Diyo La Ket Kayat a Palabsen!
PALABSEN ti ania? Ti umad-adanin a “Dagiti Mensahero ti Nadiosan a Talna” a Kombension Distrito dagiti Saksi ni Jehova! Iti kaaduan a lugar mangrugi ti kombension iti alas 8:30 iti agsapa ti Biernes babaen iti maysa a programa ti musika. Kalpasan a mangngegan dagiti makapabileg-pammati nga interbiu iti paset nga “Iyiimdeng Kadagiti Naregta a Manangiwaragawag iti Talna,” tagiragsakenyo ti makaparegta a palawag nga “Ania ti Kalikaguman ti Dios Kadatayo?”
Ti tampok iti malem ti Biernes isu ti makagutugot a pannulbek a palawag a “Ti Akemtayo kas Mensahero ti Nadiosan a Talna.” Kalpasanna ti paset a “Panangtulong Kadagiti Sabsabali a Mangammo iti Kalikaguman ti Dios” mangipaay kadagiti singasing iti panangisuro kadagiti kabbaro. Sarunuento daytoy ti naintiempuan a simposium nga “Agannadkayo Kadagiti Nalimed a Palab-og ti Paglinglingayan.” Agngudo ti programa iti Biernes babaen kadagiti palawag a “Sarangtenyo ti Diablo—Dikay Panuynoyan ti Pannakisalisal” ken “Sisusungdo a Panangitandudo iti Integridad ti Sao ti Dios.”
Maipaganetget iti programa iti agsapa ti Sabado ti kinapateg ti trabaho a panagaramid adalan iti nagkatlo-paset a simposium a “Dagiti Mensahero a Mangidandanon iti Naimbag a Damag ti Talna.” Agngudo ti sesion babaen kadagiti palawag a “Naragsak a Panangted iti Organisasion ni Jehova” ken “Biag ken Talna Babaen ti Dedikasion ken Bautismo,” a kalpasanna maaddaanto iti gundaway a mabautisaran dagiti kabbaro nga adalan.
Ti parang iti malem ti Sabado nga “Usigenyo ti Kapanunotan ni Jehova Kadagiti Bambanag” sungbatanna ti salsaludsod a kas iti ‘Makiramraman kadi dagiti Kristiano iti trabaho a panamaglalasin ita?’ ken ‘Aniat’ panangmatmat ti Biblia maipapan iti dusa nga ipapatay?’ Tagiragsakenyo met ti makatukay a nagkadua-paset a simposium a “Ti Dios ti Talna Maseknan Kadakayo” ken nangnangruna iti pangserra a palawag a “Surotenyo ti Nadiosan a Talna iti Biag ti Pamilia.”
Ramanen ti programa iti agsapa ti Domingo ti nagkatlo-paset a simposium a “Panangilasin Kadagiti Umiso a Kita ti Mensahero” ken ti palawag nga “Ipangag ken Tungpalenyo ti Sao ti Dios.” Agngudo ti programa iti agsapa babaen iti full-costume a drama a mangitampok iti napapateg nga adal manipud iti salaysay ti Biblia maipapan ken Ukom a Gedeon.
Maitampok iti maudi a sesion ti kombension iti malem ti Domingo ti palawag publiko, a napauluan “Pudno a Talna Kamaudiananna!—Sadinot’ Pagtaudanna?” Iti kamaudiananna, agngudo ti kombension babaen ti mangtukay a palawag a “Rumang-ay kas Mensahero ti Nadiosan a Talna.”
Iplanoyo itan ti tumabuno. Tapno maammuanyo ti lugar a kaasitgan iti pagtaenganyo, makiumankayo iti Kingdom Hall dagiti Saksi ni Jehova iti lugaryo wenno agsuratkayo kadagiti managipablaak iti daytoy a magasin. Nakalista iti Disiembre 8 a ruar ti Agriingkayo! ti direksion ti amin a lugar dagiti kombension iti Pilipinas.