Maabrasakayo iti 1985 a “Manangsalimetmet Kinatarnaw” a Kumbension!
NALATAK unay dagiti Saksi ni Jehova saan laeng a gapu ti regtada iti ministerio a panagbalaybalay no di ket kasta met kadagiti dadakkel a Nakristianuan a kumbensionda. Dagitoy ti naitamtampoken iti nasurok a sangagasut a tawtawen itan, nanipud pay idi 1879. Adda ti naimbag a Nainkasuratan a pagulidanan kadagitoy a kumbension.
Mamitlo a daras iti kada tawen dagiti Israelitas makalikagumanda nga agtataripnong a maipaay kadagiti pipiestada. Imbilang ni Jehova dagitoy a nakapatpateg a maulit-ulit nga impaipaganetgetna ida ken Moises idiay Pentateuko. Kitaenyo ti Exodo 23:14-17; 34:22-24; Levitico 23:4-22; Numeros 28:16–29:12; Deuteronomio 16:1-16. Mabasatayo met a dagiti nagannak ken Jesus ti regular a napanda idiay Jerusalem a maipaay iti piesta ti Paskua.—Lucas 2:41, 42.
Bayat ti 38 ket tallo a tawtawen itan, dagiti asamblea dagiti Saksi ni Jehova ti mangsursuroten ti maysa a padron nga umas-asping ti padron ti kadaanan nga Israel. Mamindua iti kada tawen pagragsakantayo ti agtataripnong a maipaay kadagiti asamblea sirkitotayo, a ramanenna ti manipud 8 agingga iti 20 a kongregasion. Kalpasanna kumitkitatayo a sigagagar nga agtataripnong a maminsan iti kada tawen a maipaay kadagiti kumbension distrito, nasional, wenno internasional. Ap-apresiarentayo met laeng aya dagitoy a panagtataripnong kas rebbengna? Saan nga amin dagiti kakabsattayo iti intero a daga ti addaan iti daytoy a bendision. Gapuna iti nabiit pay a damag manipud iti maysa a pagilian a Balkan a sadiay nabayagen a ti trabaho ket malaplapdan imbagana nga “iti damdamo unay mabalinmin ti mangangay ti maysa a kumbension distrito iti maysa a pagtataripnongan iti publiko . . . Dagiti kakabsat nakaragragsakda unay gapu iti dayta.”
Addaanda ti rason nga agbalin a naragsak, ta di met aya bayat a dakdakkel ti bilang dagiti Saksi nga agtataripnong, dakdakkel met ti ragsakda. Maysa a pagilian ti nangipadamag nga idi 1983 a “ti ‘Panagkaykaysa ti Pagarian’ a kumbension iti Disiembre ti pudno a tampok ti tawen,” ken sabali pay ti nangdeskribir iti dayta a kas “ti kangatuan a punto iti tawen.” Saan a nakaskasdaaw a kaaduan kadagiti Saksi ni Jehova agaramidda kadagiti plano a masansan buyogen ti dakkel a panagsakripisio, a tumabuno kadagiti kumbension distrito iti intero a tallo ket kagudua nga aldaw.
Idi napan a tawen naaddaantay ti pribilehio a timmabuno kadagiti kumbension a “Panagrang-ay ti Pagarian.” Imbaga ti programa nga anian a maiyanatup dayta a tema gapu kadagiti dadakkel nga irarang-ay dagiti agibumbunannag ti Pagarian iti intero a lubong. Mainayon pay, impaganetget dayta ti obligasion ti tunggal maysa a Saksi maipapan iti dayta a panagrang-ay. Ket anian a nagsayaat nga instrumento ti inawattayo a maipaay iti ministeriotayo—ti Reference Edition iti New World Translation of the Holy Scriptures, ti katulongan iti panagadal iti Biblia nga Survival Into a New Earth, ken ti broshur a The Divine Name That Will Endure Forever! Daytoy a tawen adda manen ti maisagsagana nga agpaay kadakayo! Pagragsakantayo ti agtataripnong iti “Manangsalimetmet Kinatarnaw” a kumbension. Daytoy a tema ipalagipna ti kinapateg ti pannakiramantayo iti panangalangon iti nagan ni Jehova babaen ti panangsalimetmettay ti kinatarnawtayo agingganat’ panungpalan ti sistema ni Satanas.
Anian a nagpateg dayta a tema! Daytat’ naisinggalut iti kapapatgan unay a salisal a naipasango kadagiti amin a nasaririt a parparsua, awan sabali ti kinanainkalintegan ti kinasoberano ni Jehova, kas itantandudo dagiti parparsua a mangsalsalimetmet ti kinatarnawda agpapan pay amin a maaramidan ni Satanas a Diablo. Saan a nalaka ti agbalin a manangsalimetmet ti kinatarnaw kadagitoy “panawen a napeggad.” (2 Timoteo 3:1-5) Dayta ti kasungani unay ti panangsurot iti pananglaglag-an. Kaipapanan dayta ti ‘iseserrek iti akikid a ruangan ken pannagna iti nailet a dalan a mangiturong iti biag.’—Mateo 7:13, 14.
Ti panangsalimetmet ti kinatarnaw kas ministros ni Jehova a Dios ramanenna dagiti dua a pamunganayan a pagalagadan. Iti maysa a bangirna adda ti pannakasapul ti panagbunga kadagiti bungbunga ti espiritu tapno “arkosanda ti sursuro ti Manangisalakantayo, ti Dios, kadagiti isuamin a bambanag.” (Tito 2:10) Iti kasumbangirna addaantayo met ti bilin a panangikasaba ken panagaramid adalan, bayat ti pannakiramramantayo iti kaitungpalan ti padto ti Biblia.—Mateo 24:14; 28:19, 20.
