Ti Abogado a Nangusig Kadagiti Saksi ni Jehova

“AWAN unay idi ti ammok maipapan kadagiti Saksi ni Jehova,” kuna ni Les Civin nga abogado ken direktor ti maysa a kompania dagiti abogado idiay South Africa. Apay nga inusigna ti patpatien dagiti Saksi? Ania ti konklusionna kadagiti patpatienda? Kastoy ti insungbatna iti Agriingkayo!

Ania ti relihionyo idi?

Dimmakkelak a Judio, ngem idi rugrugi ti dekada 1970, inkasarko ni Carol a maysa nga Anglicano. Saan a napateg kadakami ti relihion kadagidi a tiempo. Ngem idi walo ti tawenen ti anakmi a ni Andrew, naamiris ni Carol a nasken nga adda met relihion a maisuromi kenkuana. Kinuna kaniak ti maysa a rabbi a no agpakomberte ni Carol iti Judaismo, automatiko nga agbalin ni Andrew a Judio ken maseremoniaan iti Bar Mitzvah inton agtawen iti 13. Isu a linawas a tinabunuanmi ti klase dagiti agpakomberte a maang-angay iti sinagoga.

Kasano a naam-ammoyo dagiti Saksi ni Jehova?

Kada umay dagiti Saksi iti balaymi, dagus nga ibagak kadakuada: “Judioak ken diak mamati iti Baro a Tulag.” Naminsan, kinuna ni Carol a ti maysa kadagiti gagayyemna ket Saksi ken nagadu ti ammona maipapan iti Biblia. Insingasing ni Carol nga ammuenmi ti ad-adu pay maipapan iti Biblia isu a napilitanak a makipagadal kadagiti Saksi.

Ania ti reaksionyo iti panagadalyo iti Biblia?

Napannakkelak idi. Gapu kadagiti tabtabunuanmi a klase iti sinagoga, bimmileg manen ti pammatik iti Judaismo ken mamatiak a kamengak ti napili a puli. Pinampanunotko, ‘Ania koma met ti maisuroda kaniak?’ Iti umuna a panagadalmi, kinunak iti Saksi nga immay iti balaymi: “Nayanakak a Judio. Nagbalinakon a Judio, ket matayakto a Judio. Uray ania ti ibagbagam, diak pulos balbaliwan ti relihionko.” Rinaemna ti kapanunotak. Isu a kada rabii ti Lunes ken Biernes, tabunuanmi dagiti klase iti sinagoga dagiti Judio. Tunggal bigat met ti Domingo a makipagadalkami kadagiti Saksi (no awan mapanunotko a pagpambar). Mayat met ketdi ta libre ti panangisuroda, saan a kas kadagiti klase iti sinagoga.

Inusarko ti Bibliami a Judio gapu ta impagarupko nga agus-usar dagiti Saksi iti patarus a maibagay laeng kadagiti kapanunotanda. Ngem nasdaawak ta nagadu met gayam ti pagpadaan ti dua a Biblia. Gapu iti dayta, ad-addan a porsegidoak a mangpaneknek a saan nga ammo dagiti Saksi ti ibagbagada.

Kalpasan ti sumagmamano a pannakipagadalmi iti rabbi, imbaga kaniak ni Carol a nadlawna a bassit ti ammo ti rabbi maipapan iti Biblia. Isardengna kanon ti tumabuno kadagiti klase iti sinagoga ken dina tallikudan ni Kristo. Nagsakit unay ti nakemko isu a napanunotko payen a sinaan ni baketko. Ngem idi nagkalman ti riknak, nakapanunotak iti sabali a taktika—usarek ti kinaabogadok a mangpaneknek ken Carol a palso ken napeggad ti relihion dagiti Saksi.

Nagballigikayo kadi?

Adda rabbi a nangted kaniak iti libro a nairanta a mangpaneknek a dagiti padto maipapan iti Mesias ket saan a natungpal ken Jesus. Inadalmi ken Carol dayta a libro iti 18 a bulan. Intultuloymi met ti linawas a pannakiadalmi kadagiti Saksi. Ngem bayat nga us-usigenmi ti tunggal padto a nailawlawag iti libro ti rabbi, agbalawakon. Maikaniwas kadagiti argumento ti libro, dagiti padto iti Biblia maipapan iti Mesias ket kanayon a maymaysa a persona ti tukoyenda—ni Jesu-Kristo. Idi inadalmi ti padto iti Daniel 9:24-27 a mangipakpakauna iti panagparang ti Mesias iti tawen 29 K.P.,a nakombinsirak met laengen. Nangitugot ti Saksi iti Hebrew Interlinear a Biblia a tunggal Hebreo a sao iti dayta ket literal a naipatarus iti Ingles. Sinukimatko ti nausar a sasao, kinalkularko met a mismo ti kronolohia, ket kinunak: “Bueno, 29 K.P. ti tuktukoyen ti padto. Ania koma ita?”

“Daydi ti tawen a nabautisaran ni Jesus,” kinuna ti Saksi.

Naklaatak! Nasdaawak met iti kinaumiso ken panagtutunos dagiti padto iti Biblia.

Ania ti reaksion dagiti gagayyemyo idi nagbalbaliwen ti pammatiyo?

Adda dagiti madanagan unay ket imbagada nga iyam-ammodakami nga agassawa kadagidiay makapaneknek a naallilawkami laeng. Ngem ti pammatimi ket naibasar iti nauneg a panagsirarak ken nainkalintegan a panagrasrason—ti mismo a kasungani ti pannakaallilaw.

Apay nga inkeddengyo ti agbalin a Saksi?

Idi damo, pasaray kumuyogak ken baketko a makigimong iti Kingdom Hall. Nabautisaran idin a Saksi ni Carol.b Nagustuak ti kinamannakigayyem dagiti Saksi ken ti panagiinnayatda uray agduduma ti pulida. Saan a kasta iti mismo a relihionko. Kalpasan ti agarup tallo a tawen pay a panagadal, nagpabautisarak met laeng.

Ania ti panagriknayo iti desisionyo nga agbalin a Saksi?

Ipagpannakkelko ti panagbalinko a maysa kadagiti Saksi ni Jehova. Ngem no pampanunotek ti panangbusorko idi iti kinapudno, panagriknak ket diak maikari kadagiti bendision nga ipapaay kaniak ni Jehova. Diakto pulos pagbabawyan ti desisionko.

Ania dagiti bendision a tagtagiragsakenyo?

Adu. Kas pagarigan, maragsakanak unay iti pribilehiok nga agserbi kas maysa a panglakayen, wenno naespirituan a pastor ken mannursuro iti kongregasion iti lugarmi. Tumultulongak met iti Legal Department iti sanga nga opisina dagiti Saksi ni Jehova ditoy South Africa. Ngem awan duadua a ti kasayaatan a nasagrapko a bendision ket ti pannakaam-ammok ken Jehova, ti Anakna, ken ti pannakatarusko iti pudno a kaipapanan ti panawentayo agraman dagiti napapateg a pasamak a mangap-apektar iti lubong.

[Footnotes]

[Blurb iti panid 11]

Nasdaawak . . . iti kinaumiso ken panagtutunos dagiti padto iti Biblia