Panagserbi iti Dios kas Maysa a Pamilia
Kas insalaysay ni Otto Rittenbach
SIAK ken ni Carol ti nagkasar idi Nobiembre 1951. Iti sumaganad a tawen ti umuna nga anakmi, ni Brenda, ti naipasngay. Iti sumaganad nga innem a tawen naaddaankami pay ti lima nga annak—ni Rick idi Hulio 1954, ni Rhonda idi Hunio 1955, ni JoDene idi Mayo 1956, ni Wayne idi Hunio 1957, ken ni Kenan idi Hulio 1958. Idin agtawenak pay laeng ti 27 ket ni Carol 23. Pudno unay, maysa a nadagsen a responsabilidad ti pamilia nga agpaay iti agtutubo a pagassawaan!
Itatta, agyamyamankami ta dakam amin ti sangsangkamaysa iti serbisio ti Dios. Ni Rick agserserbi idiay Bethel, ti sangalubongan a hedkuarters dagiti Saksi ni Jehova idiay Brooklyn, Nueva York. Siak ken ni Carol agraman dagiti ub-ubbing nga annakmi a lallaki a da Wayne ken Kenan, addakami iti Watchtower Farms agarup 95 milias (150 km) iti amianan ti Brooklyn. Ket ni Brenda, Rhonda, ken ni JoDene a tunggal maysa nagturposdan manipud iti Watchtower Bible School of Gilead ti agserserbin kas misionera—ni Brenda idiay Makintengnga a Daya ket ni Rhonda ken JoDene idiay Colombia, Sud America.
Nikaanoman iti amin a kaay-ayomi a namnama nga inar-arapaapmi a ti intero a pamiliami ti maaddaan kadagitoy a naindaklan a pribilehio iti serbisio. Maysakam laeng idi nga agtutubo a pagassawaan nga aduan ti annak a padpadasenmi ti amin a kabaelanmi a makapagtultuloy kadagiti amin a panangiturong nga aw-awatenmi manipud iti Dios babaen iti Saona ken ti makitkita nga organisasionna. Daytat’ saan a nalaka a kanayon. Addada met dagiti panawen ti karigatna. Ngem umanamongkam amin a ti panangipangpangrunami iti serbisio ti Dios ti nangibunga iti kaadda iti nabaknang ken makagunggona a panagbiagmi. Palubosandak a mangisalaysay iti apagbiit maipapan iti nalikudanmi ken iti panangpadakkel ti pamiliami.
Ti Pannakaadal ti Kinapudno iti Biblia
Naiyanakak idi 1930 iti maysa a pagtalonan iti katantanapan a deppaar ti Norte Dakota, ti maika-13 kadagiti 14 nga annak. Dagiti Nylens, ti sabali met a pamilia dagiti mannalon, ti agtataeng iti agarup uppat a milia (6 km) ti kaadayona. Pagaammoda iti dayta a lugar kas dagiti Saksi ni Jehova nupay saanda pay a nabautisaran ken saanda a kanayon a makigimgimong iti kongregasion.
Bayat iti panangtamtamingko iti negosio ti panagtalon, masansan a makasarungkarak met iti pagtalonanda ket naam-ammok ni Carol Nylen. Dimmakkel ti relasionmi, ket di nagbayag kalpasan ti panagturpos ni Carol iti high school nagkasarkamin. Dua a bulan kalpasanna, idi karrugi ti 1952, naawaganak ket binusbosko ti dua a tawen iti armada, agraman 14 a bulan idiay Alemania.
