ministerio ti tay-ak iti uray maysa laeng a bulan iti 43 a tawen a panagserbina.
Balakad Maipaay kadagiti Kamkameng ti Pamilia
Ti nagsayaat a balakad a maipaay kadagiti kamkameng ti pamilia ti kasapulan unay gapu iti pammutbuteng wenno peggad nga ipapaay ti dakes a sistema dagiti bambanag kadagidiay adda kadagiti Kristiano a pamilia. Naisaludsod kadagiti agtutubo, “Dumurdur-askayo Aya iti Naespirituan?” Itatta adu dagiti agserserbi iti amin a tiempo kas payunirs ken addada kadagiti pagtaengan a Bethel. Ngem adu pay ngata ti makaaramid iti dayta? Tapno nadur-as iti naespirituan kaipapananna ti panangiyun-una iti pagayatan ti Dios iti panagbiagtayo. Kaipapananna met ti pannakaadda dagiti nasasayaat nga ugali ti panagad-adal ken pannakiraman a regular kadagiti ar-aramid ti kongregasion ken iti tay-ak ti serbisio, agraman ti nasayaat a pannakirelasion kadagiti natataengan. Kaipapananna ti saan a pananggun-od ti ragsak iti aniaman nga iparparit ti Sao ti Dios.
Ti sabali pay a tallo kapaset a simposium ti nangrugi iti makasukisok a saludsod, “Ti Aya Pagtaenganyo ket Lugar ti Inana ken Talna?” Ti pamunganayan iti daytoy isu ti panangpili ti asawa a maysa a Saksi ni Jehova a mangipangpangruna kadagiti intereses ti Pagarian ken mangiparparangarang kadagiti bunga ti espiritu ti Dios. Tapno ti maysa a pagtaengan ket agbalin a lugar ti inana ken talna, ti asawa a lalaki ket masapul nga idaulona dagiti naespirituan a bambanag, ken rebbeng nga ayatenna ti asawana kas met laeng ti bagina. Ti asawa a babai ti rebbeng a manangsuportar ken addaan ti nauneg a panagraem ken lakayna. Nasken met panagkararag a sangsangkamaysa ken ti saan a panangipalubos ti aniaman a lugar ti Diablo. Makatulong met dagiti ubbing a mamagbalin iti pagtaengan a lugar ti talna ken inana babaen ti panagpasakop ken pannakitunosda. Mapabileg ti singgalut ti pamilia no dagiti pamilia agadalda a sangsangkamaysa iti Biblia ken iti literatura ti Biblia.—Salmo 34:11.
Ti kasapulan met unay isu ti palawag a simmaruno, “Ti Kadi Panagsina Isu ti Pamay-an a Maipaay iti Talna ti Panagasawa?” Ti sungbat? Nalabit agpaay kadagiti taga lubong ngem saan nga agpaay kadagiti Saksi! Kadakuada, ti panagsina ket saan nga isu ti nalaka a ruaran iti nagulo a panagasawa. Ti intero nga aweng ti balakad ti Dios maipapan iti panagasawa a ta dagiti pagasawaan agtalinaedda koma a sangsangkamaysa. Ti panagsina ti ngangngani awan labasna ket addaan makadangran nga epekto kadagiti nairaman nga annak, ken adda pay dadduma a dakes a bungana. Iti nabatbatad pay, ti panagsina ket isut’ panangadmitir a maysa kadagiti pagasawaan wenno isuda a dua ket saanda nga ipampamatmat ti bunga ti espiritu.—Galacia 5:22, 23.
Naited ti nagsayaat a balakad kadagiti agsolsolo a Kristiano iti palawag a “Ti Di Kasado a Tao Rebbeng Aya a Di Kompleto ti Panagriknana?” Nikaanoman! Yantangay ti ministerio isu ti sentro ti biagtayo, mabalintay ti agbalin a kompleto wenno naan-anay agmaymaysatayo man wenno adda asawanan. Kinapudnona, kas ipakita ni Pablo, addada dadduma a pagimbagan dagiti agmaymaysa a Kristiano. Babaen ti panangsukay ti kinakontento, mabalinda a pagragsakan ti sagut ti kinaagmaymaysada ken magunggonaan unay manipud iti dayta.—1 Corinto 7:32-34.