Tapno maragpattayo dagitoy dua a pagalagadan, masapul ti intay panagtultuloy a panangbirok nga umuna ti Pagarian ken ti kinalinteg ti Dios. Masapul a makidangadangtayo a maibusor kadagiti amin a gakat ni Satanas a Diablo, amin dagiti pannulsulisog daytoy daan a lubong ti maipaspasango kadatayo iti langa ti materialismo ken panagsapul ti ragragsak, ken masapul nga aramidentayo kas inaramid ni Pablo, ‘a gubatentay ti bagitayo ken iturongtayo kas ad-adipen.’ (1 Corinto 9:27; 1 Pedro 5:8; 1 Juan 2:15-17) Ti sibaballigi a panangparmek kadagiti mamagpeggad iti kinatarnawtayo ket saan a nalaka a banag.
No apresiarentay a naan-anay ti karit ti panangsalimetmet iti kinatarnawtayo, umaytayo iti kumbension a ‘sipapanunot iti naespirituan a kasapulantayo.’ (Mateo 5:3) Agatensiontayo a naimbag iti adda a maibagbaga manipud plataporma, agala ti notas, makitimpuyog a naimpusuan iti panagkanta, ken sumrek iti espiritu dagiti panagkarkararag nga adda maidatag sadiay. Kasta met, agimdengtayo a siaannad kadagiti balakad a maipapaay maipapan ti panangsalimetmettay ti kinatarnawtayo ken Jehova a Dios, kadagiti assawatayo, ken kadagiti padatayo a Kristiano. Babaen kadagiti palawag, interbiyu, demostrasion ken drama maparegtatayo ken makabalantayo nga agbalin nga ad-adda a determinado ngem kadagiti napalabas a mangsalimetmet ti kinatarnawtayo aginggana ti panungpalan daytoy daan, dakes a sistema dagiti bambanag.
Ditay koma met liplipatan ti kinapudno a dagiti dadakkel a panagtataripnongtayo agserbida kas maysa a pammaneknek iti lubong. Iti daytoy napalabas nga Enero ti “Panagrang-ay ti Pagarian” a kumbension ti naangay idiay River Plate Stadium, Buenos Aires, Argentina, bayat iti uppat nga aldaw. Daytat’ nakaaramid ti dakkel a damag! Ti lokal a pagiwarnakan ti damdamag nga Ahora ti nangiparang iti nagpintas a de kolor a naiyilustrar a report iti kumbension, nga addaan iti paulo ti damag a, “Ti Pammati Pinunnona dagiti Stadium.”
Iti sidong met ti dakkel a paulona a, “Maysa a Pagarian a Dumakdakkel—Dagiti Saksi ni Jehova,” ti dua-panid nga artikulo kunana iti pasetna: “Pudno a nakaskasdaaw. Ti pannakakita iti dayta isut’ panamati. Ti pammati ti mangiyalis kadagiti bambantay. Rebbengna a ti pammati ti nangtignay ti promedio a 42,000 a tattao a siuulimek ken iti nakaskasdaaw a kinaurnos pinunnoda dagiti grandstand ti football iti River Plate Stadium bayat ti uppat nga aldaw iti daytoy a nagpudot a kalgaw. Rebbeng a pammati, met, ti namagbalin a nakapagtataripnong ti saan a nakurkurang ngem 46,000 a matalek nga awan pulos panangidumduma iti sekso, edad, kultura, rasa, wenno nasionalidad bayat ti maudi nga aldaw ti kumbension distrito dagiti Saksi ni Jehova. . . . Makiramankay man wenno saan kadagiti kapanunotan ken doktrinada, daytoy intero nga umariwekwek ti maikari iti naindaklan a panagraemtayo. Ipakpakitada nga isuda dagiti napakumbaba, adayoda manipud kadagiti babassit a bambanag iti inaldaw-aldaw a panagbiag ken iti moderno a lubong nga isut’ gasattayo a pakiramanan; pinagbalinda a sursuro ti talna ken ayat iti tengnga dagiti kakabsattayo.”
Ti artikulo intuloyna a kinuna: “Komosta met ngay ti organisasionda? Amin perpekto. Ti polisia a naibaon sadiay ket masikoranda agsipud ta awan met ar-aramidenda . . . Awan uray laeng bassit a pasamak, pananggargari, wenno riribuk a napasamak iti las-ud ti uppat nga aldaw. . . . Awan a pulos ti pakariribukanmi gapu iti di marukrukod a talna nga ik-ikutan dagiti Saksi . . . Pudno man ken saan, nagun-odanda ti panagraemtayo. Aniat’ mangtigtignay kadakuada? Dayta ti pammati. Dayta a pammati a makaiyakar kadagiti bambantay.”
Awan duadua iti dayta, babaen iti panangikunduktatayo kadagiti bagbagitayo kas dagiti Kristiano a ministro ni Jehova a Dios, makaipaaytayo iti nagsayaat a pammaneknek kadagiti taga ruar. Pudno, ti panagbalin a Kristiano ket saan a pulos a nalaka. Kuna ni Jesus a kaipapanan dayta ti panangibaklay ti kayo a pagtutuokan. Ti panangasikasotayo a naimbag iti “Manangsalimetmet Kinatarnaw” a kumbensiontayo tulongannatayo nga agbalin a nasasayaat a paspasurot ni Jesu-Kristo.—Mateo 16:24.