Agtataripnong Dagiti Mensahero ti Nadiosan a Talna

“NAPABILEGKAMI iti tunggal kombension distrito a tinabunuanmi,” kuna ti maysa a Kristiano a panglakayen idiay Estados Unidos. “Nupay kasta, naidumduma daytoy a tawen. Pumanawkami iti kada aldaw a pampanunotenmi no kasano a ti sumaganad nga aldaw lab-awanna ti ninamnamami, ket saankam a napaay!”

No tinabunuanyo ti maysa kadagiti Kombension Distrito a “Dagiti Mensahero ti Nadiosan a Talna,” awan duadua nga umanamongkayo iti daytoy maragragsakan a delegado. Kada aldaw ti kombension impamaysana iti naidumduma nga aspeto ti annongen nga itungtungpal dagiti Saksi ni Jehova kas mensahero ti Dios. Repasuentayo ti tallo nga aldaw a programa.

“Naglibnosen . . . Daydiay Mangiwarnak iti Talna”

Daytoy ti tema ti umuna nga aldaw ti kombension. Naibatay dayta iti Isaias 52:7. Kadagitoy narikut a tiempo, adu ti agserserbi ken Jehova iti sidong dagiti makakarit a kasasaad. Ti palawag nga “Iyiimdeng Kadagiti Naregta a Manangiwaragawag iti Talna” ramanenna dagiti interbiu iti sumagmamano kadagitoy a matalek a tattao. Pudno a makaparegta ti pannakangngeg kadagiti personal nga ebkasda, ket iti kasta naipanamnama kadagiti timmabuno iti kombension a mapabileg met ida ni Jehova, a mangted pay iti “pannakabalin a nalablabes ngem ti gagangay” a tumulong kadakuada nga agibtur.​—2 Corinto 4:7.

Saan a makapadagsen dagiti kalikaguman ni Jehova. (1 Juan 5:3) Naibatad daytoy iti maudi a palawag iti programa iti bigat, a ti tampokna ket ti pannakairuar ti 32-panid a broshur a napauluan iti Ania ti Kalikaguman ti Dios Kadatayo? Daytoy napintas ti pannakayilustrarna a baro a katulongan iti panagadal ket di pagduaduaan a dakkel ti maaramidanna iti panangtulong iti ad-adu pay tapno maammuanda dagiti panggep ti Dios. Dagiti komento iti pannakausar daytoy baro a publikasion ket masarakan iti maudi nga artikulo a maadal iti daytoy a magasin ken iti panid 16 ken 17.

Naipaganetget iti palawag a “Panagibtur iti Aramid a Naimbag” a pagaammo unay ni Jehova dagiti pakasuotantayo. Ti panagibtur kayatna a sawen nga agtalinaedtayo a natibker ken ditay mapukawan iti namnama. Inted kadatayo ni Jehova ti Saona, ti espirituna, ken ti organisasionna a tumulong kadatayo. Kasapulan ti panagibtur iti panangasaba, ngem ti panangasaba tulongannatayo nga agibtur, tangay taginayonenna a nabiag ti pammatitayo. Tangay nakaas-asidegtayon iti pagnguduan ti lumba, ditay koma itulok a dagiti parikuttayo ti mangpakapuy iti regtatayo, ta dagidiay laeng makapagibtur agingga iti panungpalan isudanto ti maisalakan.​—Mateo 24:13.

Ti panulbek a palawag a, “Ti Akemtayo kas Mensahero ti Nadiosan a Talna,” dinakamatna ti pannakaluk-at dagiti nakautibo a Judio manipud Babilonia ken ti pannakaisubli ti nadalus a panagdayaw idiay Jerusalem idi 537 K.K.P. Daytoy a pasamak, inlawlawag ti nagbitla, ket pakauna laeng iti dandanin aramiden ti Pagarian ti Dios iti sangalubongan. (Salmo 72:7; Isaias 9:7) Ti agdama nga annongentayo isu ti panangikasaba iti naimbag a damag maipapan iti daytoy a Pagarian ken ti panagbiag maitunos iti dayta a mensahe. Ti panagayat iti Dios ken iti pada a tao isut’ rumbeng a mangtignay kadatayo nga agtultuloy iti daytoy a trabaho nga awan sardayna.​—Aramid 5:42.