Kasapulan a Balakad iti Nadalus a Panagbiag
Ti kanayon a dumakdakes a kasasaad ti moral daytoy a lubong ti nangibunga iti sumagmamano kadagiti Saksi ti natubtubngar wenno nailaksidda pay gapu kadagiti dakes nga ug-ugali. Gapuna anian a maibagay ti prangka a balakad a naited maipapan kadagiti bambanag maipapan kadagiti kababalin! Tapno tagiragsakentay ti nadiosan a talna, masapul nga alwadantay a kanayon ti kababalintayo. Nailawlawag daytoy, kas pangarigan, iti palawag a “Liklikanyo dagiti Silo ti Sosial a Panaglinglingay.” Mabalin a dagiti party ti nakaragragsak, ngem no ditay agan-annad, naglaka a makasinga dagita kadagiti nateokratikuan nga ar-aramid ken mangiturong iti kinarugit. Ti puso ti imperpekto a tao ti manangallilaw ken sisasagana a manggundaway iti aniaman a kasasaad a pagay-ayaman ti imoralidad. Nangnangruna dagiti dadakkel a daydaya ti mangted kadagiti serioso a peggad, ken kasta met dagiti makaipababa a musika.—1 Corinto 15:33.
Tapno mataginayontay ti nadiosan a talnatayo, masapul a “Liklikan ti Makapapatay nga ‘Angin’ Daytoy a Lubong.” Kas ti angin nga ang-angsentayo, daytoy naagum ken nasukir nga espiritu ti lubong ti adda iti aglawlawtay amin. Ti palawag ket sinalaysayna dagiti siam a panangiparangarang iti daytoy makapapatay nga angin, a maysa kadagitoy isu ti panagay-ayam iti imoralidad, ti aglablabes a panagkawkawes ken estilo ti panagbubuok, ti di natimbeng a pampannangan ken panaginum, adiksion kadagiti ay-ayam, ken kinatangsit gapu iti rasa. Itultuloyyo nga angsen daytoy nga angin ket daytat’ mangpapatay kadakayo iti naespirituan.
Daytoy a banag ti ad-adda manen a naipaganetget babaen iti palawag nga “Agtaltalinaedkayo Aya a Nadalus iti Isuamin a Banag?” Ti di panagannad ti mamagbalin kadatayo a sibabasol iti panaginsisingpet. Tapno maaddaantay ti nadalus a konsiensia, masapul nga agtalinaedtayo a nadalus iti pisikal, mental, moral, ken iti naespirituan. Gapu iti dayta masapul a “guraentayo ti dakes,” “karurodyo ti dakes.” Ramanen daytoy ti panagrurod iti apostata a propaganda.—Salmo 97:10; Roma 12:9.
Ti nagsayaat a palawag a “Ti Panangdisiplina ni Jehova Mangted Bunga ti Kinatalna” ti pertinente met ditoy. Ni Jehova isu ti Naindaklan a Manangdisiplina, ket disdisiplinaannatayo agsipud ta inayatnatayo. Awan kadatayo ti saan a makasapul iti disiplina. Uray pay ti Anak ti Dios kasapulanna! (Hebreo 5:8) Wen, ti pannakadisiplina kangrunaan a kaipapananna ti pannakasanay, saan a kanayon a ti panangdusa, ket tapno magunggonaan manipud kadagiti adu a pamay-an a panangipapaay ti Dios iti dayta, masapul a napudnotayo koma kadagiti bagbagitayo—ket kanayon nga agpakumbabatayo!
Ti palawag a “Kanayon nga Agpipinnabileg ti Maysa ken Maysa” ti nangted iti nagsayaat a balakad maipapan iti panagsasaotayo. Anian a nagdakkel a panangdangran ti maaramidantayo babaen ti di pinampanunot, manangbabalaw, wenno managtanabutob a panagsao! Pudno unay, nagrigat a medmedan ti dila. Maiyanatop unay, nga ipalagip kadatayo a rebbengna a “dikay agsao iti maibusor iti maysa ken maysa.” (Santiago 4:11) Ti nainkabsatan nga ayat ti mamagbalin kadatayo a naannad. Ken sakbay nga adda sawentayo, pagimtuodennatayo: “Pudpudno aya dayta?” “Kasapulan aya nga ibagak dayta?” “Makapabileg aya dayta?”