Kalpasan panagsubli manipud Alemania, nangabangkami iti maysa a pagtalonan nga agarup kakapat a milia (.4 km) manipud kadagiti Nylens. Ngangngani awan kuartami gapuna immutangkami iti FHA (Farmers Home Administration) tapno makagatangkami iti sumagmamano nga ulo ti baka a gagatasen ken dadduma a makinaria a pagtalon. Ti panagtalon adut’ panawen a busbosenna kadagidiay nga al-aldaw. Kaskasdi, babaen iti pammaregta ni Carol ken dagiti katugangak nga idi ket aktibodan a Saksi, immawatak ti maysa a panagadal ti Biblia iti pagtaengan. Simamatalek nga indauluan ni Roland a kabsat ni Carol. Babaen iti kanayonan a naespirituan a tulong ti panagsarungkar dagiti manangaywan ti sirkito ken dadduma pay a Saksi, idi agangay indedikarkon ti biagko ken Jehova ket nabautisaranak idi Agosto 1956.
Maysa a Nagaget a Katulongan
Ti biag kadagiti pagtalonan kadagidiay nga al-aldaw ti agkurang kadagiti adu a moderno a pagnam-ayan. Ti ab-abanganmi a balay iti pagtalonan, kas pangarigan, ti awanan danum a sumrek babaen kadagiti tubo, gapuna amin a danum ti masapul a masakdo manipud iti bubon, ket masapul a mapankam amin iti ruar tapno agusar iti kasilyas. Addaankam laeng iti sumagmamano a muebles iti pagtaengan, ngem inan-anusanmi ti adda kadakami ken ti aniaman a maited kadakami. Nagbalin a nalaing ni Carol iti panangarkos iti pagtaengan nga uray pay dagiti makinkua iti dayta a lugar kunada a kasla balay ti mummunieka. Isut’ agdait kadagiti isuamin a kawes dagiti ubbing, nangruna manipud kadagiti daan a kawkawes a maited kenkuana. Ket masansan a tultulongannak idiay ruar kadagiti trabaho, agraman ti pananggatas kadagiti baka, nga inar-aramidmi babaen iti ima.
Kadagidiay a tawtawen ni Carol, a ni nanangna ket maysa a maestra, ti nakaaramid iti nakaskasdaaw a trabaho a panangsanay kadagiti annak. Mainayon pay, ti panagbasbasa iti Biblia ken dagiti publikasion ti Watchtower ti mangipasagepsep kadakami ti pateg iti panangsanay kadagiti annak manipud iti kinamaladagada. (2 Timoteo 3:15) Gapuna, ti regular a pamay-an kada agsapa manipud alas 9:30 agingga iti alas 11, ti maysa nga ungto iti bassit a kusinami ti nagbalin a pagadalan. Maysa kadagiti kasapaan a laglagip amin dagiti ubbing isut’ panagtugtugawda kadagiti bangkito a nalabaga iti aglikmut ti maysa a pisara. Itatta, dagitoy nga or-oras ti panangisuro ti pagay-ayat pay a laglagipen dagiti ubbing. Dagidiay maladaga pay la idi nasursuruanda nga agtugaw a siuulimek ken nakadalikepkep iti maysa nga oras. Kalpasanna sisasaganadanton a maipaay iti regular a panaginanada iti tengngat-aldaw.
Idi a dagiti ubbing ket agarup maysa ket kagudua ti tawendan, agtibodan a mannakipaset. Sinursuruan ni Carol ida iti alpabeto ken no kasano ti panagbasa ken panagsurat babaen ti panangusar kadagiti inaramid idiay pagtaengan a flash cards. Tinulonganna met ida nga agisaulado kadagiti kangrunaan a teksto iti Biblia, agraman nagnagan dagiti apostol, ken nagestoria kadakuada kadagiti estoria manipud Biblia agraman dagiti praktikal a leksion nga isuro dagitoy. Nakaskasdaaw a buybuyaen no kasano kalaka ken kasano kaadu ti maad-adal dagiti ubbingmi iti kasta a kaganus ti edadda. Mabalin a dadduma narigatda a patien dayta, ngem mabalinda amin nga inaganan dagiti 66 a liblibro ti Biblia idi agtawendan ti maysa ket kagudua, ket idi agtawendan iti dua wenno tallo tunggal maysa kadakuada ti makabasan.