Ti simposium nga “Agaluadkayo Kadagiti Nalimed a Palab-og ti Paglinglingayan” isut’ tampok ti programa iti Biernes. Dagiti agdama a musika, pelikula, video, pabuya iti telebision, video games, libro, magasin, ken komiks masansan nga iyanninawda ti panagpampanunot dagiti sairo. Gapuna, masapul a ‘karurodtayo ti nadangkes’ ket ‘kumpettayo iti naimbag.’ (Roma 12:9) Wen, masapul a karimontayo dagiti rinuker a paglinglingayan ken liklikantay dayta, bayat a pampanunotentayo dagiti bambanag a nadalus, natakneng, ken nadayaw. (Filipos 4:8) Dagiti publikasion ken alikamen a pagsukimat nga impaay ti organisasion ni Jehova gutugotenna ti isiptayo kadagiti makapabileg a kapanunotan ket sanayennatayo a mangilasin iti umiso ken di umiso. (Hebreo 5:14) Kumpettayo koma kadagitoy a probision a kas iti ikakapettayo iti maysa a balsa iti nadawel a baybay.

Simmaganad ti palawag a “Sarangtenyo ti Diablo​—Diyo Itulok nga Adda Makiribal.” Sakbay la unay ti iseserrekda iti Naikari a Daga, nasiluan iti imoralidad ti rinibu kadagiti Israelita. Saan nga intulok ni Finees nga adda karibal ti pudno a panagdayaw. Nagtignay a dagus maibusor kadagiti managdakdakes, ket naay-ayo ni Jehova iti naipamaysa a debosionna. (Numeros 25:1-13) Kalat ni Satanas a pagbalinennatayo a di maikari a sumrek iti baro a lubong ti Dios. Gapuna kas ken Finees, masapul a sarangtentayo dagiti panagregget ti Diablo a mangtulaw kadatayo. Naasawaan man wenno agwaywayas, masapul nga ‘adaywantayo ti pannakiabig.’​—1 Corinto 6:18.

Ti maudi a palawag iti umuna nga aldaw ti kombension ket “Sisusungdo a Panangitandudo iti Integridad ti Sao ti Dios.” Sinukatan wenno linaksid ti adu a managipatarus ti paspaset ti Kasuratan. Kas pagarigan, tapno mapagtutunosda dagiti manangitandudo iti kalintegan ti babbai, dagiti managipatarus iti The New Testament and Psalms: An Inclusive Version tukoyenda ti Dios, saan a kas Ama, no di ket kas Ama-Ina ken ni Jesus kas “Daydiay Tao” imbes a ti “Anak ti tao.” Iti kasunganina, simamatalek a sursuroten ti New World Translation ti teksto ti orihinal a pagsasao a dayta ti nanglawag iti panagpampanunottayo iti adu a Nainkasuratan a banag. Kas pagarigan, kinuna ti nagpalawag: “Dagiti umiso a patarus iti New World Translation ti nangipaay iti pakaibatayan ti panangorganisartayo manen kadagiti kongregasion babaen ti panangdutok kadagiti bagi dagiti panglakayen, nga ad-adda a maitunos iti padron a naipasdek iti umuna a siglo a kongregasion Kristiano.” Ipakitatay ti kinasungdotayo iti Sao ti Dios babaen ti inaldaw a panangbasa iti dayta ken babaen ti panangyaplikar iti balakadna. Kinuna pay ti nagpalawag: “Ipakpakitatayo a datayo dagiti nasungdo a manangitandudo iti Sao ti Dios babaen ti sireregta a panangikasabatayo iti dayta kadagiti sabsabali ken babaen ti panangusartay a siaannad bayat nga isurotayo kadagiti sabsabali, a ditay pulos padpadasen nga itunos dayta kadagiti kapanunotantayo babaen ti panangtiritir wenno panangnayon iti ibagbagana.”

‘Ti Talna ti Dios Ringbawanna Amin a Panunot’

Daytoy a tema, a naibatay iti Filipos 4:7, impasdekna ti kababagas ti maikadua nga aldaw ti kombension. Kaaduan kadagiti impormasion a naipaay salaysayenna ti umiso a panangmatmat iti ministerio, pamilia, dedikasion, ken dadduma pay nga aspeto ti inaldaw a panagbiag ti maysa a tao.