Panagadaw Manipud kadagiti Padto
Nagsasaruno a palawag ti nagadaw kadagiti naipaltiing a padto kas panangipalagip ken pammagbaga. Gapuna, ti palawag a “Dagiti Panangukom ti Dios—Di Popular iti Lubong,” impaganetget ti nagpalawag a saantay laeng nga addaan iti naimbag a damag nga ikaskasaba maipapan iti paraiso no di ket, kas ken Jeremias, addaantay met ti proklamasion nga ited maipapan kadagiti um-umay a panangukom ti Dios. (Jeremias, kapitulo 6 ken 7) Kas ti situtured a panangibutaktak ni Jeremias kadagiti ulbod a pannursuro ken narugit nga ar-aramid dagiti narelihiusuan a papangulo idi kaaldawanna, datayo met ti nabalakadan wenno nabagbagaan a mangaramid ti kasta.
Ti palawag a “Panawen ti Pannakasuot ken Pannakasagat” impakitana ti moderno nga aplikasion ti Malakias 3:1-3. Pudno a ti ili ni Jehova ti nadalusanen manipud kadagiti ulbod a Binababilonia a sursuro ken ar-aramid. Ti pannakaipasdek ti nateokratikuan nga urnos ken ti pannakaawat a ti ministerio a panagbalaybalay ket addaan dakkel a pategna ti maysa kadagiti positibo a punto nga inaramid ti managpalawag.
Nakangngegtayo met ti nagsayaat a palawag a sadiay sinalaysay ti managpalawag ti kapitulo 11 ken 12 ti Daniel. Daytat’ napauluan “Dagiti Naibuksilan a Nasantuan a Palimed Mangtedda ti Sigurado a Namnama Maipaay ti Talna.” Ti panagsinnalisal ti ari ti amianan ken ti ari ti abagatan ti mangrirriribuk iti lubong. Manipud padto ni Daniel, makitatayo a dagitoy nga ar-ari nikaanoman didanto ipatingga dagiti panagsusuppiatda. Ni laeng Miguel ti makaiyeg iti manayon a talna.
Ti sabali pay a palawag a nagadaw kadagiti naipaltiing a padpadto isu ti “Sangalubongan a Kinatalged iti Sidong ti ‘Prinsipe ti Kappia.’” Sinalaysay dayta ti Isaias 9:6, 7 ken ti konteksto dagidiay a bersikulo, a mangipakpakita no kasano a dayta a padto apagpag-isu nga agaplikar ken Jesu-Kristo. Kuna ti managpalawag iti konklusionna a ni Miguel “balangatannanto iti nagranga a karerana iti panagballigi inton Armagedon a daytanto ti umaweng a dinto agkupas iti amin a panawen nga awan inggana . . . Gapuna, umabante nga agturong iti dakdakkel pay laeng a sangalubongan a kinaprominente, dakay amin a saksi ni Jehova, nga agtalek a naan-anay iti Diosyo ken iti agturturayen nga Arina, ti ‘Prinsipe ti Kappia’! Mangipakita iti kinaawan panagbuteng iti kumplot iti agdama a lubong . . . Agbalinkay koma amin a pagilasinan ken datdatlag a maipaay a pakaidayawan ni Jehova!” Daytoy kinapudnona ti maysa kadagiti makapatignay unay a palpalawag.
Patgenyo Dagidiay Mangidadaulo
Dua kapaset a simposium a napauluan “Dagiti Manangaywan nga Agserserbi kadagiti Intereses ti Talna” ti pudno a nakatulong kadatayo a mangipateg kadagidiay mangidadaulo. Inusig ti immuna a nagpalawag ti akem dagiti agdaldaliasat a manangaywan ken impakitana a pudno nga isuda, ti maikari iti doble a dayaw gapu kadagiti adu nga annongenda. Ramanen daytoy ti panangted kadagiti palpalawag, panangtulong a mangrisot kadagiti parikut, panangsanay kadagiti kakabsat iti panangasaba, ken ti panangsarungkar kadagiti masaksakit iti pisikal wenno naespirituan. Pudno unay, amin dagiti agdaldaliasat a manangaywan maikari iti naan-anay a pannakitunostayo ken ti kinamanagpadagos a kas ken ni Lydia.—Aramid 16:15.
Ti maikadua a nagpalawag sinaggaysana dagiti annongen dagiti panglakayen ken ti akemda a mangparang-ay ti talna iti kongregasion. Daytoy maaramidan babaen ti panagsagana a maipaay ken panangidaulo kadagiti gimgimong, panangipastor, panangtaming kadagiti hudisial a bambanag, panangidaulo iti tay-ak ti serbisio, ken panangipakita ti nasayaat nga ulidan iti kababalin ken iti panagbiag ti pamilia. Pudno unay, amintayo rebbeng a tarigagayanna ti panangipakita iti panangipateg kadagiti nadutokan a panglakayen babaen ti panagtulnog ken panagpasakop, kas naibalakad kadatayo idiay Hebreo 13:17.