Mainayon pay, addaankam met ti regular a panagadal ti pamilia a kabayatan dayta isaganami dagiti ubbing kadagiti leksion a maadal iti regular a panaggigimong iti kongregasion. Siempre, kaipapanan daytoy ti pananggudua-gudua iti material tapno matarusanda dayta, nangnangruna idi ad-adalaen ti libro a “Your Will Be Done on Earth,” ken kamaudiananna ti “Let Your Name Be Sanctified,” agraman dagiti leksion iti magasin a Pagwanawanan. Nakatulong daytoy kadagiti ubbing a saan laeng nga iti irarang-ay iti naespirituan no di ket iti pay panagbalinda a nalaing iti eskuelaan.
Panangtaming kadagiti Problema
Kaskasdi agpapan pay amin a panagreggetmi, saan nga amin ket nalamuyot a kas ti kayatmi koma. Kas pangarigan, idi simmangpet ni Brenda manipud iti umuna nga aldawna idiay eskuelaan, siraragsak a sinaludsodmi no kasano ti aldawna. Maysa kadagiti salsaludsodmi ket maipapan iti panagsaludo iti bandera. Simmungbat, “Ay, saan, diak nagsaludo ti bandera; basta nagsapataak laeng.” Kaawatan, adda nagkurang iti pannursuromi!
Sa adda met ti okasion idi a naidasar ti panagsida ti pabo idiay kapeteria ti eskuelaan sakbay ti bakasion ti Thanksgiving. Ni Rick, nga adda idi iti umuna a grado, ti madi nga agsida iti dayta. Kalpasan laeng iti maulit-ulit a panangilawlawag ti maestra a daytat’ saan a Thanksgiving Day wenno pudpudno a Thanksgiving dinner, ken kalpasan ti panagtelepono ken Carol, a ti konsiensia ni Rick ti nangipalubos kenkuana a mangan iti dayta a taraon.
Addada pay met dagiti dadduma a parikut a sabali a kita, bambanag a narigat a patien a rumsua koma, ngem mangiyilustrar iti dakes a pagannayasan dagiti agtutubo. (Genesis 8:21; Proverbio 22:15) Idi adda iti maikadua a grado ni Rhonda isut’ desidido a maaddaan iti naaramiden, maysa a kawes a ginatang manipud iti paglakuan. Gapuna isut’ nangparnuay iti estoria a kuna kano ti maestrana a masapul a maaddaan iti kasta inton Mayo 1! Ngangngani nakumbinsirnakami iti dayta.
Sa adda met daydiay maipapan iti panagtakaw. Idi a ni Wayne ken Kenan addada iti maikadua ken umuna a grado, nangalada iti kendi manipud iti lamisaan ti maestrada. Idi naammuanmi daytoy nakirinnasonkami kadakuada, a pinadpadasmi a gutogoten manipud iti puspusoda no aniat’ nangtignay kadakuada a nangaramid iti daytoy dakes a banag. Dayta ti pinasuktanmi kadakuada babaen ti pananggatangda iti kendi ken panangiyawat iti dayta iti maestra ken panangibaga kenkuana no aniat’ naaramidanda. Pinadpadasmi nga iramutan manipud puspuso dagiti annakmi dagiti dakes a motibo apaman a dagitoy ti nadlawmi ken pinadpadasmi met a sukatan ida kadagiti naimbag ken nadalus a motibo babaen iti pannakirinnason kadakuada.
Kasapulan ti Naan-anay nga Atension
Idi karrugi pay laeng nabigbigmin a ti panangpadakkel ti maysa a pamilia iti serbisio ni Jehova ket maysa a karera a makasapul iti naan-anay nga atension. Nasarakanmi a kasapulan a mapagtalinaed nga okupado dagiti ubbing, a maikkanda iti pannakaawat iti urnos ken panangiyeskediol. Kasapulan a maammuanda no kaano ti panagriingda iti agsapa, no kaano ti panaginanada iti tengngat’ aldaw, no kaano ti oras ti pannangan, ken dadduma pay. Amin dagitoy ti kasapulan a maiyukuok bayat a maladaga pay laeng ken itultuloyda ken parang-ayenda dayta bayat a dumakdakkelda.