Kalpasan ti panangsalaysay iti teksto iti dayta nga aldaw, naiparang ti simposium a napauluan iti “Dagiti Mensahero a Mangidandanon iti Naimbag a Damag ti Talna.” Ti mensahetayo ket maipapan iti talna, ket rumbeng a maidanon iti natalna a wagas. (Efeso 6:15) Ti kalattayo ket danonen ti puso, saan a tapno mangabak kadagiti argumento. Ti pannakasanay ken dagiti publikasion nga aw-awatentayo manipud iti organisasion ni Jehova tulongannatayo a mangaramid iti kasta. Ditay koma itulok a maupaytayo gapu iti kinaaleng-aleng wenno di panangikankano. Imbes ketdi, itultuloytay koma nga ‘aramiden ti amin a kabaelantayo,’ a maaddaan iti nasayaat a rutina ti personal a panagadal, itatabuno iti gimong, ken pannakiraman iti trabaho a panangasaba. (2 Timoteo 2:15) Ditay koma liplipatan ti panagaramid iti naimbag kadagiti sabsabali, nangnangruna kadagidiay kapammatiantayo. (Galacia 6:10) Siempre, ti panangaramid iti amin a kabaelantayo dina kayat a sawen nga agbannogtayo a nalabes. Makaay-ayo ken Jehova ti maaramidan ti tunggal maysa sigun iti bukodna a kabaelan ken kasasaad.

Ipapaay ti ili ti Dios ti tiempo, pigsa, ken sanikuada a mangyadelantar kadagiti interes ti Pagarian. Ti palawag a “Naragsak a Panangted iti Organisasion ni Jehova” impakitana a bayat nga umad-adu dagiti arig karnero a tattao a mangipangpangag iti mensahe ti Pagarian, kasapulan dagiti kanayonan nga alikamen, paggigimongan, ken dagiti pasilidad ti sanga. Dagiti abuloytayo tulonganna ti organisasion a mangipaay iti aniaman a kasapulan tapno mairingpas ti sangalubongan a panangasaba. Ti naparabur a panangted idayawna met ni Jehova ken mangparagsak iti manangited. Gapuna, kas Kristiano, ditay koma liwliwayan daytoy napateg nga aspeto ti panagdayawtayo.​—2 Corinto 8:1-7.

Nagngudo ti sesion iti agsapa babaen ti palawag iti bautismo​—a kanayon nga isu ti tampok kadagiti dadakkel a taripnong dagiti Saksi ni Jehova. Anian a rag-o ti pannakakita kadagiti kabbaro a dedikado a mangsurot kadagiti addang ni Jesus babaen ti panagpabautisar iti danum! (Mateo 3:13-17) Amin a nangala iti kastoy nga addang nasursuruanda iti gubuayan ti kadayagan a sirib​—ti Biblia. Maysa pay, nasarakanda ti pudpudno a panggep iti biag, ket naparaburanda iti talna gapu ta ammoda nga umiso ti ar-aramidenda.​—Eclesiastes 12:13.

Naipaay ti natadem a balakad iti palawag a “Saluadannakay Koma ti Pannakaawat.” Nakapatpateg ti pannakaawat no maipanggep iti panagnegosio. Ditay koma agnegnegosio idiay Kingdom Hall, ket ditay met koma gundawayan dagiti padatayo a Kristiano maipaay iti pinansial a gunggona. (Idiligyo ti Juan 2:15, 16.) Kasapulan met ti pannakaawat no agpupuonan iti negosio wenno no bumulbulod wenno agpabpabulod iti kuarta. “Ti pannakalugi ti panagnegosio dagiti Kristiano isut’ nangituggod iti pannakaupay ken nangpukaw pay iti espiritualidad ti dadduma a sidadarasudos a simrek kadagiti napeggad a panguartaan,” kinuna ti nagpalawag. Nupay saan a dakes a makinegosio dagiti Kristiano iti maysa ken maysa, nainsiriban unay ti panagannad. Ket no adda katulagan iti negosio ti dua a partido, rumbeng a kanayon a mayaramidan iti kasuratan dagiti kondision.

Naisalaysay ti pagalagadan ti Dios para kadagiti lallaki ken babbai iti palawag a “Pinarsuana Ida a Lalaki ken Babai.” Natiritir ti akem dagiti lallaki ken babbai iti intero a historia. “Adu ti nagbiddut nga innaigda ti kinamalalaki iti naulpit a panangdominar, kinamaton, wenno kinabutangero,” kinuna ti nagpalawag. “Iti dadduma a kultura manmano, naalas pay ketdi, nga agsangit ti lalaki iti publiko wenno uray iti pribada. Ngem, isalaysay ti Juan 11:35 a bayat ti kaaddana iti bunggoy iti ruar ti tanem ni Lazaro, ‘nagarubos dagiti lua ni Jesus.’” Dagiti ngay babbai? Ti kinababai ket masansan a mainaig iti pisikal a kinapintas. Ngem insaludsod ti nagpalawag: “No napintas ti maysa a babai ngem di natimbeng ken mannakisupiat, nasagibar, wenno natangsit, agpayso kadi a napintas maitunos iti pudno a kababagas ti sao, a pudno a babai?” (Idiligyo ti Proverbio 11:22; 31:26.) Iti panagsasao, kababalin, ken panaglanglangada, ikagumaan dagiti Kristiano a lallaki ken babbai a suroten dagiti pagalagadan iti Biblia. Kinuna ti nagpalawag: “Ti lalaki a mangipakpakita kadagiti bunga ti espiritu ket nalaka a raemen, ken nalaka nga ayaten ti babai a mangaramid iti kasta.”​—Galacia 5:22, 23.