“Ti Panangragpat ken Pananggun-od ti Nasayaat a Takder” isut’ maysa a palawag a nangipaganetget ti pannakasapul kadagiti kualipikado a panglakayen gapu iti naindaklan a panagrang-ay dagiti Saksi. Impakitana a dagiti amin a dedikado a kakabsat a lallaki a saan pay a panglakayen no kasano ti panangragpatda kadagiti daddadakkel a pribilehio. Nangnangruna nga ingunamgunam ti palawag kadagidiay kualipikado a dida makitkita ti pannakasapul ti panagserbida iti dakdakkel pay a saludsodenda ti bagbagida, Agsansanudak aya?
Dadduma Pay a Naespirituan a Sagana
Maapresiar unay isu ti palawag a “Mapmapnekkayo Aya kadagiti Sagana ni Jehova?” Nakangngegtayo kadagiti pangarigan iti Biblia kadagidiay pudno a nangapresiar kadagiti naespirituan a sagana nga ipapaay ti Dios ken dagidiay di nangapresiar. Inggana a silalagiptayo kadagiti naespirituan a kasapulantayo, mapnektayto kadagiti probision ni Jehova ket ipakitayto dayta. Kasano? Babaen ti pananggundaway ti panawen a maipaay iti personal a panagadal ti Biblia ken babaen ti panangdisiplinatay iti bagbagitayo bayat nga addatay kadagiti paggigimongan tapno magun-odantayo ti kaaduan iti dayta.
Ti maikuna a mangiparparang iti maysa pay a karit iti espiritualidadtayo ti nadakawat iti palawag a “Kasano Kabagas dagiti Karkararagyo?” Naisingasing a saludsodantay ti bagbagitayo: Pinalubosantay aya a dagiti karkararagko ti nagbalin a maulit-ulit, napamaysa, wenno nakagangganatak, a kasla kupadoak a mangaramid a siuumiso ti pannakisasaotayo iti Dios? Iti kararag, umas-asidegtayo iti naindaklan a Persona iti uniberso. Tapno nabagas dagiti karkararagtayo masapul a ti Dios ti pudpudno met unay kadatayo. Masapul nga agtaudda iti puso ken espesipikoda, ket masapul nga ikkantay met ida ti panagpanunot.
Sabali pay a sagana isu ti palawag iti bautismo, “Pannakikappia iti Dios Babaen iti Dedikasion ken Bautismo.” Impakita ti managpalawag a ti bautismotayo ket maysa ken maigiddato iti dayta ti kaseriosuan unay ken karagsakan unay nga okasion. Babaen iti dayta, magun-odantayo ti pannakikappia iti Dios ken agbalintayo nga ordinado a ministros dagiti Saksi ni Jehova. Ket ti dedikasiontayo ket saan laeng a basta pannakitulag, ta mabalintayo met ti maaddaan ken mangaywan iti sumagmamano a pannakitulag nga aggigiddan. Imbes ketdi, ti panagdedikar kaipapananna kadatayo ti panagbalin a naipampamaysa a debosionado iti Nasantuan a Persona, ni Jehova a Dios.
Dagiti dua a drama ti Biblia isudat’ nairaman a nalatak unay a paset ti kumbension. Sinalaysay ti Panangispal ti Biag iti Panawen ti Bisin ti makatignay unay nga estoria ni Jose ken dagiti kakabsatna, a dayta ti nangpalua kadagiti adu. Ti dakkel a panagpuspuso ni Jose, ti manangpakawan nga espirituna ket nagsayaat nga ulidan a tuladentay amin. Dayta a salaysay ti addaan met propetiko a pategna. Ti maikadua a drama, “Birukenyo ti Kinalinteg ti Dios a Maipaay iti Pannakaisalakan,” ti nangted iti napigsa ken dramatiko a balakad maipapan kadagiti parparikut dagiti agtutubo. Impaganetgetna ti pannakasapul ti panangannad ti kababalintayo, nga ipangpangrunatay ti intereses ti Pagarian, ket ditay koma nasiglat a mangukom wenno mangipato kadagiti motibo ti dadduma.