Rinugianmi a sinursuruan dagiti agtutubomi iti panagtulnog bayat ti kinamaladagada. No ibagami nga agaramidda iti maysa a banag, uray ti kas iti kasimple iti “Agdalikepkepkayo,” wenno, “Agtugawkayo,” namnamaenmi ken umawatkami iti insigida a panagtulnogda. Siniguromi a tunggal bilin ti matungpal. Ti makaay-ayo a panangtengngel ken panangiwanwan manipud kinamaladaga nga agturong iti kinanataengan ti nangkissay iti dakkel unay kadagiti parparikut iti maud-udi nga al-aldaw. Maysa a banag nga inar-aramidmi bayat ti kinamaladagada isut’ panangbalkot kadagiti annakmi iti lampin no orasen ti pannaturogda, kas ti pannakabungon ni Jesus idi maysa a maladaga. (Lucas 2:7) Daytoy ti nakatulong kadakuada a natalged ti panagrikriknada ken ngangngani makaturogda nga insigida.
Manipud iti nakagangganus nga edadda sinursuruanmi met dagiti ubbing nga agtrabaho. Iti sidong ti manangbantay a panangmatmat ni baketko, naadalda ti agpidut kadagiti bambanag, aginnaw kadagiti pinggan, ken agkupin ti kawkawesda. Kamaudiananna naadalda met ti agsorsi ti medias, ti mangidait iti butones, agaramid ti tinapay, agmula ken agikkat kadagiti ruot manipud iti hardin, ken ti tumolong iti panagibote ken ti panangipalamiis kadagiti produkto ti talon. Agpadpada a dagiti ubbing a lallaki ken babbai naadalda amin dagitoy a bambanag. Naadalda met ti agaramid kadagiti babassit a panagtarimaan iti aglawlaw ti balay, ti agpintura, ken ti panamagtalinaed a napintas ti paraangan. Sinursuruanmi ida nga agbalin a naan-anay iti aniaman nga aramidenda, nga aramiden a sisasayaat ti maysa a trabaho, ken siniguromi a dayta ti aramidenda. Kasapulan dayta ti panawen, ngem pudno a daytat’ nakagunggona iti kamaudianan a tawtawen.
Nabigbigmi met ti pannakasapul iti panaglinglingay. Dagitoy, nupay kasta, ti natakkon a rinamanna ti panagbuybuya iti telebision. Kinaagpaysuanna, nangaramid ti pamiliami iti sangsangkamaysa a pangngeddeng a DI maaddaan iti maysa. Ti panaglinglingaymi ti buklen kangrunaanna ti panagar-aramid a sangsangkamaysa kadagiti bambanag—panagay-ayam, piknik, panangtagiragsak kadagiti aktibidades ti kongregasion, ken ti ipapan kadagiti asamblea. Masansan, maitunos iti panagdaliasat nga agturong kadagiti asamblea, iyurnosmi ti panagbakasion kadagiti makapainteres a luglugar.
Masansan nga ipapaaymi ti panangipangpangruna kadagiti naespirituan nga ar-aramid. Iti umuna agdaliasatkami iti 55 milias (90 km) tunggal agturong idiay Kingdom Hall, ket dagiti kalam-ekna idiay North Dakota ti nakasasaem no maminsan. Ngem babaen iti panangala iti umiso a panagannad ken gapu ta nabendisionan iti kalalainganna met a salun-at, mammano a maikapiskami iti panaggigimong. Dagiti asamblea sirkito ti pudpudno a tampok ti panagbiagmi, a no maminsan ramanenna ti panagdaliasat iti 250 milias (400 km) tapno makiranud iti tallo-aldaw a programa kadagidiay nga al-aldaw.
