Ti Papa ken ti Apocalipsis
AVERTING ARMAGEDDON ti paulo nga inted dagiti dua a periodista iti libroda iti 1984 maipapan iti nabiit pay a politika ti papa. Ni Gordon Thomas ken Max Morgan-Witts ti agipadpadamag maipapan iti papado kadagiti nasuroken a 17 a tawtawen. Ania a pannakaawat ti magun-odantayo kadagiti natatan-ok a tattao iti Iglesia Katolika maipapan iti apocalipsis?
Sigun kadagitoy a periodista, kinuna ni Monsignor Emery Kabongo, a personal a sekretario ni Juan Paulo II: “Ti Papa ket kasla maysa a naespirituan a Hercules a padpadasenna a pagsinaen dagiti napipigsa a pannakabalin, a padpadasenna nga atipaen ti nuklear nga Armagedon.”
Agparang a dagiti papangulo ti iglesia ti nangnangruna a maseknan maipapan iti sangalubongan a pannakadadael babaen kadagiti ar-aramid ti tao imbes a maipapan iti napili nga ibaballaet ti Dios kadagiti ar-aramid ti tao—ti apocalipsis nga impadto ti Biblia. Gapuna ti, Averting Armageddon kunaenna: “Kadagidiay kakadua ni Kabongo, awan ti aniaman a makinruar a pagilasinan ti panagregget iti panangpadpadasda a mangatipa iti apocalipsis a madmadlawda. . . . Ngem iti likudan daytoy adda ti danag nga isu ti direkta a katuloyan manipud iti internasional a Synod dagiti Obispo. Ti panagpapatang ti nagpatingga iti nota a napnuan iti sigurado nga ipapatay, a pagladladingitanda dagiti ‘kasla gubat a kinaagresibo, kinaranggas ken terorismo, ti panagitambak kadagiti arsenal agpadpada kadagiti gagangay ken nangnangruna dagiti armas a nuklear, ken ti di umiso a panaglako kadagiti amin nga ig-igam ti gubat.’” Uray pay ti papa ti nairaman. Kinuna da Thomas ken Morgan-Witts a kadagiti estante idiay librariada adda dagiti sursurat kas ti International Defense Review, The Problems of Military Readiness, ken Suprise Attack: Lessons for Defense Planning. Innayonda:
“Dumna kadagiti sursurat ti papa isuda dagiti libro maipapan iti tema a nangilansa itan iti Papa: ti eskatolohia, ti panagadal kadagiti pannursuro iti Biblia a mangilawlawag a ti Dios rugianna ti Pagarianna ditoy daga babaen kadagiti agsasaruno a ‘paspasamak’ a mangserra ti maysa a panawen. Mamati ni Juan Paulo a sibabara . . . a, mabalin sakbay ti panagpatingga ti siglo, adda maysa a ‘positibo’ a banag a mangabbungotto iti lubong. Maysanto aya dayta nga angol, ti maikadua a Nangisit nga Ipapatay? Wenno maysa a tikag wenno panagbisin a di pay naartapan ti kadakkelna? Wenno nuklear a gubat? Ad-adda a pagbutbutnganna a kanayon ita daydiay maud-udi; nalabit isu ti pagaammo nga agpampanunot, isut’ naikabil iti akem kas ulo ti Iglesia bayat iti mabalin maudi a dekada ti lubong sakbay a permanente a marumekto dayta babaen iti nuklear nga uram.”
Iyaw-awag met ti Averting Armageddon iti atension maipapan iti simboliko a “pagorasan ti panungpalan” a kankanayon a maipagpaganetget iti Bulletin of the Atomic Scientists. Idi damo a maipablaak daytoy a “pagorasan” idi Disiembre 1947, dayta ti naikabil iti pito a minutos sakbay ti tengnga ti rabii tapno ipakita “no kasano kaasidegen ti lubong iti nuklear nga Armagedon.” Kalpasan ti 1972 a tulagan maipapan iti pananglimitar kadagiti armas (SALT), dagiti im-ima ti pagorasan ti naisubli iti 12 minutos sakbay ti tengnga ti rabii. Idi 1984 insurat da Thomas ken Morgan-Witts: “Itan ti pagorasan ti mabasan a tallo a minutos laengen agingga iti tenga ti rabii. Daytoyen ti kaasitgan ti nakadanonanna iti aldaw ti panungpalan kadagiti tallopulo a tawtawen.”
Agpapan pay ti aniaman a panagregget ti papa a “mangatipa iti nuklear nga Armagedon,” idi Nobiembre 1985, dagiti im-ima ti pagorasan kaskasdi impakpakitada a 3 a minutos laengen. Nupay kasta, ditay koma a mailislisi iti pannakaseknan no dagiti nasnasion ket dadaelendanto ti sangatauan. Imbes a padpadasen a liklikan ti apocalipsis, nasiribtayo no sapulentayo ti dalan ti panangisalakan ti Dios manipud ti Apocalipsis, ta daytoy ti sigurado nga “umayto iti isuamin a mapagnaedan a daga.”—Apocalipsis 3:10.