Simmaganad ti simposium a “Ti Dios ti Talna Maseknan Kadakayo.” Adu dagiti Kristiano a maringgoran iti pinansial. Nupay kasta, ikari ni Jehova: “Saankanto a pulos panawan ket saankanto a pulos baybay-an.” (Hebreo 13:5) Iti laksid ti kinarigat ti panagbiag, dadduma ti nangipakita iti panagtalek iti daytoy a kari babaen ti panagserbi kas auxiliary wenno regular pioneer. Dagiti dadduma a di makapagpayunir ita iyun-unada dagiti interes ti Pagarian babaen ti pananggundawayda a mangasaba iti kada oportunidad. (Mateo 6:33) Makomendaran amin ti kasta a panagregget! Adu dagiti publikasion nga impaay ti organisasion ni Jehova a tumulong kadatayo iti ministeriotayo ken tumulong kadatayo a mangsaranget kadagiti parikuttayo. No ipakitatay ti panangapresiartayo kadagiti naespirituan a probision ni Jehova, paraburannatayo iti talna kadagitoy tiempo ti nariribuk a panagbiag.​—Salmo 29:11.

Iti ngudo ti maudi a palawag iti dayta nga aldaw a, “Surotenyo ti Nadiosan a Talna iti Biag ti Pamilia,” naragsakan dagiti timmabuno iti kombension nga immawat iti baro a libro a Ti Sekreto ti Kinaragsak iti Pamilia. “Adalenyo a naimbag daytoy a libro a personal ken sangapamiliaan,” indagadag ti nagpalawag. “Ikagumaanyo a sipapasnek nga iyaplikar ti naibatay iti Biblia a balakadna, ket sigurado a maparang-ayyo ti talna ken kinaragsak iti pamiliayo.”

‘Tungpalenyo ti Panagmaymaysa . . . iti Mamagkaykaysa a Singgalut ti Talna’

Naibatay iti Efeso 4:3, maikanatad daytoy a tema iti maudi nga aldaw ti kombension. Dagiti Saksi ni Jehova, manipud iti amin a nasion ti lubong, ket sinursuruan ti Dios. Gapuna, pagay-ayatda ti talna. Sursurotenda ti ulidan ni Jesus ken ikagumaanda “a tungpalen ti panagmaymaysa ti espiritu iti mamagkaykaysa a singgalut ti talna.”

Naitampok ti talna a mangtigtignay iti organisasion ti Dios iti simposium a “Panangilasin Kadagiti Umiso a Kita ti Mensahero.” Adda idi dagiti ulbod a mammadto iti nagkauna nga Israel. Nupay kasta, dagiti pudno a mensahero ti Dios​—kas kada mammadto nga Isaias, Ezequiel, ken Jeremias​—impadtoda a siuumiso ti pannakadadael ti Jerusalem, ti tiempo ti pannakakautibo, ken ti pannakaluk-at ti ili ti Dios iti kamaudiananna. Kasta met laeng ti kasasaad ita. Nakaad-adu dagiti ulbod a mensahero iti lubong ti politika ken ulbod a relihion. Ngem imbaon ni Jehova dagiti Saksina a mangiwaragawag iti panggepna mainaig iti daytoy a sistema ti bambanag. Nangnangruna sipud idi 1919, dagiti adipen ni Jehova ti naaramat a mangiwaragawag iti mensahe ti Dios. Anian a naidumdumada no idilig kadagiti ulbod a mensahero ti Kakristianuan! Sapay koma ta siaanep nga aramidentay ti pasettayo iti daytoy a trabaho agingga a kuna ni Jehova a nalpasen.