Ti ministerio ti tay-ak ti regular a paset met ti kada ngudo ti lawas, nupay -20° F. (-29° C.) ti panniempona. Dadduma a tattao ti mabalin a mangipagarup a kinamanaglablabes a mairuar dagiti agtutubo iti kasta a tiempo, ngem daytat’ nakatulong a nangipasagepsep kadagiti ubbing nga awan ti rebbeng a mangtuben iti panagserbimi ken Jehova.
Ti Panangipangpangruna kadagiti Intereses ti Pagarian
Idi 1961 naipasangokami iti dakkel a pangngeddeng no ti talon nga ab-abanganmi ket mailakon. Rebbeng aya a gatangen ti talon wenno agsapulak ti sabali a panggedan? Ti panagtalon nasayaat para kadagiti ubbing, ken bayat a dumakdakkel dagiti ubbing a lallaki mabalinto a dayta met ti pagbirokanda. Nupay kasta, tapno maaramid nga umiso dayta, ti panagtalon ti mangala ti kaaduan a tiempomi ket napanunotmi a mabalin a daytanto ti agbalin a silo kadakami. Idi un-unana inikkannak ni tatangko ti maysa a daga, a saan met a dakkel unay. Inlakok daytoy ket gimmatangak iti backhoe ken dagiti kanayonanna nga arwaten ket nagturongak iti trabaho a panagkali.
Immakarkami iti kabangibang nga ili iti Butte, North Dakota, nga addaan ti populasion nga agarup 200. Siak ti nagkalkali kadagiti basement ken nagisasaad kadagiti imburnal ti taltalon, ket naadalko met ti agkantero ken nagbalin a tubero. Tapno masuposupan ti bassit a mabirokan, nagmanehoak met iti maysa a school bus. Kaskasdi kanayon a marikriknami ti pannakaseknan ken tulong ni Jehova kadakami no ipangpangruna ti pamiliami ti naespirituan a bambanag. Agpapan pay iti nagdakkelan, napanglaw a pamiliami ken ti pannakidangadangmi kadagiti nakaro a panniempona no maminsan, kanayon a makaatenderkami kadagiti panaggigimong ti kongregasion ken kadagiti asamblea, ken makiraman a regular iti tay-ak ti ministerio.
Idi agangay nakagatangkami ti daan a balay ket, babaen iti nabuslon a tulong ti tatang ni Carol, rinitubarmi dayta a nagbalin a nakapimpintas ngem nanumo a pagtaengan. Maysa a kongregasion ti nabuangay iti lugarmi, ket naaddaankam iti pribilehio a timmulong a nangibangon iti bassit a Kingdom Hall. Kas banagna, itan agdaliasatkam laengen iti 15 milias (25 km) imbes a 55 milias (90 km) tapno makapan makigimong. Yantangay bassit ti kongregasion, adda pasetmi kadagiti gimgimong iti kada lawas, nga isut’ nangokupar kadakami nga agsagana a maipaay kadakuada.
Iti adu a pamay-an marikriknami ti panangaywan ni Jehova. Kas panangiyilustrar: Idi Marso 1965 naawisak a tumabuno iti Kingdom Ministry School idiay South Lansing, Nueva York, nga idi mangipapaay pay laeng iti makabulan a kurso a panangisuro agpaay kadagiti panglakayen a Kristiano. Ngem ti kotsemi daanen ket saanen a mapagtalkan a maipaay iti pamiliami tapno mapan makigimong ken agatender iti asamblea sirkito bayat nga awanak. Gapuna napankami iti kadadakkelan nga ili iti kaparanget tap agsapul iti maysa a kotse. Awan panagballigimi a nagsapsapul iti kaaduan a paset dayta nga aldaw idi nga, agarup 45 minutos sakbay nga agawidakon tapno agmaneho iti school bus, nagsardengak pay iti maysa a managlako.
