Ti “Manangsalimetmet Kinatarnaw” a Kumbension Asidegen
Maysa a makagunggona nga uppat nga aldaw a panangisuro ti Biblia ti agur-uray kadakayo idiay “Manangsalimetmet Kinatarnaw” a Kumbension dagiti Saksi ni Jehova a mangrugi iti daytoy a bulan. Babaen kadagiti makaisuro a diskurso, interbiyu kadagiti aduan kapadasanen a ministro, ken kadagiti praktikal a demonstrasion, maysa a nagpateg a Nakristianuan a pannakaiwanwan ti maipaay.
Addakay koma sadiayen iti panglukat a sesion iti 1:30 iti malem iti Huebes. Ti palawag ti tirsman, a “Bay-anyo a ti Kinatarnaw ti Mangsalwad Kadatayo,” itampokna ti tema ti kumbension ket parayrayenna ti panagsegga a maipaay iti uppat nga aldaw a programa. Kasta met, iti panglukat a sesion awatenyonto iti agbalin a napaut a tulong a makipagrason kadua dagiti dadduma manipud ti Kasuratan.
Iti agsapa ti Biernes, addanto ti dramatiko a presentasion ti Ti Masanguananyo—Karit Dayta. Daytoyto ti pudpudno a pammaregta kadagiti agtutubo. Awan duadua apresiarenyonto unay ti awatenyo inton Biernes a magagarankayto a mangiranud iti dayta kadagiti dadduma iti dayta a lugar.
Ti programa iti Sabado ti napunno kadagiti praktikal a pannursuro a maipaay kadagiti Nakristianuan a panagbiag. No ania ti kayat a sawen a pagbalinenyo a simple laeng ti matayo ken no kasano a maaramidan ti panangsitar iti piguratibo a pusoyo ti mailawlawagto. Ti pangserra a presentasion iti dayta nga aldaw, a “Kinatarnaw iti Kinapudno iti Dakes a Lubong,” ikkannakayto ti banag a nagpintas a saanto laeng a maysa a gameng kadakayo no di ket dakkelto met a katulongan iti trabahoyo iti tay-ak ti ministerio.
Ti programa iti Domingo, ti maudi nga aldaw, itampoknanto ti dramatiko a presentasion agraman ti umiso a panagkawkawesda nga Agbuteng iti Dios, Umadayo iti Dakes, agraman ti palawag publiko a, “Dagiti Tiempo ken Pampannawen ti Dios—Ania ti Itudtudoda?” Pudno a daytat’ makaisuro, nakaragragsak nga uppat nga aldaw a programa! ADDAKAY KOMA SADIAY!
Yantangay ginasgasut a kumbension ti naiyeskediol iti adu a paset ti lubong, mabalin nga adda ti maysa a di unay adayo manipud pagtaenganyo. Umumankayo kadagiti Saksi ni Jehova iti lugaryo maipapan iti oras ken lugar daydiay kaasitgan kadakayo.