Impaganetget ti palawag nga “Ipangag ken Tungpalenyo ti Sao ti Dios” a ti Kasuratan ti kadakkelan a gubuayan ti panangiwanwan, liwliwa, ken namnama. (Isaias 30:20, 21; Roma 15:4) Kumarkaro ti kinamanangpanuynoy ti agdama a lubong. Nangnangruna ngarud ita a masapul nga ipangagtayo ti balakad manipud iti Sao ti Dios ken iti organisasionna. Ammo ni Jehova dagiti pagkapuyantayo, ket iti Saona imbalabalana a sibabatad ti kurso a makagunggona kadatayo. Ti pannakaammo a tultulongannatayo ni Jehova pakirdennatayo nga agtultuloy a mangaramid iti aniaman a kiddawenna kadatayo.

Daytoy ti nangisagana iti isip dagiti agbuybuya maipaay iti full-costume a drama a simmaruno. Napauluan iti “Apay a Rumbeng a Raemen Dagiti Teokratiko nga Urnos?” Iti panangaramat iti salaysay ti Biblia maipapan ken Gideon kas pangibatayan, impaganetget unay daytoy a parang ti nabileg a leksion​—masapul a surotentayo dagiti instruksion ti Dios ket saantay nga isukat ti bukodtay a kapanunotan wenno ditay padpadasen a liklikan ti teokratiko a balakad.

Napauluan ti palawag publiko iti “Pudno a Talna Kamaudiananna!​—Sadinot’ Pagtaudanna?” Ti talna nga ikarkari ti Dios lab-awanna ti aniaman a banag a mapanunot daytoy a lubong. “Ti pudno a talna kayatna a sawen inaldaw a talna,” kinuna ti nagpalawag. “Ti talna ti Dios kaipapananna ti maysa a lubong nga awan sakit, ut-ot, ladingit, ken ipapatay.” Ibaga kadatayo ti Biblia a ni Jehova “pagsardengenna dagiti gubgubat inggana iti ungto ti daga.” (Salmo 46:9) Kasanona nga aramiden daytoy? Babaen ti panangikkatna iti mangrubrubrob iti gubat, ni Satanas a Diablo. (Apocalipsis 20:1-3) Daytoy ti mangilukat iti dana para kadagiti naemma tapno “tawidendanto ti daga, ket maay-ayatandanto iti kinaruay ti talna.”​—Salmo 37:11.

Kasaruno ti pannakagupgop ti maadal nga artikulo ti Pagwanawanan iti dayta a lawas, naipaay ti maudi a palawag iti kombension. Napauluan iti “Rumang-ay kas Mensahero ti Nadiosan a Talna,” daytoy makatukay a palawag impaganetgetna a ti trabahotayo a panangasaba ket naisalsalumina ken naganat. Saan a panawen ita ti panagpalpallailang, panagtaktak, wenno panagsubli kadagiti biddut a kapanunotan. Nakabalantayo kadagiti banag a kasapulantayo​—mensahe ti Dios, ti nasantuan nga espirituna, ken naruay a probision manipud iti naayat a teokratiko nga organisasionna. Kas ad-adipen ni Jehova, sapay koma ta itultuloytay ti rumang-ay kas mensahero ti nadiosan a talna!

[Kahon/Dagiti Ladawan iti panid 9]

Naayat a Probision Kadagiti Pamilia

Kasta unay ti ragsak dagidiay timmabuno iti maikadua nga aldaw ti Kombension Distrito a “Dagiti Mensahero ti Nadiosan a Talna” nga immawat iti baro a publikasion a napauluan Ti Sekreto ti Kinaragsak iti Pamilia. Naglaon daytoy a libro iti Nainkasuratan nga impormasion a pakagunggonaan amin a pamilia nga addaan panagayat iti Dios.

Kastoy ti komento ti maysa a panglakayen manipud Connecticut, E.U.A.: “Idi Hunio 15, naawatmi ti librotayo a Kinaragsak iti Pamilia. Idi Hunio 16, nabasakon ti kaguduana. Idi maika-17, rinugianmin nga inadal dayta a sangapamiliaan, ket naparegtakam unay! Iti dayta met laeng nga aldaw, nalpaskon a binasa ti libro. Di pagduaduaan a daytoy nagsayaat a publikasion ket tagipatgen dagiti amin a mangaramat iti dayta. Ti prangka ken naintiempuan nga impormasion ti libro mangted iti kanayonan a pammaneknek a mangipapaay ‘ti matalek ken masirib nga adipen’ iti ‘taraon iti umiso a tiempo’ ken pagaammoda unay dagiti kasapulantayo kadagitoy narikut a tiempo.”​—Mateo 24:45-47.

[Ladawan iti panid 7]

Kayat nga ammuen dagiti ubbing ken natataengan no aniat’ kalikaguman ti Dios