Maitunos unay iti tema iti kumbension isu ti palawag publiko, “Talna, Adtoyen!—No Agsao ti Dios.” Umuna, nangngegantayo ti pannakaibutaktak ti kinamaag amin dagiti panagsagsagana a nuklear ken ti kinaawan namnama ti sangalubongan a kasasaad manipud natauan a panangmatmat. Ti laeng Pagarian ti Dios ti mangituktukon ti pudpudno a namnama. Aniat’ kaipapananna ti panagimdeng no agsasao ti Dios? Kaipapananna ti saan laeng a panagimdeng a siaannad ken panangawat iti ibagbaga ti Dios no di ket kasta met ti intay panangaramid ti maysa a banag maipapan iti ibagbagana. Iti kasta ditayto maallilaw iti makaallilaw a panangipukkawda ti “Talna ken talged!”
Ti pangserra a palawag, “Kinabalan ti Dios ti Talna a Mangaramid ti Pagayatanna,” ti nangpaawid kadagiti amin a kumbensionista a nasayaat ti panagrikrikna ti pusoda a maipaay iti naespirituan a piesta a tinagiragsakda iti uppat nga aldaw. Pulos nga awan pay idi, ti kumbension a pudno a nangkabal kadatayo iti intay panangaramid iti pagayatan ti Dios. Gapuna “umabantetay a naan-anay a desidido a mangaramid iti ania? No umabantetayo iti naindaklan a trabaho ti panangikaskasaba ti Pagarian, apresiarentay a pudpudno ti nadiosan a talnatayo ken amin a kaipapanan dayta kadatayo!”
Idiay Estados Unidos, adda idi 135 a kumbension a naangay kadagiti 65 a nagduduma a luglugar ken iti 11 a pagsasao. Ti kangatuan a bilang dagiti timmabuno a ta 1,276,578, nga adda 12,603 a nabautisaran. Dagiti tallo a kumbension idiay Yankee Stadium idiay Siudad ti Nueva York ti addaan kangatuan a bilang a timmabuno a 95,091, nga adda 1,110 a nabautisaran.
[Kahon iti panid 30]
Dagiti Baro a Pagbasaan iti “Nadiosan a Talna” a Kumbension
Umuna a nairuar isu ti pannakarebisar ti polieto a “Adtoy! Pagbalinek a Baro dagiti Isuamin a Bambanag,” iti panagserra iti palawag maipapan iti dayta a tema. Dayta itan ti uppat kolorna a broshur, a naimaldit iti dadakkel a letra ken naglaon kadagiti kanayonan nga impormasion. Dayta ti nagsayaat a pangirugi kadagiti panangyadal ti Biblia iti pagtaengan.
Ti Dagiti Saksi ni Jehova—Sangangkamaysa nga Ar-aramidenda ti Pagayatan ti Dios iti Sangalubongan, maysa nga uppat-kolorna a broshur a kas ti kadakkel ti magasin, ti maikadua a nairuar. Daytat’ nagsayaat nga instrumento a pangiyam-ammo kadagiti dadduma ti isuamin a nadumaduma nga ar-aramidtayo ken mangted iti adu a historikal nga impormasion maipapan kadagiti Saksi ni Jehova.
Ti maikatlo a nairuar isu ti 192-panid a katulongan ti panagadal ti Biblia nga umuna a mausar kadagiti Panagadal ti Libro ti Kongregasion. Daytat’ napauluan Worldwide Security Under the “Prince of Peace.”
Ti Kingdom Melodies No. 7 ti maikapat a nairuar, a ti paraman manipud iti dayta ti nangparagsak kadagiti amin a kumbensionista.
Idi dumdumngegda iti pangserra a palawag, amin naragsakan a makangngeg a ti Watch Tower Publication Index iti 1930-1985 ti magun-odanen inton Setiembre 1. Anian a bendision kadagiti napasnek nga estudiante ti Biblia!
[Dagiti ladawan iti panid 31]
1. Ni Jose ti inlako dagiti kakabsatna iti drama iti kumbension dagiti Saksi a Koreano idiay Estados Unidos.
2. Ti presidente ti Watch Tower Society, a ni F. W. Franz, agsasao kadagiti nakikumbension.
3. Paset dagiti atentibo a managdengngeg idiay Yankee Stadium, Siudad ti Nueva York.
4. Rinibo dagiti nabautisaran kas simbolo ti dedikasionda ken Jehova a Dios