Baro a Katulongan a Libro Iti Tay-ak ti Ministerio
KADAGITI ginasgasut a “Dagiti Manangsalimetmet Kinatarnawna” a Kumbension Distrito bayat ti 1985-86, maysa a baro a katulongan a libro iti ministerio ti tay-ak ti nairuar kadagiti adu a pagsasao. Daytat’ mausar a pangtulong kadagiti tattao tapno makagun-odda kadagiti makapnek a sungbat nga ipapaay ti Biblia kadagiti salsaludsodda. Isu daytoy ti 448-panid a libro a napauluan Reasoning From the Scriptures. Ania ti sumagmamano kadagiti paspasetna?
◻ “Dagiti Introduksion a Maaramat iti Ministerio iti Tay-ak.” Dagitoy ti naurnong manipud kadagiti manangaywan ti sirkito ken distrito, kadagiti payunir, ken kadagiti panglakayen nga addaan kapkapadasan iti adu a tawtawenen ket addaanda kadagiti nasasayaat a bungbunga iti ministerio.
◻ “No Kasanoyo a Sungbatan dagidiay Panggupedda iti Panagsasarita.” “Saanak nga interesado,” “Adda Bukodkon a Relihion,” “Okupadoak,” ken adu pay dagiti nataming ditoy. No dagitoy nga isusuppiat ti manglaplapped kadakayo iti inkay panangaskasaba idiay teritoriayo, makakitakayto kadagiti makatulong a baro nga iyaadani ditoy. Daytoy a paset naglaon met kadagiti praktikal nga impormasion maipapan iti pannakipatpatang kadagiti Buddhista, Hindu, Judio, ken Muslims.
◻ Nasurok a 70 a kangrunaan a paulo dagiti tema. Nairaman ditoy ti “Aborsion,” “Droga,” “Sekso,” “Espiritismo,” “Dagiti Pipiesta,” “Rapture,” “Reinkarnasion,” “Trinidad,” ken adu pay. Iti babaen dagitoy isu dagiti suhestion no kasano a sungbatan dagita a kita ti salsaludsod a masansan a maisalsaludsoden kadagiti 1980’s. Kas pangarigan: “Kasano a masiguroyo a ti Biblia di nagbalbaliw?” “Ti aya tunggal maysa addaan ti antimano a naikeddeng a ‘panawen nga ipapatayna’?” “Apay a palpalubosan ti Dios ti panagsagaba?” Addada met dagiti suhestion no kasanoyo ti makirinnason iti maysa a tao nga agkuna: “Tattao ti nangisurat ti Biblia,” “Addaanak ti kabukbukodan a kapanunotan iti Dios,” “Addaanak ti nasayaat a biag. Umiso ti panangtratok kadagiti kaarrubak. Daytat’ umdasen a relihion para kaniak,” ken adu pay. Dagitoy ti naurnong manipud 18 a pagilian. Ti panangusar iti daytoy a katulongan a libro ti mangtulong kadakayo a magunggonaan manipud iti kapadasan a nagun-odanen dagiti dadduma iti adu a tawtawen a pannakirinnason manipud iti Kasuratan.
◻ Daytoy a libro saan a naisagana a mangtulong iti asinoman a “mangabak kadagiti argumento” kadagiti tattao a di agraem iti kinapudno. Imbes ketdi, daytat’ mangted kadagiti napateg nga impormasion a nairanta nga usaren a makirinnason kadagiti indibidual a mangipalubos kadakayo a mangaramid iti kasta. Dadduma kadakuada ti mabalin nga agsaludsod a talaga a kayatda dagiti makapnek a sungbat. Dagiti dadduma, bayat ti pannakipatpatangyo, ti mabalin a basta kayatda laeng nga iyebkas ti kabukbukodanda a pammati, ket mabalin nga aramidenda dayta a buyogen ti napigsa met a panamati. Ngem nalabit mannakaawatda a tattao a situtulokda a dumngeg iti panangmatmat dagiti dadduma. No kasta, daytoy a libro ti mabalin a makatulong unay iti nalawag a panangidatag ti kinapudno iti Biblia. Dikayo agalikaka a mangipakita kadakuada no ania dagiti linaonna ket basaenyo a mismo dayta kadakuada.
◻ Maitunos iti ulidan nga impakita ni apostol Pablo idi nangaskasaba idiay Grecia, ti umiso a panangusar ti naaramid met iti panagadaw manipud sekular a historia, kadagiti enciclopedia, kadagiti relihiuso a pagreperensiaan a liblibro, dagiti lexicon dagiti pagsasao ti Biblia, ken dadduma pay. Isuamin ket kasda la adda iti murdong dagiti ramramayyo.
◻ Maysa a pito panid nga indese dagiti tema ken kasuratan ti nairaman tapno makatulong kadakayo a mangsapul a daras kadagiti sungbat.
◻ Itugotyo a kanayon daytoy nagpateg a katulongan a libro idiay tay-ak ti ministerio. Itukonyo dayta kadagiti estudiante ti Biblia a mangipakpakita ti tarigagay a makisao kadagiti dadduma maipapan iti maad-adalda. Dayta ti saan a gagangay a maitukon iti publiko. Ngem no adda ti agkalikagum mabalin nga isu ti maaddaan iti kopia, ket dikay agalikaka a mangala ti maysa nga agpaay kadakuada.
[Kahon iti panid 31]
Ti maysa a kopia ti Reasoning From the Scriptures ti mabalin a maipakoreo kadakayo a nabayadan ti seliona kas panangsungbat iti kalikagumyo ken ti kontribusion a ₱17.50 wenno ti katupagna a maipatulod iti aniaman a direksion a nailista iti panid 2.