Ti ahente ti nangipan kaniak iti maysa a nasipnget a garahe idiay uneg ti daga ket impakitana kaniak ti maysa a kotse nga impagarupko agserbi iti panggepmi. Ti panangmaneho a panangipadas ipamatmatna a napintas ti panagtarayna, ngem kuna ti ahente a ti presiona ket $300, a nangatngato ngem ti mabalinko a pagbayad. Idi ngangnganiak pumanawen, kuna ti ahente nga agurayak bassit bayat a salsaludsodenna iti manedyer no ania ti kababaan a mabalinna a pangilakuan iti dayta. Nagsarimadeng ti manedyer, nagpanunot, ket addaan panagduadua a kinunana, $150. Nagsinnerrakamin ket minanehokon ti kotse a nagawid.
Kamaudiananna iti dayta a primavera, nairut ti kuarta. Sangsangpetko pay laeng manipud iti Kingdom Ministry School. Nasapa la unay a mangrugi iti trabaho iti ruar agsipud ta adda pay laeng dagiti natangken a yelo iti daga. Adda mapasungadan a trabahok idiay ballasiw laeng ti lansangan nga ayanmi nga agkali ti pagnaan ti danum ken ti imburnal ken mangikabil iti maysa a banio ken kadagiti ramramitna. Makabulan wenno nasurok pay sakbay a maaramidko dayta, ngem maysa nga aldaw iti pannakakellaatko, immawag ti kaarrubami kaniak. Kunana a kayatnak a paunaan ti $500 iti dayta a trabaho!
Idi 1967 immawatak iti naitukon a trabaho iti maysa nga ili agarup 100 milias (160 km) ti kaadayona. Naikeddengko nga awaten dayta. Maysa a rason a ta ti negosiok nga agkali ti mangiyadayo a mangiyadayo kaniak manipud iti balaymi, ket dimteng dayta iti punto a kasapulan ti panangpalawa ken agbalin nga ad-adda a naigamer iti negosio a pakaapektaran metten dagiti naespirituan nga ar-aramidmi. Gapuna inlakomin ti balaymi ket immakarkami idiay New Rockford, North Dakota, a sadiay nagbalinak nga ahente ti abuno nga aglako ti pakyawan para kadagiti talon. Nupay daytoy baro a panggedan ti di nangipalubos kaniak a maaddaan iti wayawaya nga impaay ti kabukbukodan nga empleo, naikeddengko nga alaen dayta yantangay natataengan met bassiten dagiti ubbing ken naipasnekda metten ti Nakristianuan a pamay-an.
Maysa a Naragsak a Pamilia iti Amin-Tiempo a Ministerio
Agsipud ta tinungday dagiti ubbing ti scholarships apaman a nagturposda, dagiti mannursuroda ken dagiti dadduma iti lugarmi impagarupda a sayang laeng dagiti laingda. Kaskasdi, nupay adu dagiti panangpilit nga agtuloyda koma iti nailubongan nga edukasionda, apaman a nagturposda iti high school tunggal maysa kadakuada ti nangrugin iti amin-tiempo a ministerio kas payunir.
Nangrugi ni Brenda a nagpayunir idi 1970, a sinaruno ni Rick idi 1972. Kalpasanna napan ni Rick idiay Bethel idi Disiembre iti dayta a tawen. Iti sumaganad a tawen, ni Rhonda ken ni baketko ti nangrugi met a nagpayunir. Idi 1974 siak ken ni JoDene ti kimmuyog kadakuada iti trabaho a panagpayunir, ket iti sumaruno a primavera inyeg ni Wayne ti bilang dagiti payunir iti pamiliami iti innem. Idi 1976 napan nagserbi ni Wayne idiay Watchtower Farms, ngem ni Kenan ket intultuloyna ti bilang dagiti payunir iti pamiliami iti innem.
Idi naikeddengko ti agpayunir, madi awaten ti amok ti kalikagumko a maipaay iti paset-tiempo a trabaho, gapuna pimmanawak iti trabahok idiay paglakuan. Insigida a naawatak met a tsuper iti trak nga agrasrasion ti gasolina, ngem idi impapilit ti amok a mairamanak iti sinisuitik nga aramid ti negosio, pinanawak met dayta. Nupay kasta, idin ket agpaypayunirak a kaduak ni Carol ken dagiti ubbing, ti tarigagaymi iti panagbiag, gapuna awanen ti mabalin a manglapped kaniak.
Iti las-ud ti maysa a lawas manipud ipapanawko iti naudi a trabahok, inawagannak ti maysa a manangimpleo a nagsaludsod kaniak no mabalinko ti agtrabaho iti dua nga aldaw iti kada lawas bayat ti kalam-ekna nga agdalus kadagiti pugpugon. Nakaskasdaaw? Saan kinapudnona, ta saan aya a naikari kadatayo a no ipangpangrunatay nga umuna ti intereses ti Pagarian, maaywanantayto? (Mateo 6:33) Idin dagiti ubbing addaanda metten kadagiti kabukbukodan a paset-tiempo a trabaho, ket ti itutulongda kadagiti paggastuan ti sangakabbalayan ti namagbalin a posible ti panagpayunirmi a sangsangkamaysa kas maysa a pamilia.
Kalpasanna, idi Hunio 1977, siak ken ni Carol agraman ken Kenan ti naawis a mapan idiay Watchtower Farms. Kas maysa nga ina ket panawanmin ti balaymi ken dagiti tallo nga inay-ayatmi a babbalasang ti pudno a nangpatibbayo ti puso ni baketko. Ngem nagrason a ni Jehova ti mangiturturong ket pudno a dayta a pribilehio ti awan pakaipadaanna. Kasta met ti panangmatmat dagiti babbalasangmi, ket ingunamgunamda a mapankami. Iti sumaganad a kalgaw nagbakasionkami, inlakomin ti balaymi ken dagiti dadduma pay a material a sansanikuami, ket tinulonganmi dagiti babbalasangmi nga umakar iti umuna a destinoda kas espesial a payunir agarup 100 a milias (160 km) ti kaadayona.
Bayat nga agserserbi dagiti babbalasang kas espesial a payunir idiay Grand Island, Nueva York, naawisda met idiay Watchtower Farms idi Agosto 1981 a makipagtrabaho a kaduami agingga a sumrekda iti maika-72 a klase ti Gilead School a mangrugi iti dayta nga Oktubre. Ti sumaganad a Marso nagturposda. ket di nagbayag aminda a tallo nagturongdan iti destinoda kas misionera idiay Colombia, Sud America.
Ni Rhonda ken JoDene addada pay laeng idiay Colombia, ngem ni Brenda naiyasawa iti maysa a kaklasena idiay Gilead idi Marso 1983 ket kimmuyog kenkuana idiay Makintengnga a daya. Ket, idi Marso 1984, nakiasawa met ni Rhonda iti maysa a graduado ti Gilead a kimmuyog kenkuana idiay Colombia. Kasta met, tunggal maysa kadagiti lallaki ti nangasawa met kadagiti napipintas a babbai a payunir nga agserserbi a kaduada itan idiay Brooklyn Bethel wenno Watchtower Farms. Gapuna ti payunir a pamiliami ti nagbalin a 13, agraman siak ken ni baketko.
Dakam amin ti pudpudno a naragsak nga adda iti amin-tiempo a serbisio ken ni Jehova, a Diostayo, ket kas maysa a pamilia ammomi a tapno makapagtultuloy kadagitoy a pribilehio iti serbisio, masapul nga agtignaykami iti maikari a pamay-an a maipaay iti naimbag a damag. (Filipos 1:27) Agyamankami kadagiti nasayaat a balakad nga ipapaay ni Jehova babaen ti makitkita nga organisasionna, yantangay gaput’ panangiyaplikar iti dayta iti panagbiagmi daytat’ nangibunga iti panangtagtagiragsakmi itan kas maysa a pamilia ti agdama a nadayag a gupit ti serbisio.
[Ladawan iti panid 24]
Naadal da JoDene, Brenda, ken Rhonda dagiti estoria ti Biblia iti naganus nga edadda
[Ladawan iti panid 25]
Ni Wayne, Rick, ken Kenan—addada amin itan iti serbisio ti Bethel